ໃນລະຫວ່າງວັນທີ 4-5 ມີນາ ຜ່ານມາ, ທ່ານນາງ ຈັນທະຈອນ ວົງໄຊ ປະທານສະມາຄົມນັກທຸລະກິດແມ່ຍິງລາວ (ສທຍລ) ພ້ອມດ້ວຍຄະນະໄດ້ເດີນທາງໄປປະເທດຫວຽດນາມ ເພື່ອເຂົ້າຮ່ວມກອງປະຊຸມ ເຄືອຂ່າຍຜູ້ປະກອບການແມ່ຍິງອາຊຽນປະຈຳປີ 2016.
ເຂົ້າຮ່ວມກອງປະຊຸມຄັ້ງນີ້ ມີຜູ້ແທນ ແລະແຂກເຂົ້າຮ່ວມງານທັງໝົດ 500 ກວ່າຄົນຈາກຫົວໜ່ວຍທຸລະກິດຂະໜາດ ນ້ອຍ ແລະກາງ (SMEs) ຂອງບັນດາ 10 ປະເທດອາຊຽນ ໂດຍໃຫ້ກຽດເຂົ້າຮ່ວມເປັນປະທານກອງປະຊຸມຂອງທ່ານ Nguyen Thi Doan ຮອງປະທານປະເທດແຫ່ງ ສສ ຫວຽດນາມ, ທ່ານ ນາງ Pham Thi Hai Chuyen ລັດຖະມົນຕີກະຊວງແຮງງານ ແລະສະຫວັດດີການສັງຄົມ, ທ່ານ Vu Tien Loc ປະທານສະພາການຄ້າ ແລະອຸດສາຫະກຳຂອງ ສສ ຫວຽດນາມ ແລະປະທານສະພາການຄ້າ ແລະອຸດສາຫະກຳອາຊຽນ, ແລະທ່ານ Le Luong Minh ເລຂາທິການໃຫຍ່ອາຊຽນເຂົ້າຮ່ວມ.
ກອງປະຊຸມຄັ້ງນີ້ຈັດຂຶ້ນ ເພື່ອເສີມສ້າງຄວາມຮ່ວມມືແລກປ່ຽນ ແລະຍົກລະດັບການພັດທະນາເຄືອຂ່າຍຜູ້ປະກອບການແມ່ຍິງອາຊຽນ, ພ້ອມທັງສົ່ງເສີມການຄ້າ-ການລົງທຶນລະຫວ່າງຜູ້ປະກອບການແມ່ຍິງໃນຂົງເຂດອາຊຽນ ແລະກອບຄວາມຮ່ວມມືອາຊຽນ ໂດຍມີການນຳສະເໜີຜົນການດຳເນີນງານທີ່ກ່ຽວກັບຫົວຂໍ້ສົ່ງເສີມຜູ້ປະກອບການແມ່ຍິງໃນການພັດທະນາທີ່ກ້າວ ໜ້າສູ່ເສດຖະກິດອາຊຽນ.
ສະເພາະສະມາຄົມນັກທຸລະກິດແມ່ຍິງລາວໃນຖານະຜູ້ຮັບຜິດຊອບໜ່ວຍງານປະສານງານຫຼັກຂອງ AWEN ມີຄວາມມຸ່ງໝັ້ນທີ່ຈະສົ່ງເສີມການພັດທະນາຢ່າງຢັ້ງຢືນເນັ້ນການເຮັດວຽກຢ່າງມີຄວາມເຊື່ອມໂຍງ ແລະຫຼາກຫຼາຍ ເພື່ອປະໂຫຍດສູງສຸດຂອງສະມາຊິກ ແລະ ແມ່ຍິງຜູ້ປະກອບການທົ່ວປະເທດ, ພ້ອມດຽວກັນນັ້ນໃນກອງປະຊຸມດັ່ງກ່າວຍັງໄດ້ມອບລາງວັນໃຫ້ແກ່ແມ່ຍິງຜູ້ປະກອບການດີເດັ່ນຈຳນວນ 67 ທ່ານຈາກປະເທດສະມາຊິກອາຊຽນ.
ທີ່ມາ: