ວັນທີ 29 ເມສານີ້, ຢູ່ໂຮງ ແຮມແລນມາກແມ່ຂອງລີເວີໄຊ, ນະຄອນຫລວງ ວຽງຈັນ, ທ່ານ ບຸນຍັງ ວໍລະຈິດ ຮອງປະ ທານ ປະເທດແຫ່ງ ສປປ ລາວ ໄດ້ ຕ້ອນ ຮັບ ແລະ ຈັດງານລ້ຽງອາຫານທ່ຽງເປັນກຽດແກ່ສົມເດັດພະເທບຣັດຣາຊະສຸດາ ສະ ຫຍາມບໍຣົມມະຣາຊະກຸມາລີແຫ່ງຣາຊະອານາຈັກໄທ ພ້ອມດ້ວຍຄະນະ, ໃນ ໂອກາດເດີນທາງມາຢ້ຽມຢາມ ສປປ ລາວ ແຕ່ ວັນທີ 29-30 ເມສານີ້.
ໃນໂອກາດດັ່ງກ່າວ, ທ່ານ ຮອງປະທານປະເທດ ບຸນຍັງ ວໍລະຈິດ ໄດ້ສະແດງ ຄວາມຍິນດີຕ້ອນຮັບຊົມເຊີຍ ແລະ ຕີລາຄາ ສູງມາຍັງສົມເດັດພະເທບຣັດຣາຊະສຸດາ ສະຫຍາມບໍຣົມມະຣາຊະກຸມາລີ ພ້ອມ ດ້ວຍຄະນະທີ່ ໄດ້ເດີນທາງມາຢ້ຽມຢາມ ສປປ ລາວ ໃນຄັ້ງນີ້ ຊຶ່ງເປັນການປະກອບສ່ວນສຳຄັນເຂົ້າໃນການຮັດແໜ້ນສາຍ ພົວພັນ ແລະ ການຮ່ວມມືລະຫວ່າງສອງປະ ເທດ ສປປ ລາວ ແລະ ຣາຊະອານາຈັກໄທໃຫ້ນັບມື້ໄດ້ຮັບການເສີມຂະຫຍາຍ, ພ້ອມນີ້ ທ່ານຮອງປະທານປະເທດຍັງໄດ້ ອວຍພອນໃຫ້ສົມເດັດພະເທບຣັດຣາຊະສຸດາສະຫຍາມບໍຣົມຣາຊະກຸມາລີ ພ້ອມ ຄະນະຈົ່ງປະສົບຜົນສຳເລັດຢ່າງຈົບງາມໃນ ການເຄື່ອນໄຫວຢ້ຽມຢາມ ສປປ ລາວ ໃນຄັ້ງນີ້.
ໃນໂອກາດນີ້, ສົມເດັດພະເທບຣັດຣາຊະສຸດາ ສະຫຍາມບໍ ຣົມມະຣາຊະກຸມາລີ ກໍໄດ້ກ່າວສະແດງຄວາມຂອບໃຈຕໍ່ ການຕ້ອນຮັບອັນອົບອຸ່ນຂອງທ່ານຮອງປະທານປະເທດ ແລະ ໄດ້ແຈ້ງໃຫ້ຊາບກ່ຽວກັບແຜນການເຄື່ອນໄຫວໃນໄລຍະຢ້ຽມ ຢາມ ສປປ ລາວ ເປັນເວລາ 2 ວັນນັ້ນ, ສົມເດັດພະເທບຣັດຣາຊະສຸດາ ສະຫຍາມບໍຣົມມະຣາຊະກຸມາລີ ໄດ້ເຂົ້າຮ່ວມພິທີ ເປີດກົງສູນໃຫຍ່ແຫ່ງຣາຊະອານາຈັກໄທ ປະຈຳແຂວງສະຫວັນນະເຂດ ແລະ ຢ້ຽມຢາມສູນພັດທະນາ ແລະ ບໍລິການກະ ສິກຳ (ໜອງເຕົ່າ) ບ້ານໂພນສິມ ເມືອງໄກສອນພົມວິຫານແຂວງສະຫວັນນະເຂດ; ເຂົ້າຮ່ວມພິທີສະເຫລີມສະຫລອງການ ສ້າງຕັ້ງສູນພັດທະນາ ແລະ ບໍລິການດ້ານກະສິກຳຫ້ວຍຊອນ-ຫ້ວຍຊົ້ວຄົບຮອບ 20 ປີ ຢູ່ນະ ຄອນຫລວງວຽງຈັນ; ໃນຕອນ ແລງວັນດຽວກັນກໍໄດ້ເດີນທາງໄປຢ້ຽມຢາມແຂວງຫລວງພະບາງ. ສຳລັບຕອນເຊົ້າວັນທີ 30 ເມສາຊຶ່ງເປັນມື້ທີ 2 ຂອງການ ຢ້ຽມຢາມສົມເດັດພະເທບຣັດຣາຊະສຸດາ ສະຫຍາມບໍຣົມ ມະຣາ ຊະກຸມາລີ ຈະໄດ້ໄປໃສ່ບາດທີ່ ວັດແສນ, ວາງດອກໄມ້ ແລະ ຜ້າໄກ ຢູ່ຕໍ່ໜ້າພະພຸດທະຮູບ (ພະ ບາງ) ພ້ອມທັງຈະໄດ້ມອບເງິນ ເພື່ອບຳລຸງຮັກສາຫໍພະບາງ ແລະ ຢ້ຽມຊົມຕະຫລາດ ເຊົ້າທ່າເຮືອເມ. ຈາກນັ້ນ ກໍຈະໄດ້ເດີນທາງໄປແຂວງອຸດົມໄຊເພື່ອໄປຢ້ຽມຢາມໂຄງການປູກຜັກປອດສານພິດບ້ານຫ້ວຍອຸ່ນ ເມືອງໄຊ ແລະ ຢ້ຽມຢາມໂຮງໝໍແຂວງອຸດົມໄຊ, ໂຮງຮຽນກິນນອນຊົນເຜົ່າເພື່ອມອບອຸປະກອນການສຶກສາ, ເຄື່ອງກິລາ, ຢາ ປົວພະຍາດ ແລະ ອື່ນໆ.
ທີ່ມາ http://laophatthananews.blogspot.com/2014/04/blog-post_151.html