ວັນທີ 1 ມີນານີ້ ທ່ານ ພັນໂທ ຄຳແພງ ໄຊຍະລາດ ຮອງຫົວໜ້າກອງບັນຊາການ ປກສ ນະຄອນຫຼວງວຽງຈັນ ໄດ້ຖະແຫຼງຂ່າວຕໍ່ສື່ມວນຊົນ ພາຍຫຼັງທີ່ເຈົ້າໜ້າທີ່ ປກສ ນະຄອນຫຼວງວຽງຈັນ ສາມາດແກ້ໄຂກຸ່ມແກ້ງຊາວຕ່າງປະເທດທີ່ເຂົ້າມາເຄື່ອນໄຫວນຳໃຊ້ບັດ ATM ປອມ ເພື່ອລັກຊັບພົນລະເມືອງ.
ທ່ານ ພັນໂທ ຄຳແພງ ໄຊຍະລາດ ໄດ້ເປີດເຜີຍວ່າ: ພາຍຫຼັງໄດ້ຮັບແຫຼ່ງຂ່າວມີການເຄື່ອນໄຫວຂອງກຸ່ມຄົນບໍ່ດີນຳໃຊ້ບັດ ATM ປອມລັກຮູດເອົາເງິນຕາມຕູ້ ATM ຢູ່ສະຖານທີ່ຕ່າງໆ, ການນຳໃຊ້ບັດປອມລັກຮູດເອົາເງິນຜ່ານ ເຄື່ອງຮູດບັດ DBC ແລະການນຳໃຊ້ບັດປອມຮູດຊຳລະຄ່າສິນຄ້າຕາມຮ້ານຄ້າທົ່ວໄປໃນຂອບເຂດ ນະຄອນຫຼວງວຽງຈັນ, ເຈົ້າໜ້າທີ່ ປກສ ນະຄອນຫຼວງວຽງຈັນ ໄດ້ແຕ່ງຕັ້ງພະນັກງານວິຊາສະເພາະເພື່ອເກັບກຳຂໍ້ມູນ, ສົມທົບກັບພາກສ່ວນທີ່ກ່ຽວຂ້ອງຄື ບັນດາທະນາຄານທີ່ເກີດຜົນເສຍຫາຍ, ເຫັນວ່າມີຄວາມເປັນຈິງໜ້າເຊື່ອຖືໄດ້ ຈິ່ງໄດ້ລາຍງານຂໍທິດຊີ້ນຳຈາກຄະນະນຳຂັ້ນເທິງ, ໃນການຈັດຕັ້ງປະຕິບັດ, ຈາກນັ້ນກອງບັນຊາການ ປກສ ນະຄອນຫຼວງວຽງຈັນ ໄດ້ຈັດຕັ້ງກຳລັງວິຊາສະເພາະເລັ່ງແກ້ໄຂ, ໃນວັນທີ 2 ທັນວາ 2015 ເຖິງວັນທີ 20 ມັງກອນ 2016 ສາມາດຈັບເປົ້າໝາຍ, ດັ່ງກ່າວ ໄດ້ຈຳນວນ 4 ກຸ່ມທັງໝົດ 11 ຄົນ, ມີສັນຊາດ ບຸນກາລີ 1 ຄົນ, ສັນຊາດ ຣູມານີ 1 ຄົນ, ສັນຊາດຈີນ 8 ຄົນ ແລະ ສັນຊາດລາວ 1 ຄົນ.
ຜ່ານການແກ້ໄຂກຸ່ມເປົ້າໝາຍນຳໃຊ້ບັດ ATM ປອມ, ນັບແຕ່ວັນທີ 2 ທັນວາ 2015 ມາເຖິງປະຈຸບັນ, ເຈົ້າໜ້າທີ່ຕຳຫຼວດສາມາດເກັບກູ້ ແລະທ້ອນໂຮມອຸປະກອນ ແລະເຄື່ອງຂອງກາງຄື: ຄອມພິວເຕີໂນດບຸກ 3 ເຄື່ອງ, ເຄື່ອງຮູດເຮັດບັດປອມ ຈຳນວນ 3 ເຄື່ອງ, ບັດ ATM ແລະ ບັດເຄຣດິດ ຈຳນວນ 206 ບັດ ແລະເງິນ 90 ກວ່າລ້ານກີບ.
ທ່ານ ພັນໂທ ຄຳແພງ ໄຊຍະລາດ ຮອງຫົວໜ້າກອງບັນຊາການ ປກສ ນະຄອນຫຼວງວຽງຈັນ ຍັງໃຫ້ຮູ້ຕື່ມວ່າ: ຜ່ານການສືບສວນ-ສອບສວນ ພວກ ກ່ຽວໄດ້ຍອມຮັບສາລະພາບວ່າ ໄດ້ນຳໃຊ້ບັດ ATM ປອມ ເພື່ອຮູດເອົາເງິນຢູ່ຕູ້ ATM ຕາມສະຖານທີ່ຕ່າງໆ, ຮູດຜ່ານເຄື່ອງຮູດບັດ DBC ເພື່ອໂອນເງີນເຂົ້າບັນຊີ ແລະຮູດຊຳລະຄ່າສິນຄ້າຕາມຮ້ານຄ້າທົ່ວໄປໃນຂອບເຂດ ນະຄອນຫຼວງວຽງຈັນ ແລະເຄື່ອງຂອງກາງທີ່ເຈົ້າໜ້າທີ່ພົບນັ້ນເປັນຂອງພວກກ່ຽວແທ້.
ທ່ານຮອງຫົວໜ້າກອງບັນຊາການ ປກສ ນະຄອນຫຼວງວຽງຈັນ ຍັງໃຫ້ຊາບວ່າ: ຕໍ່ກັບການກະທຳດັ່ງກ່າວຄະນະຮັບຜິດຊອບດຳເນີນຄະດີ ຍັງສືບຕໍ່ເປີດກວ້າງການສືບສວນ-ສອບສວນເກັບກຳຂໍ້ມູນຫຼັກຖານຂະຫຍາຍຜົນໄປຫາກຸ່ມແກ້ງເຄືອຂ່າຍທີ່ຍັງເຫຼືອ ເພື່ອມາລົງໂທດຕາມລະບຽບກົດໝາຍຢ່າງເຂັ້ມງວດ.
ທີ່ມາ: