ສຸລິຍະຄາດ, ອາຄາດສູນຕາເວັນ, ສຸຍະອຸປະລາຄາ (ສຸລິຍຸບປະລາຄາ) ຫຼື ບາງຄົນເວົ້າແບບພາສາພື້ນບ້ານວ່າ ກົບກິນຕາເວັນ ຈະວ່າຈັ່ງໃດກໍຕາມ, ແຕ່ຜູ້ອ່ານຮູ້ຫຼືຍັງວ່າ ເຫດການທາງທຳມະຊາດນີ້ມັນເກີດຂຶ້ນໄດ້ຈັ່ງໃດ ມື້ນີ້ເຮົາມາຮຽນຮູ້ນຳກັນແບບສັ້ນໆ ງ່າຍໆ ດັ່ງນີ້:
ສຸລິຍຸບປະລາຄາເກີດຈາກການທີ່ດວງເດືອນໂຄຈອນເຂົ້າມາບັງແສງແດດຈາກດວງຕາເວັນທີ່ສ່ອງລົງມາພື້ນໂລກ ເຮັດໃຫ້ພື້ນທີ່ໜ້າດິນບໍລິເວນເງົາຂອງດວງເດືອນມືດລົງ ຄືການທີ່ດວງເດືອນເຄື່ອນທີ່ມາບັງຕາເວັນນັ້ນເອງ ຈະເກີດຂຶ້ນ ເມື່ອຕາເວັນ-ດວງເດືອນ-ໂລກ ໂຄຈອນມາຢູ່ໃນເສັ້ນຊື່ດຽວກັນ ໂດຍດວງເດືອນຢູ່ເຄິ່ງກາງລະຫວ່າງໂລກກັບຕາເວັນ.
