ວັນທີ 7 ມີນາ 2016 ສູນກາງສະຫະພັນແມ່ຍິງລາວ ຮ່ວມກັບຄະນະແມ່ເຮືອນລາວ ໄດ້ຈັດງານສະເຫຼີມສະຫຼອງວັນແມ່ຍິງສາກົນຄົບຮອບ 106 ປີ ຂຶ້ນທີ່ສູນການຄ້າລາວ-ໄອເຕັກ ໂດຍເປັນກຽດເຂົ້າຮ່ວມງານຂອງທ່ານ ດຣ.ນາງ ແກ້ວສາຍໃຈ
ໄຊຍະສອນ ພັນລະຍາ ທ່ານປະທານປະເທດ, ປະທານແມ່ເຮືອນລາວ, ພ້ອມດ້ວຍ ບັນດາທ່ານຜູ້ນຳພັກ-ລັດ, ສະພາແຫ່ງຊາດ, ອົງການແນວລາວສ້າງຊາດ, ອົງການຈັດຕັ້ງ ມະຫາຊົນ, ບັນດາທ່ານພະນັກງານປະຕິວັດອາວຸໂສ ແລະພາກສ່ວນທີ່ກ່ຽວຂ້ອງອື່ນໆເຂົ້າຮ່ວມ.
ທ່ານ ດຣ. ນາງ ອິນລາວັນ ແກ້ວບຸນພັນ ກຳມະການສູນກາງພັກ, ປະທານຄະນະບໍລິຫານງານສູນກາງສະຫະພັນແມ່ຍິງລາວ ໄດ້ກ່າວຕໍ່ງານວ່າ: ວັນແມ່ຍິງສາກົນ ແມ່ເຫດການໜຶ່ງທີ່ເກີດຂຶ້ນໃນທ່າມກາງສະພາບເສດຖະກິດຂອງພວກສັກດີນາ ແລະນາຍທຶນຂະຫຍາຍຕົວ, ເມື່ອໂຮງງານອຸດສາຫະກຳຂອງນາຍທຶນຂະຫຍາຍຕົວມັນໄດ້ສ້າງຄວາມຮັ່ງມີໃຫ້ແກ່ພວກນາຍທຶນ, ແຕ່ຊ້ຳພັດຍິ່ງເພີ່ມຄວາມທຸກຍາກລຳບາກໃຫ້ແກ່ຊາວຜູ້ອອກແຮງງານ ໂດຍສະເພາະກຳມະກອນແມ່ຍິງຢູ່ພາຍໃຕ້ລະບອບສັກດີນາ ແລະນາຍທຶນ, ແມ່ຍິງຖືກກົດຂີ່ຂູດຮີດຢ່າງໜັກໜ່ວງ, ເຮັດວຽກຫຼາຍຊົ່ວໂມງ ແຕ່ໄດ້ຮັບຄ່າຈ້າງແຮງງານດ້ວຍລາຄາຖືກ, ເຮັດວຽກບໍ່ມີການຮັບປະກັນ, ບໍ່ມີລະບອບປົກປັກຮັກສາສຸຂະພາບຂອງແມ່ຍິງ ແລະເດັກນ້ອຍ, ພ້ອມນັ້ນ ແມ່ຍິງຍັງຖືກດູຖູກໝິ່ນປະໝາດ, ຖືເປັນຄືສິນຄ້າ, ເປັນເຄື່ອງຫຼິ້ນ, ຖືກເຕະຕີ, ຖືກຂົ່ມຂືນທຳສຳເລົາ ແລະຖືກໄລ່ອອກ ຈາກວຽກ, ນອກນັ້ນ ໃນເວລາຖືພາ, ເວລາເກີດລູກ ຫຼື ເວລາເຈັບເປັນກໍບໍ່ໄດ້ຮັບການປິ່ນປົວ.
ເມື່ອເປັນແນວນັ້ນ ຕໍ່ມາບັນດາແມ່ຍິງຢູ່ໃນໂຮງງານຕ່ຳແຜ່ນ ແລະຕັດຫຍິບທີ່ເມືອງນິວຢອກ ສະຫະລັດອາເມລິກາ ຈຶ່ງໄດ້ຈັດຕັ້ງໂຮມຊຸມນຸມປະທ້ວງ ເພື່ອທວງເອົາສິດຂອງຕົນ, ຈົນມາເຖິງເດືອນກຸມພາ 1909 ແມ່ຍິງອາເມລິກາ ໄດ້ຈັດພິທີສະຫຼອງວັນແມ່ຍິງສາກົນເປັນເທື່ອທຳອິດ, ຕົກມາໃນປີ 1910 ຂະບວນການຕໍ່ສູ້ຂອງແມ່ຍິງ ໄດ້ແຜ່ຂະຫຍາຍກວ້າງອອກໄປສູ່ປະເທດນາຍທຶນ ແລະໃນປີດຽວກັນນີ້ເອງກອງປະຊຸມສາກົນກ່ຽວກັບບັນຫາແມ່ຍິງຄັ້ງທຳອິດໄດ້ຈັດຂຶ້ນຢູ່ໂກເປນຮາກ ນະຄອນຫຼວງ
ຂອງປະເທດເດນມາກ, ຊຶ່ງກອງປະຊຸມດັ່ງກ່າວໄດ້ຮັບຮອງ ແລະຕົກລົງເອົາວັນທີ 8 ມີນາຂອງທຸກປີ ເປັນວັນແມ່ຍິງສາກົນ, ທີ່ເປັນເຫດການ-ການເມືອງສຳຄັນ, ເປັນຂີດໝາຍແຫ່ງໄຊນະນະອັນພື້ນຖານຂອງຂະບວນການແມ່ຍິງສາກົນ ໃນການຕໍ່ສູ້ທວງເອົາສິດຜົນປະໂຫຍດອັນເປັນທຳໃຫ້ແກ່ແມ່ຍິງຊາວຜູ້ອອກແຮງງານໃນທົ່ວໂລກ ແລະເປັນວັນລະນຶກເຖິງການຕໍ່ສູ້ຂອງແມ່ຍິງ ເພື່ອປົດປ່ອຍຕົນເອງ ແລະທວງໃຫ້ມີສິດສະເໝີພາບປະຊາທິປະໄຕຄືກັບຜູ້ຊາຍ ແລະການເຮັດວຽກມື້ລະ 8 ຊົ່ວໂມງ, ພ້ອມທັງໄດ້ ຮັບການປົກປ້ອງທຸກຮູບການ, ນັບແຕ່ນັ້ນມາວັນທີ 8 ມີນາຈິ່ງເປັນ “ວັນແມ່ຍິງສາກົນ”.
ຢ່າງໃດກໍຕາມ ເພື່ອເຮັດໃຫ້ງານສະເຫຼີມສະຫຼອງວັນແມ່ຍິງສາກົນຄົບຮອບ 106 ປີ ຢູ່ລາວໃນປີນີ້ ມີຄວາມໝາຍຄວາມສຳຄັນຍິ່ງຂຶ້ນ ແລະເພື່ອໃຫ້ ເຂົ້າກັບງານສະເພາະປີ 2016, ທາງຄະນະຮັບຜິດຊອບຈັດງານຍັງໄດ້ເລືອກເອົາຄຳຂວັນທີ່ວ່າ “ກ້າວສູ່ຄວາມສະເໝີພາບຍິງ-ຊາຍໃນທົ່ວໂລກ 50-50 ປີ 2030” ແລະການສຳມະນາໃນຫົວຂໍ້ “ແມ່ຍິງກັບການເປັນສະມາຊິກສະພາ ແຫ່ງຊາດ”, “ຖະແຫຼງການວຽງຈັນການສົ່ງເສີມບົດບາດຍິງ-ຊາຍ ແລະການເປັນຄູ່ຮ່ວມແມ່ຍິງອາຊຽນ ເພື່ອສິ່ງແວດລ້ອມແບບຍືນຍົງ”, “ແມ່ຍິງກັບໂພ ຊະນາການ”, “ແມ່ຍິງກັບການປ້ອງກັນມະເຮັງປາກມົດລູກ”, ໂດຍແຕ່ລະຫົວຂໍ້ ຈະມີນັກສຳມະນາກອນມາຈາກຄະນະບໍລິຫານງານສູນກາງສະຫະພັນແມ່ຍິງ ລາວ (ສສຍລ) ແລະຜູ້ຕາງໜ້າຈາກກະຊວງສາທາລະນະສຸກ, ພ້ອມດ້ວຍກິດຈະກຳອີກຫຼາຍຢ່າງຕື່ມອີກ.
ທີ່ມາ: