ເມື່ອບໍ່ດົນມານີ້ ລັ​ດຖະບານສປ ຈີນ ໄດ້​ເປີດ​ເຜີຍ​ຮ່າງ​ແຜນ​ຍຸດ​ທະ​ສາດ​ພັດທະນາ​ເສດຖະກິດ ​ແລະ ສັງຄົມ​ຂອງ​ປະ​ເທດ​ພາຍ​ໃນ​ໄລຍະ​ເວລາ 5 ປີ​ລະ​ຫວ່າງ​ປີ 2016-2020 ຕໍ່​ທີ່​ປະຊຸມ​ຂອງ​ສະພາ​ທີ່​ປຶກສາ​ປະຊາຊົນ​ແຫ່ງ​ຊາດ
(​ເອັນ​ພີ​ຊີ) ຊຶ່ງ​ມີ​ປະ​ເດັນ​ສຳຄັນ​ຄື​ດັ່ງ​ຕໍ່​ໄປ​ນີ້.

ກະ​ຕຸ້ນ​ໃຫ້​ຕົວ​ເລກ​ຜະລິດ​ຕະພັນ​ພາຍ​ໃນ(ຈີ​ດີ​ພີ)ທີ່​ມີ​ມູນ​ຄ່າ​ຫຼາຍ​ທີ່​ສຸດ​ເປັນອັນ​ດັບ​ສອງ​ຂອງ​ໂລກ​ຮອງ​ຈາກ​ອາ​ເມ​ລິ​ກາ ​ແລະ ​ເປັນອັນດັບ 1 ຂອງ​ອາຊີ ​ໃຫ້​ເຕີບ​ໂຕ​ຢ່າງ​ໜ້ອຍ 6,5%-7% ພາຍ​ໃນ​ໄລຍະ​ເວລາ 5 ປີ ຫຼື​ຄິດ​ເປັນ​ມູນ​ຄ່າ​ທີ່​​ເພີ່ມ​ຂຶ້ນ​ຈາກ 67,7 ພັນ​ຕື້​ຢວນ​ໃນ​ປີ​ທີ່​ຜ່ານ​ມາ​ເປັນ​ຫຼາຍ​ກວ່າ 92,7 ພັນ​ຕື້​ຢວນພາຍ​ໃນ​ປີ 2020, ສົ່ງ​ເສີມ​ການ​ລົງທຶນ​ໃນ​ຂະ​ແໜງ​ບໍລິການ ​ເພື່ອ​ໃຫ້​ຜົນ​ປະກອບ​ການ​ມີ​ອັດຕາ​ສ່ວນ​ໃນ​ຈີ​ດີ​ພີ​ເພີ່ມ​ຂຶ້ນ​ຈາກ 50,5% ​ໃນ​ປີ 2015 ​ເປັນ 56% ​ໃນ​ປີ 2020, ການ​ຄວບ​ຄຸມ​ປະລິມານ​ການ​ບໍລິ​ໂພ​ກຖ່ານ​ຫີນ​ໃນ​ປະ​ເທດ​ໃຫ້​ຕໍ່າ​ກວ່າ 5 ຕື້​ໂຕນ​ພາຍ​ໃນ​ປີ 2020 ຈາກ​ເດີມ 4,3 ຕື້​ໂຕນ​ໃນ​ປີ​ທີ່​ຜ່ານ​ມາ, ຫຼຸດ​ການ​ໃຊ້​ພະລັງງານ​ຟອສຊິນ​ເພື່ອ​ຄວບ​ຄຸມ​ປະລິມານ​ການ​ປ່ອຍ​ອາຍ​ພິດ​ເຮືອນ​ແກ້ວ​ໃຫ້​ໄດ້​ສູງ​ສຸດ​ຈາກ​ລະດັບ 15% ຕໍ່​ຫົວ​ປະຊາກອນ ​ໃນ​ປີ 2015 ​ເປັນ 18%​ ໃນ​ປີ 2020, ຢ່າງ​ໜ້ອຍ 80% ຂອງ​ເມືອງ​ທຸກ​ແຫ່ງ​ໃນ​ຈີນ​ຕ້ອງ​ຮັກສາ​ຄຸນ​ນະພາ​ບອາກາດ​ໃຫ້​ຢູ່​ລະດັບ​ດີ​ຫຼື​ຫຼາຍ​ກວ່າ​ນັ້ນ​ພາຍ​ໃນ​ປີ 2020 ທຽບ​ກັບ 6,7% ຈາກ​ສະຖິຕິ​ໃນ​ປີ​ທີ່​ຜ່ານ​ມາ, ​ເພີ່ມ​ກຳລັງ​ການ​ຜະລິດ​ໄຟຟ້າ​ຂອງ​ເຕົາ​ປະຕິ​ກອນ​ນິວ​ເຄລຍ​ເປັນ 58 ກິ​ກະ​ວັດ​ພາຍ​ໃນ​ປີ 2020 ຈາກ​ປະຈຸ​ບັນ 28,3 ກິ​ກະ​ວັດ, ສົ່ງ​ເສີມ​ໃຫ້​ຄົວ​ເຮືອນ​ມີ​ລາຍ​ໄດ້​ສຸທິ​ຫຼັງ​ຈາກ​ຫັກ​ຄ່າ​ພາສີ​ເພີ່ມ​ຂຶ້ນ​ທຸກ​ປີ​ຢ່າງ​ໜ້ອຍ 6,5%, ສ້າງ​ວຽກ​ເຮັດ​ໃໝ່​ໃຫ້​ໄດ້ 50 ລ້ານ​ຄົນພາຍ​ໃນ​ປີ 2020.

ຈຳນວນ​ຜູ້​ຢູ່​ອາ​ໄສ​ໃນ​ເມືອງ​ໃຫຍ່​ຄວນ​ມີ​ອັດຕາ​ສ່ວນ​ຄິດ​ເປັນ 60% ຂອງ​ປະຊາກອນ​ທັງ​ປະ​ເທດ​ໃນ​ປີ 2020 ​ເພີ່ມ​ຂຶ້ນ​ຈາກ 56,1% ​ໃນ​ປີ​ທີ່​ຜ່ານ​ມາ ຂະນະ​ທີ່​ອັດຕາ​ສ່ວນ​ຂອງ​ປະຊາກອນ​ມີ​ທະບຽນ​ເຮືອນ​ຢູ່​ໃນ​ເມືອງ​ໃຫຍ່ຄວນ​ເພີ່ມ​ເປັນ 45% ຂອງ​ປະຊາກອນ​ທົ່ວ​ປະ​ເທດ, ຄາດ​ວ່າ​ປະຊາກອນ​ຈີນ​ຈະ​ເພີ່ມ​ຂຶ້ນ​ເປັນ 45 ລ້ານ​ຄົນ​ພາຍ​ໃນ​ປີ 2020 ຫຼື​ຈະ​ມີ​ປະຊາກອນ​ລວມທັງ​ໝົດ 1.420 ລ້ານ​ຄົນ(ຕາມ​ຂ່າວ​ຕ່າງປະ​ເທດ).