ທ້າວໄຊສົມພອນ ອາຍຸ 35 ປີ ອາຊີບນັກທຸລະກິດຢູ່ບ້ານພະຂາວ ເມືອງໄຊທານີ ນະຄອນຫຼວງວຽງຈັນ ຕ້ອງໄດ້ໄປໃຊ້ຊີວິດໃນຄ້າຍຄຸມຂັງເກືອບ 2 ປີ ພາຍຫຼັງສານປະຊາຊົນ ນະຄອນຫຼວງວຽງຈັນ ໄດ້ມີຄຳຕັດສິນລົງໂທດຜູ້ກ່ຽວໃນສະຖານສໍ້ໂກງຊັບພົນລະເມືອງ ແລະ ນຳໃຊ້ແຊັກປອມ.
ວັນທີ 1 ມີນານີ້ ໄອຍະການປະຊາຊົນນະຄອນຫຼວງວຽງຈັນ ໄດ້ເປັນໂຈດຮ່ວມກັບໂຈດທາງແພ່ງອີກ 5 ຄົນ ເພື່ອຮ້ອງຟ້ອງທ້າວ ໄຊສົມພອນ ກິດຕິໂສພົນ ເຈົ້າຂອງບໍລິສັດສຳຫຼວດ ແລະຮັບເໝົາກໍ່ສ້າງແຫ່ງໜຶ່ງ ຢູ່ນະຄອນຫຼວງວຽງຈັນ (ຈຳເລີຍ) ຫຼັງຜູ້ກ່ຽວໄດ້ກະທຳຜິດໃນສະຖານສໍ້ໂກງຊັບຂອງພົນລະເມືອງ ແລະນຳໃຊ້ແຊັກປອມເປັນເຫດໃຫ້ຜູ້ອື່ນໄດ້ຮັບຄວາມເສຍຫາຍ ຊຶ່ງຖືກເຈົ້າໜ້າທີ່ ກັກຕົວມາດຳເນີນຄະດີໃນວັນທີ 25 ທັນວາ 2014.
ຕາມຄຳຖະແຫຼງໃນທີ່ປະຊຸມສານຂອງອົງໄອຍະການປະຊາຊົນ ນະຄອນຫຼວງວຽງຈັນໃຫ້ຮູ້ວ່າ: ທ້າວໄຊສົມພອນ ໄດ້ກະທຳຜິດໃນສະຖານສໍ້ໂກງຊັບຂອງພົນລະເມືອງແທ້ຈິງ ໂດຍວັນທີ 27 ເມສາ 2011 ໄດ້ເຮັດສັນຍາສັບຄອນແທັກຮັບເໝົາໂຄງການກໍ່ສ້າງຫ້ອງການພະແນກໂຍທາທິການ ແລະຂົນສົ່ງແຂວງຄຳມ່ວນ ກັບທ້າວ ສະຖິດ ກ່ອນຈະຕົວະເອົາເງິນໄປຫຼາຍຮ້ອຍລ້ານກີບ ນອກຈາກນີ້ ຍັງໄດ້ເຮັດສັນຍາຮ່ວມທຸລະກິດກັບບໍລິສັດມົນຕີກຣຸບໃນການກໍ່ສ້າງໂຄງການສ້າງວິທະຍາໄລແຂວງຈຳປາສັກ ແລະໄດ້ຕົວະເອົາເງິນຈາກບໍລິສັດດັ່ງກ່າວ ນອກຈາກນີ້ ຜູ້ຕ້ອງຫາຍັງໄດ້ໄປຕົວະເອົາເງິນຈາກບໍລິສັດເປໂທລີເມັກຈຳນວນກວ່າ 5 ຮ້ອຍລ້ານກີບ ແລະ ໄດ້ນຳໃຊ້ແຊັກປອມ ໂດຍຜິດຕໍ່ລະບຽບກົດໝາຍ.
ຜ່ານການຄົ້ນຄວ້າບັນດາເອກະສານຫຼັກຖານ ແລະການໄຕ່ສວນໃນທີ່ປະຊຸມສານຢ່າງຄົບຖ້ວນ, ສານປະຊາຊົນ ນະຄອນຫຼວງວຽງຈັນ ຈິ່ງໄດ້ລົງໂທດຕັດອິດສະຫຼະພາບທ້າວໄຊສົມພອນ 2 ປີ ກັບ 6 ເດືອນ ໃນຖານສໍ້ໂກຊັບພົນລະເມືອງ ແລະນຳໃຊ້ແຊັກປອມ ແລະພາຍຫຼັງຄຳໃຫ້ການຂອງຜູ້ກ່ຽວທີ່ຍອມຮັບສາລະພາບ ແລະຍອມຮັບໃຊ້ເງິນໃຫ້ກັບໂທດທາງແພ່ງ ຈຳນວນ 5 ຄົນ ສານຈິ່ງໄດ້ເຫັນດີຫຼຸດໂທດລົງເຄິ່ງໜຶ່ງ ເຫຼືອ 1 ປີ ກັບ 3 ເດືອນ ສ່ວນທີ່ເຫຼືອແມ່ນໃຫ້ຝາກໄວ້.
ທີ່ມາ: