ຂປລ.ພິທີມອບ–ຮັບໂຄງການດັ່ງກ່າວໄດ້ຈັດຂຶ້ນໃນວັນທີ 2 ມີນາ ນີ້ຢູ່ທີ່ສະຖານີເກັບນ້ຳປະປາ ບ້ານຈອມແກ້ວ ເທສະບານເມືອງທ່າແຂກ ແຂວງຄໍາມ່ວນ ໂດຍເປັນກຽດເຂົ້າຮ່ວມຂອງ ທ່ານ ໂອໄດ ສຸດາພອນ ເຈົ້າແຂວງໆຄໍາມ່ວນ ທ່ານ ລັດຕະນະມະນີ ຄູນນິວົງ ຮອງລັດຖະມົນຕີກະຊວງໂຍທາທິການ ແລະຂົນສົ່ງ , ທ່ານ ຮິກິຮະຣະທະເຄຊິ ( Mr. Takeshi HAKIHARA ) ເອກອັກຄະລັດຖະທູດແຫ່ງປະເທດຢີ່ປຸ່ນ ປະຈໍາ ສປປ ລາວ ພ້ອມດ້ວຍເຈົ້າໜ້າທີ່ກ່ຽວຂ້ອງ ແລະ ແຂກທີ່ຖືກເຊີນເຂົ້າຮ່ວມ.
ໂຄງການກໍ່ສ້າງພັດທະນາລະບົບນ້ຳປະປາ ເມືອງທ່າແຂກ ໄດ້ຈັດຕັ້ງປະຕິບັດໃນປີ 2013 ແລະ ສໍາເລັດການກໍ່ສ້າງໃນທ້າຍປີ 2015 ມີມູນຄ່າທັງໝົດ 1.6 ຕື້ເຢັນ ຫລື ປະມານ 1.73 ລ້ານໂດລາສະຫະລັດ. ມີຄວາມສາມາດຜະລິດນໍ້າໄດ້ 15.000 ແມັດກ້ອນຕໍ່ວັນ, ສາມາດສະໜອງນໍ້າໃຫ້ແກ່ປະຊາຊົນ 50.000 ຄົນ ເຊິ່ງຈະເປັນການປະກອບສ່ວນຢ່າງໃຫຍ່ຫລວງ ໃນການບັນລຸເປົ້າໝາຍຂອງລັດຖະບານ ທີ່ຈະສະໜອງນໍ້າສະອາດ ມີຄວາມປອດໄພໃຫ້ແກ່ 80% ຂອງປະຊາກອນພາຍ ໃນຕົວເມືອງຮອດປີ 2020.
ນອກຈາກການຊ່ວຍເຫລືອທຶນຮອນດັ່ງກ່າວແລ້ວ ອົງການໄຈກາ ຍັງໃຫ້ການຊ່ວຍເຫລືອ ໃນໂຄງການຮ່ວມມືດ້ານເຕັກນິກ ເພື່ອສ້າງຄວາມເຂັ້ມແຂງໃນດ້ານການບໍລິຫານ ໃຫ້ແກ່ລັດວິສາຫະກິດນໍ້າປະປາ ນັບແຕ່ເດືອນ ສິງຫາ ປີ 2012 ແລະ ຈະດໍາເນີນໄປເປັນເວລາ 5 ປີ ໃນໂຄງການດັ່ງກ່າວ.
ຢີ່ປຸ່ນໄດ້ໃຫ້ການສະໜັບສະໜູນ ການພັດທະນາເສດຖະກິດ – ສັງຄົມ ຂອງລາວ ເປັນເວລາຍາວນານ ສະເພາະແຂວງຄໍາມ່ວນ ນັບແຕ່ປີ 1994 – 2000 ລັດຖະບານຢີ່ປຸ່ນ ໄດ້ໃຫ້ການຊ່ວຍເຫລືອ ໃນໂຄງການກໍ່ສ້າງຂົວແຫ່ງໃໝ່ ຢູ່ເສັ້ນທາງຫລວງແຫ່ງຊາດ ເລກທີ 13 ເປັນຈໍານວນເງິນທັງໝົດ 10,1 ຕື້ເຢັນ ຫລື ປະມານ 90 ລ້ານໂດລາສະຫະລັດ. ນອກຈາກນີ້, ໃນເດືອນມີນາ ປີ 2005 ໄດ້ມີພິທີລົງນາມ ເອກະສານແລກປ່ຽນ ໃນໂຄງການກູ້ຢືມເງິນເຢັນມູນຄ່າ 3,3 ຕື້ເຢັນ ຫລື ປະມານ 32 ລ້ານໂດລາສະຫະລັດ ໃນໂຄງການພັດທະນາຕາຕາຂ່າຍໄຟຟ້າໃນຂອບເຂດລຸ່ມແມ່ນໍ້າຂອງນໍາອີກ .
ແຫລ່ງຂ່າວ:
