ສຸດຍິ່ງໃຫຍ່! ໂຄຄາ-ໂຄລາ ຈັດການແຂ່ງຂັນບານເຕະນັກຮຽນສາມັນ ຢູ16 ຄັ້ງທີ 1 ມີຫຼາຍກວ່າ 100 ທີມທົ່ວ ນວ ເຂົ້າຮ່ວມຊີງໄຊ
ບໍລິສັດ ລາວ ໂຄຄາ-ໂຄລາ ບ໊ອດຕລິງ ຮ່ວມກັບ ສະຫະພັນບານເຕະນະຄອນຫຼວງວຽງຈັນ ຈັດການແຂ່ງຂັນບານເຕະນັກຮຽນສາມັນ ໂຄປາ ໂຄຄາ-ໂຄລາ ລາວ ລຸ້ນອາຍຸບໍ່ເກີນ 16 ປີຄັ້ງທໍາອິດ ຂຶ້ນຢ່າງຍິ່ງໃຫຍ່ຂື້ນ ລະຫວ່າງວັນທີ 10-31 ມີນານີ້ທີ່ ນະຄອນຫຼວງວຽງຈັນ ເຊິ່ງມີຫຼາຍກວ່າ 100 ທີມຈາກໂຮງຮຽນມັດທະຍົມໃນ 9 ຕົວເມືອງທົ່ວນະຄອນຫຼວງວຽງຈັນເຂົ້າຮ່ວມ.
ເມື່ອວັນທີ 10 ມີນາທີຜ່ານມາ ທີ່ເດີ່ນບານເຕະເຈົ້າອານຸວົງ ໄດ້ມີພິທີຖະແຫຼງຂ່າວ ແລະ ເປີດງານແຂ່ງຂັນຢ່າງເປັນທາງການ ເຊິ່ງໃຫ້ກຽດເປີດງານໂດຍ ທ່ານ ຄໍາສະຫວັນ ໂຄດໄຊ ຮອງຫົວໜ້າພະແນກສຶກສາທິການ ແລະ ກີລາ, ທ່ານ ມາກ ກຣິຟຟິນ ຜູ້ຈັດການທົ່ວໄປຂອງບໍລິສັດ ລາວ ໂຄຄາ-ໂຄລາ ບ໊ອດຕລິງ ຈໍາກັດ ແລະ ທ່ານ ວຽງສະຫວັນ ແສງຈັນ ປະທານສະຫະພັນບານເຕະນະຄອນຫຼວງວຽງຈັນ ພ້ອມດ້ວຍພາກສ່ວນຕ່າງໆເຂົ້າຮ່ວມ.
ຂະນະດຽວກັນ ທ່ານ ຫົງແກ້ວ ທໍາມະວົງ ຫົວໜ້າພະແນກສິລະປະ ແລະ ພະລະສຶກສາ ນະຄອນຫຼວງວຽງຈັນ ຂຶ້ນກ່າວລາຍງານວ່າ: ການແຂ່ງຂັນຄັ້ງນີ້ເລີ່ມແຂ່ງຂັນລະຫວ່າງວັນທີ 10-31 ມີນານີ້ ໂດຍໄດ້ຮັບການຮ່ວມມືຈາກບັນດາໂຮງຮຽນມັດທະຍົມ ແລະ ຄູອາຈານທີ່ສົ່ງທີມເຂົ້າຮ່ວມກິດຈະກໍາທັງໝົດ 134 ທີມໃນນັ້ນມີທີມຍິງ 41 ທີມ ແລະ ທີມຊາຍ 93 ທີມຈາກ 9 ຕົວເມືອງທົ່ວນະຄອນຫຼວງ ປະກອບມີ ເມືອງຈັນທະບູລີ ຊາຍ 15 ທີມ ແລະ ທີມຍິງ 6 ທີມ; ເມືອງໄຊເສດຖາ ຊາຍ 12 ທີມ ແລະ ຍິງ 5 ທີມ; ເມືອງສີສັດຕະນາກ ຊາຍ 10 ທີມ ແລະ ຍິງ 5 ທີມ; ເມືອງໄຊທານີ ຊາຍ 8 ທີມ ແລະ ຍິງ 8 ທີມ; ເມືອງປາກງຶ່ມ ຊາຍ 9 ທີມ ແລະ ຍິງ 9 ທີມ; ເມືອງຫາດຊາຍຟອງ ຊາຍ 6 ທີມ ແລະ ຍິງ 1 ທີມ; ເມືອງສີໂຄດຕະບອງ ຊາຍ 14 ທີມ; ເມືອງນາຊາຍທອງ ຊາຍ 14 ທີມ ແລະ ຍິງ 10 ທີມ; ເມືອງສັງທອງ ຊາຍ 5 ທີມ.
ສໍາລັບ ການແຂ່ງຂັນຈະຄັດເລຶອກຢູ່ສະໜາມໃຈກາງຂອງເມືອງຕ່າງແຂ່ງແບບເສຍຕົກຮອບທັນທີ ເພື່ອເອົາທີມທີດີທີ່ສຸດຕົວແທນຂອງແຕ່ລະເມືອງລະ 1 ທີມ ຈາກ 9 ຕົວເມືອງຈະໄດ້ ທີມຍິງ 9 ທີມ ແລະ ທີມຊາຍ 9 ທີມ ເຂົ້າມາແຂ່ງຂັນຮອບສຸດທ້າຍແຂ່ງຂັນແບບຮອບແບ່ງກຸ່ມຄັດເຂົ້າຮອບອີງຕາມກະຕິກາສາກົນ ທີ່ສະໜາມກາງເຈົ້າອານຸງວົງ ເຊິ່ງບານເຕະຊາຍໃຊ້ເວລາທັງໝົດ 90 ນາທີເຄິ່ງລະ 40 ນາທີ ແລະ ພັກເຄິ່ງ 10 ນາທີ ສ່ວນບານເຕະຍິງໃຊ້ຢູ່ 70 ນາທີເຄິ່ງລະ 30 ນາທີ ແລະ ພັກເຄິ່ງ 10 ນາທີ.
ຂ່າວຈາກ: ຫຼ້າເອັມເຄພີ
ພາບຈາກ: ອ໊ອດ ນີໂອສິກ
ແຫລ່ງຂ່າວຈາກເພສ: ຄວາມເຄື່ອນໄຫວ+ເຈາະເລິກ ຂ່າວສານກີລາລາວ-ສາກົນ