ແຂວງຈຳປາສັກໄດ້ຈັດກອງປະຊຸມສະຫຼຸບຕີລາຄາ ແລະ ຍ້ອງຍໍຂະບວນການແຂ່ງຂັນຮັກຊາດ,ສ້າງບ້ານພັດທະນາ ແລະ ຜັນຂະຫຍາຍວຽກງານ 3 ສ້າງເຂົ້າສູ່ລວງເລິກ ຂຶ້ນໃນວັນທີ 30 ທັນວາ2015 ທີ່ສະໂມສອນຂອງແຂວງ. ໃຫ້ກຽດເປັນປະທານຂອງທ່ານ ດຣ ບຸນຖອງ ດີວິໄຊ ເລຂາພັກແຂວງ ເຈົ້າແຂວງໆຈຳປາສັກ,ມີບັນດາທ່ານຮອງເລຂາພັກແຂວງ,ຄະນະປະຈຳພັກແຂວງ,ຫົວໜ້າພະແນກການ-ກົມກອງ,ເຈົ້າເມືອງ 10 ຕົວເມືອງ ພາຍໃນແຂວງເຂົ້າຮ່ວມຢ່າງພ້ອມພຽງ.
ໃນພິທີທ່ານ ສົມສະໜິດ ບຸດຕິວົງ ຮອງເລຂາພັກແຂວງ ຮອງເຈົ້າແຂວງໆຈຳປາສັກໃຫ້ຮູ້ວ່າ:ກອງປະຊຸມໃນຄັ້ງນີ້ແມ່ນເປັນການສະຫຼຸບຕີລາຄາການຈັດຕັ້ງປະຕິບັດ ຂະບວນການແຂ່ງຂັນ “ ຮັກຊາດແລະ ພັດທະນາ ” ກໍຄືຂະບວນການຫັນລົງກໍ່ສ້າງຮາກຖານສ້າງບ້ານພັດທະນາ ແລະ ຊຸກຍູ້ວຽກງານ 3 ສ້າງ ໃນຊຸມປີຜ່ານມາຢ່າງຮອບດ້ານ.ຜ່ານຂະບວນການຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ IX ຂອງພັກ,ໂດຍສະເພາະມະຕິ 3 ຂອງກົມການເມືອງສູນກາງພັກວ່າດ້ວຍວຽກງານ 3 ສ້າງກໍ່ຄືການຈັດຕັ້ງປະຕິບັດ ວຽກງານກໍ່ສ້າງຮາກຖານການເມືອງ ແລະພັດທະນາຊົນນະບົດຮອບດ້ານ ບົນຈິດໄຈແຂ່ງຂັນ “ ຮັກຊາດ ແລະ ພັດທະນາ ” ພວກເຮົາສາມາດສ້າງໄດ້ຖັນແຖວພະນັກງານຂອງຂະແໜງການ ແລະ ທ້ອງຖິ່ນຮາກຖານ ຍົກລະດັບຄວາມຮູ້ຄວາມສາມາດ ຈາກຂະບວນການເຄື່ອນໄຫວຕົວຈິງ ເຮັດໃຫ້ພະນັກງານສະມາຊິກພັກ ໄດ້ສົມທົບແໜ້ນຄວາມຮູ້ທາງດ້ານທິດສະດີ ກັບພຶດຕິກຳຕົວຈິງ,ເຮັດໃຫ້ພະນັກງານຈຳນວນບໍ່ໜ້ອຍ ໄດ້ກາຍເປັນພະນັກງານຫຼັກແຫຼ່ງແກ່ນສານ ທີ່ມີລັກສະນະຫຼັກໝັ້ນ,ມີຄວາມຈົງຮັກພັກດີຕໍ່ພັກ,ຕໍ່ຊາດ ແລະປະຊາຊົນ ກາຍເປັນພະນັກງານສືບທອດ ໃນການນຳພາບໍລິຫານ ຢູ່ບັນດາຂະແໜງການ ແລະ ຢູ່ທ້ອງຖິ່ນຕ່າງໆ.ພ້ອມດຽວກັນນັ້ນກໍ່ໄດ້ເກີດມີ ບຸກຄົນ,ບ້ານ,ຄອບຄົວ,ນັກພັດທະນາ ແລະ ຜູ້ປະກອບການທີ່ເປັນຕົວແບບດີເດັ່ນ.ສາມາດຢັ້ງຢືນໄດ້ວ່າການເຮັດທົດລອງ 3 ສ້າງເປັນປັດໃຈໃໝ່ທີ່ກະຕຸກຊຸກຍູ້ເຮັດໃຫ້ວຽກງານກໍ່ສ້າງຮາກຖານການເມືອງ ແລະ ພັດທະນາຊົນນະບົດໄດ້ດຳເນີນໄປເປັນລະບົບຄົບຊຸດ,ມີປະສິດທິຜົນ ແລະ ໄປຕາມທິດທີ່ຍືນຍົງ.ພ້ອມທັງຢັ້ງຢືນວ່າ:ທິດນຳຍຸດທະສາດສ້າງແຂວງເປັນຫົວໜ່ວຍຍຸດທະສາດ,ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາແມ່ນຖືກຕ້ອງ ສອດຄ່ອງກັບສະພາບຕົວຈິງຂອງປະເທດເຮົາ.
ຂໍ້ມູນຈາກ http://www.champamai.org.la/