ສຳນັກຂ່າວຕ່າງປະເທດ ລາຍງານໃນວັນທີ 10 ມີນານີ້ວ່າ ໃນມື້ວານນີ້ (9 ມີນາ) ທ່ານ ຫວາງອີ້ ລັດຖະມົນຕີວ່າການກະຊວງການຕ່າງປະເທດຈີນ ແລະ ທ່ານ ຈອນ ແຄຣີ ຄູ່ຕຳແໜ່ງສະຫະລັດອາເມຣິກາ ໄດ້ມີການໂອ້ລົມກັນທາງໂທລະສັບ ກ່ຽວກັບສະພາບການຢູ່ແຫລມເກົາຫລີ ໂດຍທາງຝ່າຍຈີນໄດ້ຮຽກຮ້ອງ ໃຫ້ບັນດາຝ່າຍທີ່ກ່ຽວຂ້ອງ ມີທ່າທີທຸ່ນທ່ຽງ, ລະງັບໃຈ ແລະ ບໍ່ປະໃຫ້ເກີດການກະທຳເກາະຜິດເຊິ່ງກັນ ແລະ ກັນ.
ທັງນີ້ ການໂອ້ລົມທາງໂທລະສັບ ຖືກດຳເນີນໄປໃນສະພາບທີ່ ທະຫານກອງທັບສະຫະລັດອາເມຣິກາ ແລະ ເກົາຫລີໃຕ້ ກຳລັງດຳເນີນການຊ້ອມຮົບຮ່ວມກັນ, ພາຍຫຼັງທີ່ເກົາຫລີເໜືອ ດຳເນີນການທົດລອງນິວເຄລຍຄັ້ງທີ 4 ເມື່ອເດືອນມັງກອນທີ່ຜ່ານມາ ແລະ ມີການຍິງລູກສອນໄຟສົ່ງດາວທຽມ ເມື່ອເດືອນກຸມພາຜ່ານມານີ້.