ວັນທີ 21 ມີນາຜ່ານມາທີ່ສູນການຄ້າວຽງຈັນເຊັນເຕີໄດ້ມີພິທີເປີດງານວາງສະແດງສິນຄ້າອິນເດຍຢູ່ລາວຄັ້ງທຳອິດໂດຍການຮ່ວມມືກັນລະຫວ່າງສະພາການຄ້າປະເທດອິນເດຍກັບສະຖານທູດອິນເດຍປະຈຳລາວເພື່ອໃຫ້ນັກທຸລະກິດອິນເດຍໄດ້ພົບປະປືກສາຫາລືກັບນັກທຸລະກິດລາວແລກປ່ຽນທັດສະນະທາງດ້ານທຸລະກິດປະສົບການ ແລະກາລະໂອກາດຂອງທຸລະກິດເພື່ອຈະເຂົ້າມາເປັນຄູ່ຮ່ວມທຸລະກິດເຮັດການຜະລິດສິນຄ້າຕ່າງໆໃຫ້ສາ ມາດຕີຕະຫຼາດອາຊຽນໄດ້.
ເຂົ້າຮ່ວມງານດັ່ງກ່າວມີ ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການກະຊວງອຸດສາຫະກຳ ແລະການຄ້າ, ທ່ານ ດຣ. ກິແກ້ວ ຈັນທະບູຣີ ລັດຖະມົນຕີຊ່ວຍວ່າການກະຊວງແຜນການ ແລະ ການລົງທຶນ, ທ່ານ ຣາວີ ຊັນກາ ແອໂຊລາ (Ravi Shankar Aisola) ເອກອັກຄະລັດຖະທູດອິນເດຍປະຈຳລາວ, ສະພາການຄ້າປະເທດອິນເດຍ, ສະພາການຄ້າລາວ ພ້ອມດ້ວຍບັນດາບໍລິສັດຜູ້ໃຫ້ການສະໜັບສະໜູນ ແລະບັນດາສື່ມວນຊົນເຂົ້າຮ່ວມ.
ງານວາງສະແດງສິນຄ້າດັ່ງກ່າວຈັດຂຶ້ນໃນລະຫວ່າງວັນທີ 21-23 ມີນາ2016 ຊຶ່ງມີເກືອບ 40 ບໍລິສັດເຂົ້າຮ່ວມ ພ້ອມດຽວກັນນັ້ນພາຍໃນງານຍັງມີກອງປະຊຸມພົບປະຫາລືເພື່ອຫາຄູ່ຮ່ວມໃນການເຮັດທຸລະກິດ, ຊອກຊ່ອງທາງໃນການຄ້າຂາຍ ແລະການລົງທຶນຢູ່ລາວໂດຍປະກອບມີທັງບໍລິສັດການຄ້າ, ບໍລິສັດຜະລິດເສື້ອຜ້າ, ບໍລິສັດຜະລິດອາໄຫຼ່ລົດຕ່າງໆເຂົ້າມາເພື່ອຈະມາຈຳໜ່າຍສິນຄ້າຂອງເຂົາເຈົ້າໃນປະເທດອາຊຽນ.
ນອກນັ້ນຍັງຈະສ້າງກາລະໂອກາດໃຫ້ນັກລົງທຶນອິນເດຍກັບນັກລົງທຶນລາວໄດ້ພົບປະກັນວ່າຈະຮ່ວມມືກັນແນວໃດ, ເຮັດທຸລະກິດນຳກັນແນວໃດເພື່ອໃຫ້ຮູ້ວ່າມີຄວາມສາມາດຜະລິດທາງດ້ານໃດ, ມີຕະຫຼາດ ແລະມີທຶນຮອນແນວໃດຈຸດນີ້ຈະເປັນການສ້າງຄວາມສົນໃຈໃຫ້ແກ່ນັກລົງທຶນຂອງລາວເພາະນັກທຸລະກິດລາວຕ້ອງການຄູ່ຮ່ວມມືທີ່ມີຄວາມຮູ້ຄວາມສາມາດ, ມີທັງທຶນຮອນ, ເຕັກໂນໂລຢີ ແລະຕະຫຼາດນັ້ນຖືວ່າເປັນສິ່ງທີ່ດີສຳລັບທຸລະກິດ.
ທີ່ມາ: