ສຳນັກຂ່າວຕ່າງປະເທດ ລາຍງານໃນວັນທີ 3 ມີນານີ້ວ່າ ກອງປະຊຸມຄະນະມົນຕີຄວາມໝັ້ນຄົງ ແຫ່ງ ສະຫະປະຊາຊາດ ຫລື UNSC ໄດ້ລົງມະຕິເປັນເອກະພາບກັນ ກຳນົດມາດຕະການຂວ້ຳບາດ ສາທາລະນະລັດ ປະຊາຊົນ ປະຊາທິປະໄຕເກົາຫລີ ເຫລື ເກົາຫລີເໜືອ ຄັ້ງຮຸນແຮງທີ່ສຸດໃນຮອບ 20 ປີ ເພື່ອເປັນການລົງໂທດ ກໍລະນີ ສປປ ເກົາຫລີ ທົດລອງນິວເຄລຍ ໃນວັນທີ 6 ມັງກອນ 2016 ແລະ ທົດລອງການຍິງລູກສອນໄຟ ໄລຍະໄກ ເມື່ອວັນທີ 7 ກຸມພາ 2016 ຜ່ານມາ ໂດຍກອງປະຊຸມຄັ້ງນີ້ ໃຊ້ເວລາເຈລະຈາຍາວນານເຖິງ 7 ອາທິດ ໃນການກຳນົດມາດຕະການຂວ້ຳບາດດັ່ງກ່າວນີ້.
ມາດຕະການຂວ້ຳບາດ ລວມມີການກວດກາການຂົນສົ່ງສິນຄ້າ ເຂົ້າ-ອອກ ປະເທດເກົາຫລີເໜືອ ທັງທາງບົກ, ທາງທະເລ ແລະ ທາງອາກາດ, ຫ້າມບໍ່ໃຫ້ມີການຊື້-ຂາຍ ຫລື ສົ່ງມອບອາວຸດຂະໜາດນ້ອຍ ແລະ ອາວຸດເບົາທຸກຊະນິດ ໃຫ້ແກ່ເກົາຫລີເໜືອ, ຫ້າມສົ່ງອອກຄຳ, ແຮ່ໄທທານຽມ, ແຮ່ວາເນດຽມ ແລະ ແຮ່ທາດຫາຍາກຕ່າງໆ ຕະຫລອດຮອດຫ້າມສົ່ງອອກ ນ້ຳມັນເຊື້ອໄຟເຮືອບິນ, ເຊື້ອໄຟຈະຫລວດ ໄປຍັງປະເທດເກົາຫລີເໜືອ ດັ່ງນີ້ເປັນຕົ້ນ.