ສຳນັກຂ່າວຕ່າງປະເທດ ລາຍງານໃນວັນທີ 2 ມີນານີ້ວ່າ ເຈົ້າໜ້າທີ່ພາສີມາເລເຊຍ ສາມາດຍຶດງາຊ້າງອາຟຣິກາ ໜັກເຖິງ 159 ກິໂລກຣາມ ມູນຄ່າ 382,000 ໂດລາ ຢູ່ສະໜາມບິນສາກົນກົວລາລຳເປີ ພ້ອມກັບຜູ້ຖືກຫາອີກ 2 ຄົນ ສັນຊາດຫວຽດນາມ ຊຶ່ງເຈົ້າໜ້າທີ່ສາມາດກວດພົບງາຊ້າງດັ່ງກ່າວ ພາຍໃນກະເປົາເດີນທາງຂອງພວກກ່ຽວ ທີ່ເດີນທາງມາຈາກປະເທດເອທິໂອປີ ແລະ ມີຈຸດໝາຍປາຍທາງໄປລົງ ນະຄອນຫລວງຮ່າໂນ້ຍ ປະເທດຫວຽດນາມ ໂດຍເຈົ້າໜ້າທີ່ມາເລເຊຍ ໄດ້ລະບຸວ່າ ຍັງມີຜູ້ຖືກສົງໄສອີກຄົນທີສາມ ທີ່ກຳລັງຄົ້ນຫາຕິດຕາມຕົວມາດຳເນີນຄະດີ.

ທັງນີ້ ເນື່ອງຈາກ ງາ ແລະ ອະໄວຍະວະອື່ນໆຂອງຊ້າງ ຈະຖືກນຳໄປຂາຍ ເພື່ອເຮັດເປັນເຄື່ອງປະດັບ ແລະ ຢາພື້ນເມືອງລາຄາແພງ ທົ່ວພື້ນທີ່ໃນພາກພື້ນອາຊີ ໂດຍມີປະເທດຈີນ ເປັນຕະຫລາດທີ່ສຳຄັນ.