ກອງປະຊຸມລັດຖະບານສະໄໝສາມັນ ປະຈຳເດືອນມີນາ ໄດ້ຈັດຂຶ້ນວັນທີ 15 ມີນາ 2016 ໂດຍເປັນປະທານຂອງທ່ານ ທອງສິງ ທຳມະວົງ ນາຍົກລັດຖະມົນຕີ ມີບັນດາທ່ານຮອງນາຍົກລັດຖະມົນຕີ ແລະ ສະມາຊິກລັດຖະບານເຂົ້າຮ່ວມ.
ໃນກອງປະຊຸມໄດ້ປຶກສາຫາລື ປະກອບຄຳຄິດຄຳເຫັນ ແລະ ຮັບຮອງເອົາທາງດ້ານຫຼັກການຕໍ່ບາງບັນຫາສຳຄັນດັ່ງນີ້: ໄດ້ພິຈາລະນາ ແລະ ເຫັນດີຮັບຮອງດຳລັດວ່າດ້ວຍວິຈິດສິນ ເພື່ອກຳນົດຫຼັກການ ລະບຽບການ ແລະ ມາດຕະການກ່ຽວກັບການຄຸ້ມຄອງ ຕິດຕາມ ກວດກາການຈັດຕັ້ງ ແລະ ການເຄື່ອນໄຫວວຽກງານວິຈິດສິນ.
ກອງປະຊຸມໄດ້ພິມຈາລະນາ ແລະ ເຫັນດີຮັບຮອງດຳລັດວ່າດ້ວຍການບັນເທີງ ເພື່ອກຳນົດຫຼັກການ ລະບຽບການ ແລະ ມາດຕະການກ່ຽວກັບການຄຸ້ມຄອງ ຕິດຕາມກວດກາການເຄື່ອນໄຫວກິດຈະການບັນເທີງ ເພື່ອໃຫ້ໄດ້ມາດຕະຖານ ມີຄວາມປອດໄພ ສະຫງົບ ເປັນລະບຽບຮຽບຮ້ອຍ ແນໃສ່ອະນຸຮັກ ສົ່ງເສີມສິລະປະ ວັດທະນະທຳ ແລະ ຮີດຄອງປະເພນີອັນດີງາມຂອງຊາດໃຫ້ມີຄວາມຍືນຍົງ.
ໃນປັດຈຸບັນ ຢາເສບຕິດກຳລັງເປັນໄພຄຸກຄາມຕໍ່ຄວາມໝັ້ນຄົງ ຄວາມສະຫງົບສຸກ ຄວາມປອດໄພ ແລະ ກົດໜ່ວງຖ່ວງດຶງຕໍ່ການພັດທະນາເສດຖະກິດ-ສັງຄົມຂອງຊາດ ສ້າງຄວາມເສຍຫາຍ ຄວາມສັບສົນວຸ້ນວາຍ ນຳເອົາຄວາມຫາຍະນະມາສູ່ສັງຄົມ ຄອບຄົວ ແລະ ຄົນຮຸ່ນສືບທອດ ທັງຍັງເປັນພາຫະນະເຊື່ອມຕໍ່ກໍ່ໃຫ້ເກີດມີອາຊະຍາກຳຂ້າມຊາດ ການສໍ້ລາດບັງຫຼວງ ສົ່ງຜົນກະທົບຕໍ່ບົດບາດພາບພົດຂອງການນຳພັກ-ລັດຖະບານ ສະນັ້ນ ກອງປະຊຸມຄັ້ງນີ້ຈຶ່ງພິຈາລະນາ ແລະ ເຫັນດີຮັບຮອງແຜນແມ່ບົດແຫ່ງຊາດ ວ່າດ້ວຍການຄວບຄຸມ ສະກັດກັ້ນ ແລະ ຕ້ານຢາເສບຕິດ (2016-2020) ເຊິ່ງແຜນແມ່ບົດແຫ່ງຊາດສະບັບນີ້ ປະກອບມີ 9 ແຜນງານ.
ແຫລ່ງຂ່າວຈາກ: 