ສຳນັກຂ່າວຕ່າງປະເທດ ລາຍງານໃນວັນທີ 21 ມີນາຜ່ານມານີ້ວ່າ ທ່ານ ຖິ່ນຈໍ (Htin Kyaw) ວ່າທີ່ປະທານາທິບໍດີມຽນມາຄົນໃໝ່ ຊຶ່ງຈະເຂົ້າຮັບຕຳແໜ່ງຢ່າງເປັນທາງການ ໃນວັນທີ 1 ເມສານີ້ ໄດ້ກ່າວປາໄສຢູ່ກອງປະຊຸມລັດຖະສະພາມຽນມາວ່າ ລັດຖະບານມຽນມາຊຸດໃໝ່ ຈະຍຸບກົງຈັກການຈັດຕັ້ງ ກະຊວງຕ່າງໆລົງ 15 ກະຊວງ ຈາກທີ່ມີທັງໝົດ 36 ກະຊວງ ໃຫເຫລືອພຽງ 21 ກະຊວງ ເນື່ອງຈາກປັດຈຸບັນ ໜ່ວຍງານຂອງລັດຖະບານ ກະແຈກກະຈາຍ ແລະ ເຮັດວຽກຊ້ຳຊ້ອນກັນ ຊຶ່ງການຫລຸດຈຳນວນກະຊວງລົງ ຈະເຮັດໃຫ້ລັດປະຢັດເງິນເດືອນລັດຖະມົນຕີໄດ້ເຖິງ 4 ລ້ານໂດລາ ຕະຫລອດສະໄໝ 5 ປີຂ້າງໜ້ານີ້.

ແນວໃດກໍຕາມ ລັດຖະບານມຽນມາ ຈະບໍ່ມີນະໂນບາຍຫລຸດຈຳນວນພະນັກງານ-ລັດຖະກອນລົງ ພ້ອມທັງລະບຸວ່າ ທຸກຄົນບໍ່ຕ້ອງເປັນຫ່ວງກ່ຽວກັບການວ່າງງານ.