ເປໂຕບຣາສ ບໍລິສັດຜູ້ຜະລິດນ້ຳມັນຂອງລັດຢູ່ບຣາຊິນແຈ້ງຜົນປະກອບການຂາດທຶນຢ່າງໜັກນັບຕັ້ງແຕ່ກໍ່ຕັ້ງມາ ຊໍ້າເຕີມວິກິດການເມືອງ.
ເປໂຕບຣາສ ຊຶ່ງເປັນບໍລິສັດໃຫຍ່ສຸດຂອງບຣາຊິນແຈ້ງວ່າ ປີທີ່ຜ່ານມາຂາດທຶນ 9,6 ຕື້ໂດລາສະຫະລັດ ຫຼາຍທີ່ສຸດນັບຕັ້ງແຕ່ກໍ່ຕັ້ງໃນປີ 1953 ແລະ ຂາດທຶນເປັນປີທີ 2 ຕິດຕໍ່ກັນ ເນື່ອງຈາກລາຄານ້ຳມັນໂລກຫຼຸດລົງຢ່າງໜັກ ເງິນບຣາຊິນອ່ອນຄ່າ ແລະ ຄວາມໜ້າເຊື່ອຖືຂອງປະເທດຖືກບໍລິສັດຈັດອັນດັບທັງສາມແຫ່ງຫຼຸດເປັນອັນດັບຕໍ່າ ປະທານເຈົ້າໜ້າທີ່ບໍລິຫານກ່າວວ່າ ປີທີ່ຜ່ານມາເປັນປີທີ່ຍາກລ້ຳບາກທີ່ສຸດ ສຳລັບອຸດສາຫະກຳນ້ຳມັນໂດຍລວມ ຂະນະທີ່ຄະນະສືບສວນລະບຸວ່າ ຄະນະຜູ້ບໍລິຫານເປໂຕບຣາຄົບຄິດກັບຜູ້ຮັບເໝົາຄິດເງິນເກີນຈິງມາເກືອບທົດສະວັດ.
ຄະດີສໍ້ລາດບັງຫຼວງຂອງເປໂຕບຣາສ ສ້າງກະແສປະທ້ວງບໍ່ພໍ່ໃຈຕໍ່ທ່ານ ດິລມາ ຣຸສເຊຟ ປະທານາທິບໍດີບຣາຊິນ ເຮັດໃຫ້ກຸ່ມສະໜັບສະໜູນອອກມາສະແດງພະລັງເຊັ່ນກັນ ສ້າງຄວາມແຕກແຍກຂຶ້ນໃນປະເທດທີ່ມີປະຊາກອນ 200 ລ້ານຄົນ ແລະ ກຳລັງຈະເປັນເຈົ້າພາບມະຫະກຳໂອລິມປິກໃນເດືອນສິງຫານີ້.