ຂປລ. ໃນວັນທີ 10 ມີນາ ນີ້ ທີ່ຫ້ອງວ່າການລັດຖະບານ ທ່ານ ທອງສິງ ທໍາມະວົງ ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຄໍານັບຂອງທ່ານ ຕາເກຊິ ຮິກີຮາຣະ ເອກອັກຄະຣາຊະທູດວິສາມັນຜູ້ມີອໍານາດເຕັມ ແຫ່ງ ປະເທດຍີ່ປຸ່ນ ຄົນໃໝ່ ປະຈໍາ ສປປ ລາວ ໃນໂອກາດທີ່ໄດ້ຖືກແຕ່ງຕັ້ງໃຫ້ມາດໍາລົງຕໍາແໜ່ງ ເປັນເອກອັກຄະຣາຊະທູດຄົນໃໝ່ ປະຈໍາ ສປປ ລາວ ພາຍຫລັງ ທີ່ໄດ້ຍືນສານຕາຕັ້ງຕໍ່ທ່ານ ຈູມມາລີ ໄຊຍະສອນ ປະທານປະເທດ ແຫ່ງສປປ ລາວ ເມື່ອທ້າຍເດືອນຜ່ານມາ.
ໃນໂອກາດດັ່ງກ່າວ, ທ່ານ ທອງສິງ ທໍາມະວົງ ໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງຕໍ່ທ່ານ ຕາເກຊິ ຮິກີຮາຣະ ທີ່ໄດ້ຖືກມອບໝາຍຈາກລັດຖະບານ ແລະ ປະຊາຊົນຍີ່ປຸ່ນ ໃຫ້ມາປະຕິບັດໜ້າທີ່ການທູດ ຢູ່ ສປປ ລາວ ໃນຄັ້ງນີ້ ເຊິ່ງເປັນການປະກອບສ່ວນອັນສໍາຄັນເຂົ້າໃນການເສີມຂະຫຍາຍສາຍພົວພັນ ມິດຕະພາບ ແລະ ການຮ່ວມມື ລະຫວ່າງ ສອງປະເທດ ລາວ–ຍີ່ປຸ່ນ ໃຫ້ຈະເລີນງອກງາມຍິ່ງຂຶ້ນ. ພ້ອມດຽວກັນ, ກໍໄດ້ສະແດງຄວາມຂອບໃຈຕໍ່ການຊ່ວຍເຫລືອດ້ານ ການພັດທະນາຂອງລັດຖະບານຍີ່ປຸ່ນ ໃນຊຸມປີຜ່ານມາ ເຊິ່ງໄດ້ປະກອບສ່ວນສໍາຄັນເຂົ້າໃນການພັດທະນາເສດຖະກິດ–ສັງຄົມ ຂອງ ສປປ ລາວ ກໍຄືການຊ່ວຍເຫລືອ ສປປ ລາວ ໃນໂອກາດເປັນປະທານອາຊຽນປີ 2016 ນີ້, ພ້ອມຍິນດີໃຫ້ການຮ່ວມມື ແລະ ອໍານວຍຄວາມສະດວກ ໃຫ້ແກ່ທ່ານທູດຄົນໃໝ່ ໃນການປະຕິບັດໜ້າທີ່ຢູ່ ສປປ ລາວ.
ພ້ອມດຽວກັນນີ້, ທ່ານ ຕາເກຊິ ຮິກີຮາຣະ ກໍໄດ້ສະແດງຄວາມຂອບໃຈ ຕໍ່ທ່ານ ທອງສິງ ທໍາມະວົງ ທີ່ໄດ້ສະຫລະເວລາໃຫ້ການຕ້ອນຮັບອັນອົບອຸ່ນໃນຄັ້ງນີ້. ພ້ອມຢືນຢັນຈະສືບຕໍ່ໃຫ້ການສະໜັບສະໜູນຊ່ວຍເຫລືອ ສປປ ລາວ ແລະ ຈະຕັ້ງໜ້າປະຕິບັດໜ້າທີ່ວຽກງານຂອງຕົນ ສຸດຄວາມສາມາດ ໃນໄລຍະທີ່ມາປະຕິບັດໜ້າທີ່ການທູດ ຢູ່ ສປປ ລາວ.
ແຫລ່ງຂ່າວ:
