ປະຈຸບັນ ມະນຸດເຮົາໄດ້ຊົມໃຊ້ຊັບພະຍາກອນທຳມະຊາດຫຼາຍເກີນຄວາມສາມາດທີ່ທຳມະຊາດຈະສະໜອງໃຫ້ໄດ້ເປັນຕົ້ນແມ່ນສັດນໍ້າ ແລະສັດປ່າຫຼາຍຊະນິດທີ່ສຳຄັນໄດ້ຕົກຢູ່ໃນພາວະໄພຂົ່ມຂູ່ດ້ວຍການຄ້າທີ່ຜິດກົດໝາຍ ແລະການ ເສື່ອມໂຊມສົງຄາມຂອງລະບົບນິເວດ.
ເພື່ອແກ້ໄຂບັນຫາດັ່ງກ່າວປະຊາຄົມໂລກກໍໄດ້ມີຄວາມພະຍາຍາມສູງໃນການປຶກສາຫາລື, ລະດົມຄວາມຄິດເຫັນ ແລະຮ່ວມມືກັນຢ່າງຈິງຈັງໃນການກຳນົດວິໄສທັດຮ່ວມກັນກ່ຽວກັບການປົກປັກຮັກສາຊັບພະຍາກອນທຳມະຊາດ, ສັດນ້ຳ ແລະສັດປ່າດ້ວຍເຫດນີ້ກອງປະຊຸມສະມັດຊາໃຫຍ່ ສປຊ ຄັ້ງທີ 68 ໃນວັນທີ 20 ທັນວາ 2013 ຈິ່ງໄດ້ຮັບຮອງເອົາມະຕິວ່າດ້ວຍການປະກາດຮັບຮອງເອົາວັນທີ 3 ມີນາຂອງທຸກໆປີເປັນວັນສັດປ່າໂລກ ແລະວັນທີ 3 ມີນາຜ່ານມາແມ່ນເທື່ອທຳອິດທີ່ ສປປ ລາວ ໄດ້ຈັດຕັ້ງການສະເຫຼີມສະຫຼອງວັນດັ່ງກ່າວ.
ການຈັດງານສະເຫຼີມສະຫຼອງວັນສັດປ່າໂລກມີຂຶ້ນທີ່ ລາວ-ໄອເຕັກນະຄອນຫຼວງວຽງຈັນໃນຕອນເຊົ້າຂອງວັນທີ 3 ມີນາ 2016 ໂດຍການເປັນປະທານຂອງທ່ານສົມມາດພົນເສນາລັດຖະມົນຕີວ່າການກະຊວງຊັບພະຍາກອນທຳມະຊາດແລະສິ່ງແວດລ້ອມແລະທ່ານ ນາງ ບຸນຄຳ ວໍລະຈິດ ລັດຖະມົນຕີຊ່ວຍວ່າການກະຊວງຊັບພະຍາກອນທຳມະຊາດ ແລະສິສິ່ງແວດລ້ອມ, ມີການນຳພັກ-ລັດ, ບັນດາຜູ້ຕາງໜ້າຈາກກະຊວງ, ກົມກອງ, ພະແນກການ, ສະຖາບັນການສຶກສາ, ສະຖາບັນຄົ້ນຄວ້າ, ອົງການຈັດຕັ້ງມະຫາຊົນ, ອົງ ການຈັດຕັ້ງສັງຄົມ, ອົງການພາກເອກະ ຊົນ, ບັນດາທູດ ແລະທູຕານຸທູດປະຈຳ ສປປ ລາວ, ອົງການຈັດຕັ້ງສາກົນເຂົ້າຮ່ວມຢ່າງພ້ອມໜ້າ.
ຈຸດປະສົງຂອງການຈັດງານໃນຄັ້ງນີ້ ກໍເພື່ອແມ່ນປຸກລະດົມຈິດສຳນຶກໃຫ້ປະຊາຊົນລາວບັນດາເຜົ່າ ແລະບັນດາ ປະເທດໃນໂລກໃຫ້ຫັນມາຮ່ວມແຮງຮ່ວມໃຈກັນປົກປັກຮັກສາສັດປ່າໃຫ້ຫຼາຍຂຶ້ນ ແລະເພີ່ມທະວີຄວາມເອົາໃຈ ໃສ່ຕໍ່ການຄຸ້ນຄອງຊັບພະຍາກອນທຳມະຊາດໃຫ້ມີຄວາມຍືນຍົງຕະຫຼອດໄປແນ່ໃສ່ເພີ່ມຄວາມອຸດົມສົມບູນທາງດ້ານຊະນິດພັນ ແລະຈຳນວນປະຊາກອນສັດນ້ຳ ແລະສັດປ່າທີ່ເປັນມໍລະດົກທາງທຳມະຊາດອັນລ້ຳຄ່າຂອງຊາດກໍຄືຂອງໂລກໃຫ້ໄດ້ຮັບການປົກປັກຮັກສາ, ຊົມໃຊ້ແບບຍືນນານ ແລະເປັນມູນມໍລະດົກຕົກທອດຮອດເຊັ່ນລູກເຊັ່ນຫຼານຂອງພວກເຮົາຕະຫຼອດໄປ.
ໂອກາດນີ້ ທ່ານ ສົມມາດ ພົນເສນາ ໄດ້ຮຽກຮ້ອງມາຍັງພີ່ນ້ອງຮ່ວມຊາດ, ການຈັດຕັ້ງທັງພາກລັດ ແລະເອກະຊົນນັບແຕ່ສູນກາງຈົນຮອດທ້ອງຖິ່ນຈົ່ງຖືເອົາໂອກາດທີ່ສຳຄັນນີ້ພ້ອມກັນປົກປັກຮັກສາຄວາມອຸດົມຮັ່ງມີຂອງຊັບພະຍາກອນທຳມະຊາດກໍຄືສັດນ້ຳ ແລະສັດ ປ່າທີ່ມີຢູ່ປະເທດເຮົາ ແລະໃນໂລກໂດຍ ເລີ່ມຈາກຕົນເອງ, ຄອບຄົວ ແລະການ ຈັດຕັ້ງຂຶ້ນໄປພ້ອມກັນປະກອບສ່ວນຮ່ວມແຮງຮ່ວມໃຈກັນປົກປັກຮັກສາສັດປ່າ ແລະສັດນ້ຳ ຂອງພວກເຮົາກໍຄືຂອງໂລກໃຫ້ອຸດົມສົມບູນຕະຫຼອດໄປດັ່ງຄຳຂວັນທີ່ວ່າ: “ອະນາຄົດຂອງສັດປ່າແມ່ນຢູ່ໃນກຳມືຂອງພວກເຮົາ”.
ທີ່ມາ: