ໜ່ວຍງານການບິນພົນລະເຮືອນຟິລິບປິນບຸກເຈລະຈາສິດທິການບິນອາຊຽນເປີດທາງໃຫ້ສາຍການບິນພາຍໃນປະເທດບິນເຂົ້າເມືອງໃຫຍ່ ສປປ ລາວ, ອິນໂດເນເຊຍ ແລະ ໄທ ຫຼັງຈາກທ່ານ ອາກີໂນ ປະທານາທິບໍດີລົງນາມຮັບຂໍ້ 5 ແລະ 6 ຂໍ້ຕົກລົງບໍລິການທາງອາກາດພະຫຸພາຄີຂອງອາຊຽນ ພ້ອມເຈລະຈາອີຕາລີ ແລະ ການາດາເພີ່ມເສັ້ນທາງການບິນ.
ຕາມຂ່າວຕ່າງປະເທດລາຍງານວ່າ ຄະນະເຮັດວຽກທາງດ້ານການບິນຂອງຟິລິບປິນເຈລະຈາກັບລາວ, ອິນໂດເນເຊຍ ແລະ ໄທ ເພື່ອຂໍໃຊ້ສິດທິການບິນພາຍໃຕ້ຂໍ້ຕົກລົງບໍລິການທາງອາກາດພະຫຸພາຄີຂອງອາຊຽນ ໃຫ້ສາຍການບິນຟິລິບປິນບິນໄປນະຄອນຫຼວງ ແລະ ເມືອງອື່ນໆຂອງປະເທດໃນອາຊີ, ທ່ານ ກາເມໂລ ອາຊິລ່າ ຜູ້ອຳນວຍການຄະນະກຳມະການການບິນພົນລະເຮືອນກ່າວວ່າ ຄະນະກຳມະການໄດ້ສົ່ງຄຳຂໍເຈລະຈາສິດທິການບິນໄປໃຫ້ທາງການອິນໂດເນເຊຍ ແລະ ໄທ ຊຶ່ງເປັນສະມາຊິກອາຊຽນ ສ່ວນປະເທດນອກອາຊຽນໄດ້ສົ່ງຄຳຂໍເຈລະຈາໄປຍີ່ປຸ່ນ, ອິນເດຍ, ອິນຕາລີ ແລະ ການາດາ ໂດຍຄຳຂໍດັ່ງກ່າວພິຈາລະນາຈາກຄວາມສຳຄັນຂອງແຕ່ລະປະເທດໃນດ້ານທຸລະກິດການບິນ ຊຶ່ງທາງການຟິລິບປິນໄດ້ຮັບຄຳຂໍເຈລະຈາສິດທິການບິນແບບດຽວກັນຈາກລາວ ຊຶ່ງຄາດວ່າ ຈະມີການເຈລະຈາກັນໃນໄຕມາດ 2 ຂອງປີນີ້ ຊຶ່ງເປັນສິ່ງທີ່ຟິລິບປິນໃຫ້ຄວາມສົນໃຈຢູ່ແລ້ວ.
ການເຈລະຈາດັ່ງກ່າວເກີດຂຶ້ນຫຼັງຈາກຜູ້ນຳຟິລິບປິນໄດ້ລົງນາມຂໍ້ຕົກລົງຂໍ້ 5 ແລະ 6 ໃນກອບຂໍ້ຕົກລົງການບິນທາງອາກາດພະຫຸພາຄີອາຊຽນ ຊຶ່ງຈະເຮັດໃຫ້ສາຍການບິນຟິລິບປິນສາມາດບິນໄປຍັງນະຄອນຫຼວງ ແລະ ເມືອງອື່ນໆຂອງປະເທດອາຊຽນໄດ້ ໂດຍບໍ່ຈຳກັດຖ້ຽວບິນ ແລະ ສາຍການບິນປະເທດຄູ່ເຈລະຈາກໍ່ສາມາດເຮັດໄດ້ເຊັ່ນກັນ ຊຶ່ງຈະເຮັດໃຫ້ເກີດການແຂ່ງຂັນທາງດ້ານຄ່າປີ້ຍົນ ແລະ ການບໍລິການ.