ໃນບ່າຍວັນທີ 1 ມີນານີ້, ຢູ່ຫ້ອງຕຳຫລວດ ນະຄອນຫລວງວຽງຈັນ ທ່ານ ພັທ ຄຳແພງ ໄຊຍະລາດ ຮອງຫົວໜ້າ ກອງບັນຊາການ ປກສ ນະຄອນຫລວງວຽງຈັນ, ໄດ້ຖະແຫລງກ່ຽວກັບ ຜົນການຈັບເປົ້າໝາຍກໍ່ຄວາມ ບໍ່ສະຫງົບ ເພື່ອລັກຊັບຄົນອື່ນ ໂດຍການນຳໃຊ້ບັດເອທີເອັມປອມ ກົດເອົາເງິນຕາມຕູ້ເອທີເອັມຕ່າງໆໃນຕົວເມືອງ ວ່າ: ພາຍຫລັງໄດ້ຮັບແຈ້ງວ່າ ມີການເຄື່ອນໄຫວຂອງກຸ່ມຄົນບໍ່ດີ ໃຊ້ບັດ ເອທີເອັມ (ATM) ປອມ ເພື່ອລັກກົດເອົາເງິນ ຈາກຕູ້ເອທີເອັມ ຢູ່ຕາມສະຖານທີ່ຕ່າງໆ, ການນຳໃຊ້ບັດປອມ ລັກກົດເອົາເງິນຜ່ານເຄື່ອງຮູດບັດ DBC ແລະ ການນຳໃຊ້ບັດປອມ ກົດຊຳລະຄ່າສິນຄ້າ ຕາມຮ້ານຄ້າທົ່ວໄປ ໃນຕົວເມືອງນະຄອນຫລວງວຽງຈັນ, ດັ່ງນັ້ນ ເຈົ້າໜ້າທີ່ ປກສ ນະຄອນຫລວງວຽງຈັນ ໄດ້ແຕ່ງຕັ້ງເຈົ້າໜ້າທີ່ວິຊາສະເພາະ ສົມທົບກັບພາກສ່ວນກ່ຽວຂ້ອງ ເພື່ອລົງເກັບກໍາຂໍ້ມູນນຳຜູ້ເສຍຫາຍ ກໍຄືບັນດາທະນາຄານຕ່າງໆ ມາແຕ່ວັນທີ 2 ທັນວາ 2015 ຈົນເຖິງວັນທີ 20 ມັງກອນ 2016 ຈຶ່ງສາມາດຈັບກຸມເປົ້າໝາຍໄດ້ ທັງໝົດ 11 ຄົນ, ໃນນັ້ນ ມີສັນຊາດບຸນກາລີ 1 ຄົນ, ໂຣມານີ 1 ຄົນ, ຈີນ 8 ຄົນ ແລະ ລາວ 1 ຄົນ, ພ້ອມນີ້ ຍັງສາມາດຢືດຂອງກາງ ທີ່ຄົນຮ້າຍໃຊ້ກໍ່ເຫດຄື: ຄອມພິວເຕີ້ໂນດບຸກ 3 ເຄື່ອງ, ເຄື່ອງຮູດບັດປອມ 3 ເຄື່ອງ, ບັດເອທີເອັມ ແລະ ບັດເຄດິດ ຫລາຍກວ່າ 200 ບັດ ແລະ ເງິນສົດຫລາຍກວ່າ 90 ລ້ານກີບ.
ເຈົ້າໜ້າທີ່ໃຫ້ຮູ້ວ່າ: ຜ່ານການສືບສວນ-ສອບສວນ ພວກກ່ຽວໄດ້ຮັບສາລະພາບວ່າ ໄດ້ນຳໃຊ້ບັດເອທີເອັມປອມ ເພື່ອກົດເອົາເງິນ ຢູ່ຕາມຕູ້ເອທີເອັມຕ່າງໆ, ກົດຜ່ານເຄື່ອງຮູດບັດ DBC ເພື່ອໂອນເງິນເຂົ້າບັນຊີ ແລະ ກົດຊຳລະຄ່າສິນຄ້າຕາມຮ້ານຄ້າທົ່ວໄປ ໃນຂອບເຂດນະຄອນຫລວງວຽງຈັນ ແລະ ຂອງກາງທີ່ເຈົ້າໜ້າທີ່ກວດພົບນັ້ນ ເປັນຂອງພວກກ່ຽວແທ້.
ພ້ອມນີ້ ເຈົ້າໜ້າທີ່ ຍັງຈະສືບຕໍ່ເປີດກ້ວາງການສືບສວນ-ສອບສວນ ເກັບກຳຂໍ້ມູນຫລັກຖານຂະຫຍາຍຜົນ ໄປຫາກຸ່ມແກ້ງເຄືອຂ່າຍທີ່ຍັງເຫລືອ ເພື່ອນຳຈັບຕົວມາດຳເນີນຄະດີຕາມລະບຽບກົດໝາຍ. ນອກນີ້ ຍັງຮຽກຮ້ອງໃຫ້ທຸກພາກສ່ວນໃນສັງຄົມ ໂດຍສະເພາະຜູ້ປະກອບການທຸລະກິດຕ່າງໆ ຈົ່ງມີສະຕິລະວັງຂຶ້ນຕື່ມ ເພື່ອບໍ່ໃຫ້ຕົກເປັນເຫຍື່ອຂອງກຸ່ມແກ້ງກໍ່ຄວາມສະຫງົບທຸກຮູບແບບ.
ແຫລ່ງຂ່າວ:
