ສະຫວັນໂລຈິສຕິກ ເປີດຂຶ້ນເປັນທາງການ ໂດຍຈະເປັນສ່ວນໜຶ່ງທີ່ເຮັດໃຫ້ ສປປ ລາວ ກາຍເປັນຂົງເຂດໃໝ່ ເພື່ອເຊື່ອມຕໍ່ຈາກ ປະເທດທີ່ບໍ່ມີທາງອອກສູ່ທະເລເປັນປະເທດເຊື່ອມໂຍງກັບພາກພື້ນ ແລະບັນດາປະເທດໃນໂລກ ໂດຍຈະເຮັດໃຫ້ການຂົນສົ່ງສິນຄ້າໄປຍັງປະເທດເປົ້າໝາຍສະດວກ ແລະວ່ອງໄວຂຶ້ນ.
ວັນທີ 15 ມີນາຜ່ານມາ ທີ່ເຂດເສດຖະກິດພິເສດສະຫວັນ-ເຊໂນ ແຂວງສະຫວັນນະເຂດ ໄດ້ມີພິທີເປີດເຂດໂລຈິສຕິກ ທ່າບົກຂອງບໍລິສັດສະຫວັນໂລຈິສຕິກ ຈຳກັດ ໂດຍການເຂົ້າຮ່ວມຂອງ ທ່ານ ດຣ. ສຸພັນ ແກ້ວມີໄຊ ເຈົ້າແຂວງໆສະຫວັນນະເຂດ, ທ່ານ ດຣ. ບຸນຈັນ ສິນທະວົງ ລັດຖະມົນຕີວ່າການກະຊວງໂຍທາທິການ ແລະຂົນສົ່ງ, ມີບັນດາກົມ, ພະແນກການ ແລະຜູ້ອຳນວຍການບໍລິສັດ ພ້ອມພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ດາວວອນ ພະຈັນທະວົງ ອຳນວຍການບໍລິສັດ ສະຫວັນໂລຈິສຕິກ ຈຳກັດ ກ່າວວ່າ: ໃນໄລຍະທຳອິດເຂດໂລຈິສຕິກແມ່ນໄດ້ລົງທຶນທັງໝົດ 24 ຕື້ກວ່າກີບ ຫຼື ປະມານ 3 ລ້ານ ໂດລາ, ມີເນື້ອທີ່ 2,2 ເຮັກຕາ, ມີອາຄານ ພ້ອມຫ້ອງການຕ່າງໆ, ເຄື່ອງຍົກຕູ້ບັນຈຸສິນຄ້າ, ລະບົບຄອມພິວເຕີ, ສ່ວນໃນໄລຍະທີ 2 ຄາດວ່າໃນ 5 ປີຕໍ່ໜ້າຈະໃຊ້ເນື້ອທີ່ປະມານ 11 ເຮັກຕາ ແລະໃນໄລຍະທີ 3 ປະມານ 20 ເຮັກຕາ.
ໃນໂລກປະຈຸບັນລະບົບໂລຈິສຕິກທີ່ທັນສະໄໝໄດ້ມີບົດບາດສຳຄັນທີ່ສຸດເປັນບ້ວງທີ່ຂາດບໍ່ໄດ້ໃນຕ່ອງໂສ້ຂອງການຈໍລະຈອນວັດຖຸພັນ ແລະສິນຄ້າໃນທຸກໆຂອດການຜະລິດທຸລະກິດຂອງບັນດາຫົວໜ່ວຍທຸລະກິດຕ່າງໆໃນໂລກປະຈຸບັນ, ລະບົບໂລຈິສຕິກທັນສະໄໝທີ່ໃຫ້ບໍລິການແຈກຢາຍສິນຄ້າໄດ້ຢ່າງວ່ອງໄວ ແລະຕົງຕໍ່ເວລາ ຊຶ່ງແມ່ນສິ່ງຈຳເປັນໃນໂລກສີວິໄລ ແລະເປັນສິ່ງທີ່ຕ້ອງການທີ່ສຸດສຳລັບບັນດາປະເທດກຳລັງພັດທະນານັບທັງ ສປປ ລາວ, ລະບົບໂລຈິສຕິກຈະຊ່ວຍປະຢັດລາຍຈ່າຍ, ຫຼຸດຕົ້ນທຶນການຜະລິດ, ປະຢັດເວລາ, ຈະຊ່ວຍເສດຖະກິດຂອງຊາດໄດ້ຮັບການພັດທະນາໄວຂຶ້ນ.
ຊຶ່ງການສ້າງຕັ້ງເຂດໂລຈິສຕິກທ່າບົກ (Logistic Land Port) ແຫ່ງນີ້ຂຶ້ນມາກໍເພື່ອເປັນການອຳນວຍຄວາມສະດວກໃນການນຳເຂົ້າ-ສົ່ງອອກສິນຄ້າການແຈກຢາຍສິນຄ້າ ແລະການບໍລິການອື່ນໆທີ່ກ່ຽວພັນ, ການບໍລິການດັ່ງ ກ່າວຈະນຳໄປສູ່ການຫຼຸດຜ່ອນຕົ້ນທຶນຄ່າຂົນສົ່ງ, ການສ້າງເຂດໂລຈິສຕິກຈະເປັນການປະກອບສ່ວນເຂົ້າໃນການພັດ ທະນາເສດຖະກິດ-ສັງຄົມຂອງປະເທດກໍຄືແຂວງສະຫວັນນະເຂດ ໂດຍໄດ້ກາຍເປັນໜໍ່ແໜງສຳຄັນໃນການພັດທະນາລະບົບໂລຈິສຕິກທີ່ທັນສະໄໝເທື່ອລະກ້າວ ທັງເປັນການສ້າງພາບພົດຄວາມເຊື່ອໝັ້ນໃຫ້ແກ່ບັນດາບໍລິສັດຕ່າງໆທັງພາຍໃນ ແລະຕ່າງປະເທດ ລວມໄປເຖິງການແຂ່ງຂັນກັບບັນດາປະເທດອື່ນໆທີ່ບໍ່ມີຊາຍແດນຕິດກັບທະເລ.
ການບໍລິການແມ່ນຈະບໍລິການເກັບ ມ້ຽນຕູ້ບັນຈຸສິນຄ້າ (Container), ການສ້ອມແປງຕູ້ບັນຈຸສິນຄ້າ, ຄ່ຽນຖ່າຍບໍລິການຈັດສົ່ງສິນຄ້າແບບຕູ້ດຽວ ແຕ່ມີຫຼາຍເຈົ້າຂອງສິນຄ້າໃນການບໍລິການຮູບແບບຕູ້ບັນຈຸສິນຄ້າດຽວຫຼາຍເຈົ້າຂອງສາມາດສົ່ງໄດ້ແຕ່ 1 ກິໂລກຣາມຫາ 25 ໂຕນ ຈາກເຂດໂລຈິສຕິກ ຈົນໄປເຖິງເຂດໄອຊີດີ ຫຼື ສູນພັກແຈກຢາຍສິນຄ້າຂອງກວາງໂຈ ປະເທດຈີນ, ຮ່າໂນ້ຍຫວຽດນາມ, ບາງກອກປະເທດໄທ, ກົວລາລຳເປີ ປະເທດມາເລເຊຍ ແລະ ປະເທດສິງກະໂປ ແລະຈາກສະຖານທີ່ເຫຼົ່ານັ້ນກັບຄືນມາເຂດໂລຈິສຕິກ ໂດຍມີລາຄາຕ່ຳກວ່າໃນລະດັບ 1 ສ່ວນ 3 ຂອງລາຄາປົກກະຕິໃນປະຈຸບັນ.
ທີ່ມາ: