ລັດຖະບານ ແຫ່ງ ສປປ ລາວ ປະດັບຫຼຽນໄຊພັດທະນາ ຊັ້ນ I ໃຫ້ທ່ານ ສັກໄຊ ວົງມາລາສິດ ປະທານບໍລິສັດ ລາວເວີນ ວິສະວະກຳ ແລະ ກໍ່ສ້າງຂົວທາງ ຈຳກັດ ທີ່ມີຜົນງານຄຸນງາມຄວາມດີ ປະກອບສ່ວນຊ່ວຍເຫຼືອລ້າດ້ານທຶນຮອນ ໃນການກໍ່ສ້າງເສັ້ນທາງເບຕົງເສີມເຫຼັກ-ຂົວຂ້າມຮ່ອງແຊງ ແລະ ກໍ່ສ້າງຂົວຂ້າມນ້ຳງື່ມ ບ້ານນາບົງ-ທ່າກົກໄຮ ລວມມູນຄ່າ 147 ຕື້ກີບ.
ພິທີປະດັບຫຼຽນດັ່ງກ່າວ ໄດ້ຈັດຂຶ້ນວັນທີ 22 ມີນາ 2016 ຢູ່ຫ້ອງວ່າການປົກຄອງ ນວ ເຊິ່ງຕາງໜ້າໃຫ້ລັດຖະບານແຫ່ງ ສປປ ລາວ ປະດັບໂດຍທ່ານ ດຣ. ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ແລະ ຮັບໂດຍທ່ານ ສັກໄຊ ວົງມາລາສິດ ໂດຍຊ້ອງໜ້າບັນດາຮອງເຈົ້າຄອງ ເຈົ້າເມືອງ ພະແນກການ ຫ້ອງການ ແລະ ແຂກຖືກເຊີນ.
ປັດຈຸບັນ ການກໍ່ສ້າງ 2 ໂຄງການດັ່ງກ່າວແມ່ນມີຄວາມຄືບໜ້າ ແລະ ສຳເລັດໄປບາງໜ້າວຽກແລ້ວ ໃນນີ້ ການກໍ່ສ້າງເສັ້ນທາງເບຕົງເສີມເຫຼັກ-ຂົວຂ້າມຮ່ອງແຊງ ໄດ້ສຳເລັດການກໍ່ສ້າງເສັ້ນທາງໂດຍພື້ນຖານ ແລະ ກຳລັງດຳເນີນປັບແບບຂົວຮ່ອງແຊງ ແລະ ຈະສືບຕໍ່ດຳເນີນການກໍ່ສ້າງ ເຊິ່ງຄາດວ່າຈະໃຫ້ສຳເລັດ ແລະ ນຳໃຊ້ໃນເດືອນກັນຍາ 2016 ສ່ວນຂົວຂ້າມນ້ຳງື່ມ ບ້ານນາບົງ-ທ່າກົກໄຮ ແມ່ນກຳລັງກະກຽມຖົມດິນ ກຽມກົນຈັກ ແລະ ວັດຖຸອຸປະກອນລົງສະໜາມ ເພື່ອຕອກເສົາເຂັມ ເຊິ່ງມີຄວາມຄືບໜ້າ ປະມານ 10% ຂອງແຜນການ ຈາກນັ້ນ ກໍ່ຈະສືບຕໍ່ດຳເນີນການກໍ່ສ້າງ ເຊິ່ງຄາດວ່າຈະສຳເລັດ ແລະ ເປີດນຳໃຊ້ໃນທ້າຍປີ 2017.
ການຊ່ວຍເຫຼືອຂອງທ່ານ ສັກໄຊ ວົງມາລາສິດ ຖືວ່າເປັນການປະກອບສ່ວນອັນສຳຄັນ ເຂົ້າໃນການສ້າງສາ ແລະ ພັດທະນາປະເທດຊາດ ດັ່ງນັ້ນ ທ່ານປະທານປະເທດແຫ່ງ ສປປ ລາວ ຈຶ່ງໄດ້ອອກດຳລັດວ່າດ້ວຍການປະດັບຫຼຽນໄຊພັດທະນາ ຊັ້ນ I ເປັນການຍ້ອງຍໍສັນລະເສີນຕໍ່ການປະກອບສ່ວນດັ່ງກ່າວ.
ແຫລ່ງຂ່າວ:
