ສຳນັກຂ່າວຕ່າງປະເທດ ລາຍງານໃນວັນທີ 3 ມີນານີ້ວ່າ ທ່ານ ລຽວຕຽງໄຫລ ລັດຖະມົນຕີວ່າການ ກະຊວງຄົມມະນາຄົມ ມາເລເຊຍ ໄດ້ເປີດເຜີຍວ່າ ກໍລະນີພົບວັດຖຸປິດສະໜາ ທີ່ເປັນຊິ້ນສ່ວນເຮືອບິນໂບອິ້ງ 777 ທີ່ຫາດຊາຍແຫ່ງໜຶ່ງ ໃນປະເທດໂມຊຳບິກນັ້ນ ແມ່ນມີຄວາມເປັນໄປໄດ້ສູງ ອາດແມ່ນຊາກເຮື້ອບິນມາເລເຊຍ ແອຣ໌ລາຍ ຖ້ຽວບິນ MH370 ທີ່ຫາຍສາບສູນໄປ ເກືອບສອງປີ.
ຊິ້ນສ່ວນທີ່ຖືກພົບຢູ່ໂມຊຳບິກດັ່ງກ່າວນີ້ ແມ່ນພົບໂດຍຊາວອາເມຣິກາຄົນໜຶ່ງ ທີ່ກຳລັງພະຍາຍາມແກະຮອຍ ຊອກຫາການຫາຍສາບສູນ ຂອງເຮືອບິນສາຍການບິນມາເລເຊຍ ແອຣ໌ລາຍ ລຳດັ່ງກ່າວນີ້ ທີ່ສູນຫາຍເມື່ອເດືອນມີນາ ປີ 2014 ຜ່ານມາ ພ້ອມກັບຜູ້ໂດຍສານ ແລະ ລູກເຮືອ ລວມ 239 ຊີວິດ.
ດ້ານລັດຖະມົນຕີວ່າການ ກະຊວງຄົມມະນາຄົມມາເລເຊຍ ໄດ້ເປີດເຜີຍວ່າ ມາເລເຊຍຈະຮ່ວມມືກັບທີມຄົ້ນຫາ ຂອງປະເທດອົດສະຕຣາລີ ປະສານສົມທົບກັນນຳເອົາຊິ້ນສ່ວນດັ່ງກ່າວນີ້ ກັບຄືນມາເພື່ອວິເຄາະ ເນື່ອງຈາກຍັງບໍ່ທັນມີຂໍ້ສະຫລຸບໃດໆ ກ່ຽວກັບຊິ້ນສ່ວນດັ່ງກ່າວນີ້.
