ສຳນັກຂ່າວຕ່າງປະເທດ ລາຍງານໃນວັນທີ 29 ກຸມພາຜ່ານມານີ້ວ່າ ເມື່ອວັນທີ 17 ກຸມພາຜ່ານມາ ນາງ ຖິງຖິງ ອາຍຸ 25 ປີ ອາຊີບນາງແບບ ຢູ່ເມືອງເຊິນເຈິ້ນ ປະເທດຈີນ ໄດ້ເສຍຊີວິດຄາຕຽງຜ່າຕັດ ຢູ່ຄລີນິກເສີມຄວາມງາມແຫ່ງໜຶ່ງ ຫລັງຈາກທີ່ນາງໄດ້ເຂົ້າຮັບການຜ່າຕັດ ສັນຍະກຳເສີມຂະໜາດໜ້າເອິກ ໂດຍທາງແພດລະບຸວ່າ ຫລັງຈາກນາງໄດ້ຮັບຢາລະງັບອາການເຈັບປວດ ໄດ້ເຮັດໃຫ້ການເຕັ້ນຂອງຫົວໃຈຜູ້ເຄາະຮ້າຍຊ້າລົງ ແລະ ຄວາມດັນເລືອດຕ່ຳລົງຫລາຍເກີນປົກກະຕິ ທີມແພດຈຶ່ງໄດ້ໃຫ້ຢາກະຕຸ້ນຫົວໃຈ ແຕ່ກໍບໍ່ໄດ້ຮັບຜົນ ເຮັດໃຫ້ຜູ້ກ່ຽວເສຍຊີວິດລົງໃນເວລາບໍ່ດົນ.

ແນວໃດກໍຕາມ ທາງຄລີນິກດັ່ງກ່າວ ໄດ້ສະແດງຄວາມເສຍໃຈຕໍ່ເຫດການດັ່ງກ່າວ ແລະ ສະແດງຄວາມຮັບຜິດຊອບ ດ້ວຍການສະເໜີຄ່າຊົດເຊີຍໃຫ້ທາງຄອບຄົວ ໂດຍທີມແພດທີ່ເຮັດການຜ່າຕັດ ກໍເປັນທີມແພດທີ່ມີໃບອະນຸຍາດຢ່າງຖືກຕ້ອງ ແລະ ຄລີນິກກໍຜ່ານການຈົດທະບຽນ ຢ່າງຖືກຕ້ອງຕາມກົດໝາຍ.