ອິນເດຍຈະເລີ່ມໃຊ້ມາດຕະການເພື່ອປົກປ້ອງປະຊາຊົນຈາກຄື້ນອາກາດຮ້ອນໃນສອງເມືອງພື້ນທີ່ສ່ຽງ ຫຼັງຈາກປີທີ່ຜ່ານມາມີຜູ້ເສຍຊີວິດໄປແລ້ວຢ່າງໜ້ອຍ 2.500 ຄົນ ເພາະຄື້ນອາກາດຮ້ອນທົ່ວປະເທດ.
ຕາມຂ່າວຕ່າງປະເທດລາຍງານວ່າ ອິນເດຍຈະເລີ່ມໃຊ້ມາດຕະການເພື່ອປົກປ້ອງ ແລະ ຄຸ້ມຄອງປະຊາຊົນຂອງຕົນໃຫ້ລອດພົ້ນຈາກໄພພິບັດຄື້ນອາກາດຮ້ອນ ຊຶ່ງເຄີຍມີຜູ້ເສຍຊີວິດທົ່ວປະເທດໃນປີ 2015 ທີ່ຜ່ານມາຫຼາຍເຖິງ 2.500 ຄົນ ໂດຍມາດຕະການປ້ອງກັນປະກອບມີ: ການພະຍາກອນອາກາດລ່ວງໜ້າ 7 ມື້, ການຈັດຫານ້ຳສຳຮອງທີ່ຜອ່ນຄາຍຄວາມຮ້ອນ ແລະ ໄລຍະເວລາພັກກາງເວັນສຳລັບກຳມະກອນ ແລະ ຫວັງວ່າຈະຊ່ວຍກຳມະກອນນັບລ້ານຄົນໃຫ້ປອດໄພໃນໄລຍະຄື້ນອາກາດຮ້ອນ.
ລັດຖະບານອິນເດຍໄດ້ຮ່ວມມືກັບຄະນະກຳມະການປ້ອງກັນຊັບພະຍາກອນແຫ່ງຊາດ ຊຶ່ງຕັ້ງຢູ່ນະຄອນນິວຢອກຂອງອາເມລິກາ ໃນການວາງແຜນມາດຕະການປ້ອງກັນນີ້ ໂດຍລະບຸວ່າ ຈະເລີ່ມໃຊ້ມາດຕະການນີ້ໃນອາທິດໜ້າຢູ່ທີ່ເມືອງບູບັນເນສຊວາທາງພາກຕາເວັນອອກຂອງອິນເດຍ ແລະ ເມືອງນາດປຸຣະທາງຕາເວັນຕົກຂອງອິນເດຍສອງເມືອງໃນພື້ນທີ່ສ່ຽງຂອງຄື້ນອາກາດຮ້ອນ ຊຶ່ງໃນເດືອນກຸມພາປີທີ່ຜ່ານມາເຄີຍວັດແທກອຸນຫະພູມໄດ້ສູງເຖິງ 47 ອົງສາເຊ.
ຂໍ້ມູນຈາກ http://www.sedthakid.la/