ການນຳແຂວງບໍລິຄຳໄຊ ມອບອຸປະກອນການແພດໃຫ້ແກ່ໂຮງໝໍແຂວງ

ເພືອເປັນການສ້າງຂະບວນການຕ້ອນຮັບບັ້ນເລືອກຕັ້ງສະມາຊິກສະພາແຫ່ງຊາດ ຊຸດທີ VIII ແລະ ສະມາຊິກສະພາປະຊາຊົນແຂວງບໍລິຄໍາໄຊ ໃຫ້ມີຄວາມໝາຍເລິກເຊິ່ງ ໃນວັນທີ 15 ມີນາ 2016 ຄະນະນໍາແຂວງບໍລິຄຳໄຊ ນຳໂດຍທ່ານ ດຣ. ກອງແກ້ວ ໄຊສົງຄາມ ເຈົ້າແຂວງໆບໍລິຄຳໄຊ ພ້ອມດ້ວຍຄະນະໄດ້ນຳເອົາເຄື່ອງອຸປະກອນການແພດມາມອບໃຫ້ໂຮງໝໍແຂວງບໍລິຄຳໄຊ ປະກອບມີ ເຄື່ອງອົບເດັກນ້ອຍເກີດໃໝ່ຈຳນວນ 02 ເຄື່ອງ ໃນມູນຄ່າທັງໝົດ 34.000 ໂດລາສະຫະລັດ.

ພິທີມອບ-ຮັບ ໄດ້ມີຂຶ້ນລະຫວ່າງ ທ່ານ ດຣ. ກອງແກ້ວ ໄຊສົງຄາມ ໃຫ້ກຽດເປັນຜູ້ມອບໃຫ້ແກ່ ທ່ານ ດຣ. ບຸນຍັງ ພົມມະຈັນ ຜູ້ອຳນວຍການໂຮງໝໍແຂວງບໍລິຄຳໄຊ ໂດຍຊ້ອງໜ້າຄະນະນຳຂັ້ນແຂວງ ພ້ອມພະນັກງານແພດໝໍທີ່ເຂົ້າຮ່ວມ ໃນໂອກາດດັ່ງກ່າວ ທ່ານເຈົ້າແຂວງພ້ອມຄະນະ ຍັງໄດ້ຢ້ຽມຢາມຄົນເຈັບ ພ້ອມຖາມຄວາມເຈັບເປັນນໍາບຸກຄົນທີ່ເຂົ້ານອນປິ່ນປົວຢູ່ໂຮງໝໍ ດ້ວຍໄມຕີຈິດມິດຕະພາບຢ່າງອົບອຸ່ນ.

ຂ່າວ/ພາບ: ຄຳຟອງ

ແຫລ່ງຂ່າວຈາກ: ວິທະຍຸ-ໂທລະພາບນະຄອນຫຼວງ.