ສຳນັກຂ່າວຕ່າງປະເທດ ລາຍງານໃນວັນທີ 1 ມີນານີ້ວ່າ ກອງທັບບົກອິນເດຍ ໄດ້ນຳໃຊ້ມາດຕະການ ສັ່ງໃຫ້ຜູ້ສະໝັກສອບເສັງເຂົ້າເປັນທະຫານ ໃນລັດພິຫານ ທາງພາກຕາເວັນອອກຂອງປະເທດ ໃຫ້ນຸ່ງພຽງໂສ້ງຊ້ອນໃນຕົວດຽວ ເຂົ້າສອບເສັງຢູ່ກາງແຈ້ງ ເພື່ອປ້ອງກັນການສໍ້ໂກງຂໍ້ສອບ ໂດຍແຫລ່ງຂ່າວລະບຸວ່າ ມາດຕະການໄມ້ຕາຍດັ່ງກ່າວນີ້ ແມ່ນເພື່ອເປັນການປະຢັດເວລາໃນການຄົ້ນຕົວ ເນື່ອງຈາກມີຜູ້ສະໝັກເຂົ້າສອບເສັງ ຫລາຍກວ່າ 1,000 ຄົນ.

ທັງນີ້ ເນື່ອງຈາກລັດພິຫານ ເປັນລັດໜຶ່ງຂອງອິນເດຍ ທີ່ມີປະຊາກອນອາໄສຢູ່ໜາແໜ້ນຫລາຍທີ່ສຸດ ແລະ ມັກມີຫາງສຽງ ກ່ຽວກັບການສໍ້ໂກງການສອບເສັງຕ່າງໆ ນັບຕັ້ງແຕ່ການສອບເສັງຢູ່ໃນສະຖານສຶກສາ ໄປຈົນຮອດການສອບເສັງ ເພື່ອບັນຈຸເຂົ້າເປັນພະນັກງານຂອງລັດ.