ເຈສສິກ້າ ຄອດຊ໌ ຊາວອາເມລິກັນໄວ 33 ປີ ຈາກລັດແອຣິໂຊນາ ພິການແຂນທັງສອງຂ້າງຕັ້ງແຕ່ກຳເນີດ ໂດຍທີ່ແພດກໍ່ບໍ່ສາມາດຮູ້ສາເຫດ ຢ່າງໃດກໍ່ຕາມ ເຈສສິກ້າ ບໍ່ຍອມໃຫ້ຄວາມພິການເປັນອຸປະສັກໃນການເດີນຕາມຄວາມຝັນຂອງຕົນເອງ ຈົນໃນທີ່ສຸດນາງໄດ້ຮັບການບັນທຶກໃນກິນເນສສ໌ບຸ໊ກ ອອຟ ເວີລ໌ ເຣດຄອດສ໌ ໃຫ້ເປັນນັກບິນບໍ່ມີແຂນຄົນທຳອິດຂອງໂລກ.
ເຈສສິກ້າ ເລ່າວ່າ ການເຕີບໃຫຍ່ຂຶ້ນມາໂດຍບໍ່ມີແຂນມັນເປັນເລື່ອງທີ່ບໍ່ງ່າຍເລີຍ
ເພາະວ່າຈະໄປທາງໃດນາງມັກຕົກເປັນເປົ້າສາຍຕາຂອງຄົນອື່ນ ການມີຮ່າງກາຍທີ່ບໍ່ສົມປະກອບເຮັດໃຫ້ນາງຕ້ອງຜ່ານຜ່າຊ່ວງເວລາອັນຍາກລຳບາກທີ່ໂຮງຮຽນ ມັກຖືກເພື່ອນເວົ້າເຢື້ອຍ ແລະ ຖືກຄູຫ້າມບໍ່ໃຫ້ຫຼິ້ນເໝືອນເດັກນ້ອຍຄົນອື່ນໆ ເຊິ່ງນັ້ນເຮັດໃຫ້ ເຈສສິກ້າ ເສຍໃຈຫຼາຍເພາະນາງຢາກເຮັດທຸກຢ່າງໄດ້ເໝືອນເພື່ອນໆຂອງນາງ.
ຂະນະດຽວກັນ ເຈສສິກ້າ ກໍ່ຮຽນຮູ້ທີ່ຈະໃຊ້ຂາແທນແຂນແຕ່ຕອນຍັງນ້ອຍ ນາງໃຊ້ຂາທັງສອງຂ້າງເຮັດກິດຈະກຳປະຈຳວັນໄດ້ຢ່າງຄ່ອງແຄ້ວ.
ຄອບຄົວກໍ່ສະໜັບສະໜູນໃຫ້ເຈສສິກ້າເຮັດກິດຈະກຳຕ່າງໆ ເໝືອນຄົນທົ່ວໄປ ບໍ່ວ່າຈະເປັນການຮຽນເຕັ້ນ, ຫຼິ້ນຢີມນາສຕິກ, ລອຍນ້ຳ, ເປຍໂນ ແລະ ເທຄວັນໂດ ເຊິ່ງນາງໄດ້ສາຍດຳເທຄັວນໂດຄັ້ງທຳອິດເມື່ອຕອນນາງອາຍຸໄດ້ 14 ປີ ແລະ ຊ່ວງເວລາດຽວກັນນາງຕັດສິນໃຈເລີກໃຊ້ແຂນທຽມເລີຍ ນອກຈາກນີ້ນາງຍັງຂັບລົດໄດ້ອີກດ້ວຍ.
ຄວາມຝັນເລື່ອງຂັບເຮືອບິນຂອງເຈສສິກ້າເລີ່ມຂຶ້ນຫຼັງຈາກທີ່ນາງໄດ້ມີໂອກາດນັ່ງເຮືອບິນນ້ອຍລຳໜຶ່ງ ເຖິງຈະເປັນສິ່ງທີ່ນາງຢ້ານ ແຕ່ ເຈສສິກ້າ ກໍ່ບອກກັບຕົວເອງວ່າຈະຕ້ອງເອົາຊະນະຄວາມຢ້ານແລ້ວຂັບເຮືອບິນທະຍານຂຶ້ນສູ່ທ້ອງຟ້າໃຫ້ໄດ້ ນາງໃຊ້ເວລາ 3 ປີ ໃນການຮຽນຂັບເຮືອບິນ ເຊິ່ງບໍ່ແມ່ນເລື່ອງງ່າຍເລີຍ ເພາະເຮືອບິນແມ່ນຖືກສ້າງມາເພື່ອປັງຄັບດ້ວຍມື ແຕ່ຄວາມມານະບາກບັ່ນກໍ່ເຮັດໃຫ້ນາງໄດ້ຮັບໃບອະນຸຍາດຂັບເຮືອບິນ ແລະ ພໍ່ແມ່ເປັນຜູ້ໂດຍສານຄົນທຳອິດຂອງນາງ ໂດຍໃນປີ 2011 ເຈສສິກ້າ ໄດ້ຮັບລາງວັນ ກິນເນສສ໌ບຸ໊ກ ອອຟ ເວີລ໌ ເຣດຄອດສ໌ ໃຫ້ເປັນນັກບິນບໍ່ມີແຂນຄົນທຳອິດຂອງໂລກ.
ສ່ວນເປົ້າໝາຍຂັ້ນຕໍ່ໄປຂອງເຈສສີກ້າ ຄືການຂັບເຮືອບິນຮອບໂລກ ເພື່ອສ້າງແຮງບັນດານໃຈໃຫ້ກັບຜູ້ອື່ນ ໂດຍສະເພາະກັບຜູ້ພິການ ເພື່ອໃຫ້ເຫັນວ່າ ພວກເຂົາມີຄວາມສາມາດທີ່ຈະເຮັດຄວາມຝັນໃຫ້ສຳເລັດໄດ້ເຊັ່ນດຽວກັນ.