ສຳນັກຂ່າວຕ່າງປະເທດລາຍງານຈາກນະຄອນ ບຣັດເຊລ ປະເທດ ເບລຢຽມ ເມື່ອວັນທີ 22 ມີນາ ທີ່ຜ່ານມາວ່າ ເກີດເຫດລະເບີດຮຸນແຮງ 2 ຄັ້ງ ໃກ້ກັບເຄົາເຕີ້ເຊັກອິນ ຂອງສາຍການບິນ ອາເມລິກັນ ແອຣ໌ໄລສ໌ ພາຍໃນບໍລິເວນຜູ້ໂດຍສານຂາອອກຂອງສະໜາມບິນນານາຊາດ ຊາເວນເທມ ໃນນະຄອນບຣັດເຊລ ເມື່ອຕອນເຊົ້າຂອງວັນອັງຄານຕາມເວລາທ້ອງຖິ່ນ ເປັນເຫດໃຫ້ມີຜູ້ເສຍຊີວິດຢ່າງໜ້ອຍ 14 ສົບ ແລະ ໄດ້ຮັບບາດເຈັບຫຼາຍກ່ວາ 64 ຄົນ.
ໃນເວລາໃກ້ຄຽງກັນກໍ່ມີເຫດລະເບີດເກີດຂຶ້ນທີ່ສະຖານີລົດໄຟໃຕ້ດິນ ມາລບີດ ໃກ້ກັບທີ່ຕັ້ງສຳນັກງານໃຫຍ່ຂອງສະຫະພາບຢູໂຣບ (ອີຢູ) ມີລາຍງານຜູ້ເສຍຊີວິດຢ່າງໜ້ອຍ 20ຄົນ ບາດເຈັບ 106 ຄົນ ໂດຍ 17ຄົນໃນຈຳນວນນີ້ມີອາການບາດເຈັບໜັກ ດ້ານຄະນະກຳມະທິການຢຸໂຣບ (ອີຊີ) ໄດ້ສັ່ງປິດສຳນັກງານຂອງອີຢູຢ່າງບໍ່ມີກຳນົດ ໂດຍຫ້າມບຸກຄົນເຂົ້າອອກຈົນກ່ວາຈະມີຄຳສັ່ງປ່ຽນແປງ ຕໍ່ມາລັດຖະບານເບລຢຽມສັ່ງປິດລະບົບການຂົນສົ່ງທາງບົກທັງໝົດໃນນະຄອນບຣັດເຊລ ບໍ່ວ່າຈະເປັນລົດປະຈຳທາງ ລົດໄຟ ແລະ ລົດໃຕ້ດິນ ພ້ອມທັງສັ່ງໃຫ້ປະຊາຊົນໃນເມືອງຫຼວງຢູ່ແຕ່ພາຍໃນເຮືອນ ແລະ ໄດ້ເພີ່ມກຳລັງທະຫານອອກຮັກສາຄວາມປອດໄພ ແລະ ຕັ້ງສູນປະສານງານໃນເຫດການສຸກເສີນເພື່ອຕິດຕາມສະພາບເຫດການຢ່າງໃກ້ຊິດ.
https://youtu.be/TIDqwP0UssQ
ແຫລ່ງຂ່າວຈາກ: ເວັບໄຊ໌ ເດລີນີວສ໌.ຄອມ