ສຳນັກຂ່າວຕ່າງປະເທດ ລາຍງານໃນວັນທີ 14 ມີນານີ້ວ່າ ເກີດເຫດລະເບີດຮຸນແຮງ ຢູ່ໃຈກາງນະຄອນຫລວງອັງກາຣາ ປະເທດຕວກີ ເມື່ອເວລາປະມານ 18:41 ໂມງ ຂອງວັນທີ 13 ມີນາ (ຕາມເວລາໃນທ້ອງຖິ່ນ) ໂດຍແຮງລະເບີດ ໄດ້ເຮັດໃຫ້ມີຜູ້ເສຍຊີວິດແລ້ວ ຢ່າງໜ້ອຍ 27 ຄົນ ແລະ ມີຜູ້ໄດ້ຮັບບາດເຈັບອີກກວ່າ 75 ຄົນ, ເຈົ້າໜ້າທີ່ຕຳຫລວດລະບຸວ່າ ອາດເປັນການກໍ່ເຫດໂຈມຕີ ດ້ວຍລະເບີດລົດຍົນແບບຂ້າຕົວຕາຍ ຊຶ່ງພາຍຫລັງເກີດເຫດ ເຈົ້າໜ້າທີ່ຕວກກີ ໄດ້ສັ່ງອົບພະຍົບປະຊາຊົນ ອອກຈາກພື້ນທີ່ອ້ອມຮອບຈຸດເກີດເຫດ ເພື່ອປ້ອງກັນການໂຈມຕີຊ້ຳ.
ທັງນີ້ ການໂຈມຕີກໍ່ການຮ້າຍຢູ່ເມືອງຫລວງຂອງຕວກກີ ຫລາຍຄັ້ງຜ່ານມາ ແມ່ນຈະຖືກເຊື່ອມໂຍງ ເປັນຝີມືຂອງກຸ່ມ Kurdistan Freedom Hawks ທີ່ມັກຈະອອກມາອ້າງ ເປັນຜູ້ຢູ່ເບື້ອງຫລັງເຫດລະເບີດ.
