ເຖິງແມ່ນວ່າເຈົ້າໜ້າທີ່ກ່ຽວຂ້ອງຂອງລັດເຂັ້ມງວດໃນການຈັດຕັ້ງປະຕິບັດກົດໝາຍພຽງໃດກໍຕາມ ແຕ່ສະ ພາບການເຄື່ອນຍ້າຍຄ້າຂາຍໄມ້ທີ່ບໍ່ຖືກຕ້ອງຢູ່ໃນຂອບເຂດທົ່ວປະເທດຍັງແພ່ລະບາດຢ່າງກວ້າງຂວາງເຮັດໃຫ້ລັດ ແລະ ປະຊາຊົນຕ້ອງສູນເສຍຜືນປ່າໃນແຕ່ລະປີເປັນຈຳນວນບໍ່ໜ້ອຍ ສະເພາະໃນໄລຍະ 6 ເດືອນຕົ້ນປີ 2013-2014 ເຈົ້າໜ້າທີ່ສາມາດຢຶດໄມ້ຜິດລະບຽບໄດ້ 8 ແສນກວ່າແມັດກ້ອນ ໃນຂອບເຂດທົ່ວປະເທດ.
ອີງຕາມບົດລາຍງານຂອງລັດຖະບານໃຫ້ຮຸູ້ວ່າ: ຕະຫຼອດໄລຍະຜ່ານມາລັດຖະບານເນັ້ນໃຫ້ກະຊວງກະສິກຳປ່າໄມ້ຂະແໜງການຄຸ້ມຄອງປ່າໄມ້ ແລະ ຊັບພະຍາກອນໄມ້ ເອົາໃຈໃສ່ປະຕິບັດຂໍ້ຕົກລົງ, ມະຕິຄຳສັ່ງກ່ຽວກັບໄມ້ ສະບັບເລກທີ 17/ນຍ ແລະ ຂໍ້ຕົກລົງ 32/ນຍ ໃນການຂຸດຄົ້ນໄມ້ໃນເຂດຫຼໍ່ແຫຼມ,ການບໍລິການໄມ້ໃຫ້ແຕ່ລະແຂວງໄປຕາມລະບຽບກົດໝາຍ, ສຶບຕໍ່ຕິດຕາມ ແລະ ຄຸ້ມຄອງຜະລິດປ່າເຂດລ້ອງຄາວລ້ອງຄານ ເມືອງພູກູດ, ເຂດນ້ຳໂມ້ ເມືອງໝອກ ແຂວງຊຽງຂວາງ, ຕິດຕາມ ແລະ ຄຸ້ມຄອງການເຄື່ອນຍ້າຍໄມ້ເຄື່ອງປ່າຂອງດົງພາຍໃນປະເທດໃຫ້ຖືກຕ້ອງຕາມລະບຽບພ້ອມທັງກະກຽມມອບແຜນປູກໄມ້ຟື້ນຟູປ່າເກັບກູ້ເຄື່ອງປ່າຂອງດົງໃຫ້ແຕ່ລະທ້ອງຖິ່ນຈັດຕັ້ງປະຕິບັດ.
ພ້ອມດຽວກັນນັ້ນ ແມ່ນເນັ້ນໃຫ້ພາກສ່ວນທີ່ກ່ຽວຂ້ອງໂຄສະນາເຜີຍແຜ່ກົດໝາຍ, ສຶກສາອົບຮົມປະຊາຊົນຜູ້ປະກອບການໃຫ້ເຂົ້າໃຈຄວາມສຳຄັນຕໍ່ວຽກງານປ່າໄມ້ໃນການຄຸ້ມຄອງປົກປັກຮັກສາປ່າໄມ້ເພື່ອໃຫ້ຂະບວນການລັກລອບຕັດໄມ້ທີ່ຝ່າຝືນລະບຽບກົດໝາຍ ປ່າໄມ້ໃຫ້ຄ່ອຍໆຫຼຸດລົງເທື່ອລະກ້າວ.
ຢ່າງໃດກໍຕາມ ໃນໄລຍະ 6 ເດືອນຕົ້ນປີ 2013-2014 ເຈົ້າໜ້າທີ່ສາມາດຢຶດ, ອາຍັດໄມ້, ເຄື່ອນຍ້າຍໄມ້ຜິດລະບຽບກົດໝາຍທັງໝົດ 35.217 ຕົ້ນຕໍ່ທ່ອນຕໍ່ຕັບຕໍ່ໂຕຕໍ່ແຜ່ນ ບໍລິມາດ 823.971 ແມັດກ້ອນ ໃນນັ້ນ ມີໄມ້ປະເພດຫວງຫ້າມ, ໄມ້ພິເສດ ແລະ ໄມ້ຄຸ້ມຄອງ1,2,3 ເຈົາໜ້າທີ່ບໍ່ພຽງແຕ່ຢຶດໄມ້ຜິດລະບຽບເທົ່ານັ້ນ ຍັງສາມາດຢຶດສິ່ງຕ່າງໆທີ່ຜິດລະບຽບເຊັ່ນ: ລົດ ຈຳນວນ 10 ຄັນ, ຢຶດສັດນ້ຳ ແລະ ສັດປ່າຈຳນວນທັງໝົດ 6 ຊະນິດ ມີນ້ຳໜັກທັງໝົດ 10,5 ກິໂລກຣາມ ແລະ ຊິ້ນສ່ວນສັດປ່າ 11 ຊະນິດ ມີນ້ຳໜັກທັງໝົດ 273 ກິໂລກຣາມ ໄດ້ກັກເຄື່ອງປ່າຂອງດົງຈຳນວນ 3 ຊະນິດ ນ້ຳໜັກ 47.547 ກິໂລກຣາມ ພ້ອມກັນນັ້ນ ກໍ່ໄດ້ເອົາໃຈໃສ່ປັບປຸງລະບຽບກົດໝາຍ.
ທີ່ມາ http://www.sedthakid.la/khao/18643.spc