ເພື່ອສົ່ງເສີມໃຫ້ແມ່ຍິງຖືພາ, ເດັກນ້ອຍເກີດໃໝ່ ແລະເດັກນ້ອຍເຖິງອາຍຸ 5 ປີ ມີສຸຂະພາບທີ່ດີຫຼີກເວັ້ນຈາກພາວະຂາດສານອາຫານ ແລະພາວະນ້ຳໜັກເກີນ ເພື່ອຈັດເວທີນຳສະເໜີຂໍ້ມູນແລກປ່ຽນຄວາມຮູ້ກ່ຽວກັບໂພຊະນາການໃຫ້ແພດໝໍ, ຫ້ອງການອ້ອມຂ້າງທີ່ເຮັດວຽກກ່ຽວກັບໂພຊະນາການໄດ້ຮັບຮູ້ເພີ່ມຕື່ມ, ມະຫາວິທະຍາໄລວິທະຍາສາດ ສຸຂະພາບແຫ່ງຊາດລາວຮ່ວມກັບເຄືອຂ່າຍໂພຊະນາການ ນັບຕັ້ງແຕ່ເລີ່ມຕົ້ນຂອງຊີວິດແຫ່ງປະເທດໄທ ໄດ້ຈັດກອງປະຊຸມກ່ຽວກັບໂພຊະນາການນັບຕັ້ງແຕ່ໄລຍະເລີ່ມຕົ້ນຂອງຊີວິດ ຊຶ່ງແມ່ນສິ່ງຈຳເປັນສຳລັບການພັດທະນາຂອງເດັກໃນທ້ອງ, ເດັກເກີດໃໝ່ ແລະເດັກນ້ອຍ.
ກອງປະຊຸມດັ່ງກ່າວໄດ້ຈັດຂຶ້ນໃນວັນທີ 26 ກຸມພາຜ່ານມາທີ່ສູນການຄ້າລາວໄອເຕັກ, ນະຄອນຫຼວງວຽງຈັນ, ພາຍໃຕ້ການເປັນປະທານຂອງທ່ານ ຮອງ ສຈ. ດຣ ນາງ ສົມຈິດ ບຸບພາ ອະທິການບໍດີມະຫາວິທະຍາໄລວິທະຍາ ສາດສຸຂະພາບ, ມີສາສະດາຈານ, ຊ່ຽວຊານທາງດ້ານໂພຊະນາການລາວ ແລະໄທທີ່ເຊື້ອເຊີນມາໃຫ້ຂໍ້ມູນ, ນັກສຶກ ສາຈາກມະຫາວິທະຍາໄລ, ວິທະຍາສາດສຸຂະພາບ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ໂອກາດນີ້ ທ່ານ ຮອງ ສຈ.ດຣ ນາງ ສົມຈິດ ບຸບຜາ ກ່າວວ່າ: ໂພຊະນາການນັບແຕ່ໄລຍະເລີ່ມຕົ້ນຂອງຊີວິດແມ່ນມີ ຄວາມສຳຄັນ ແລະຈຳເປັນສຳລັບການພັດທະນາຂອງແມ່ທີ່ຖືພາ, ເດັກນ້ອຍໃນທ້ອງ, ເດັກນ້ອຍເກີດໃໝ່ຈົນເຖິງອາຍຸ 5 ປີ, ດັ່ງນັ້ນ ກະຊວງສາທາລະນະສຸກ, ໂຮງໝໍ, ມະຫາວິທະຍາໄລວິທະຍາສາດສຸຂະພາບ ຈິ່ງເຫັນຄວາມສຳຄັນ ແລະ ຈັດກອງປະຊຸມນີ້ຂຶ້ນຮ່ວມກັບເຄືອຂ່າຍໂພຊະນາການ ນັບຕັ້ງແຕ່ເລີ່ມຕົ້ນຂອງຊີວິດແຫ່ງລາຊະອານາຈັກໄທ, ພ້ອມທັງເຊື້ອເຊີນສາສະດາຈານ, ຊ່ຽວຊານທາງດ້ານໂພຊະນາການຈາກໄທ ແລະ ລາວມາໃຫ້ຂໍ້ມູນ, ແລກປ່ຽນປະສົບການທີ່ເປັນປະໂຫຍດກອງປະຊຸມຄັ້ງນີ້ຍັງເປັນການລວມຕົວກັນຂອງບັນດາຫ້ອງການ ແລະໜ່ວຍງານອ້ອມຂ້າງທີ່ເຄື່ອນໄຫວວຽກງານໂພຊະນາການຂອງລາວ ແລະທີມງານໂພຊະນາການໄທ ເພື່ອປຶກສາຫາລືກັນໃນການວາງແຜນເຄື່ອນໄຫວວຽກງານໂພຊະນາການຢູ່ໃນລາວ.
ທ່ານອະທິການບໍດີ ມະຫາວິທະຍາໄລ ວິທະຍາສາດສຸຂະພາບ ຍັງໄດ້ລະບຸວ່າ: ດ້ວຍເຫດນີ້ການເຄື່ອນໄຫວວຽກງານກ່ຽວກັບໂພຊະນາການນັບແຕ່ໄລຍະເລີ່ມຕົ້ນຂອງຊີວິດຈິ່ງຖືວ່າເປັນວຽກງານໜຶ່ງທີ່ຄວນໃຫ້ຄວາມສຳຄັນ ແລະ ພ້ອມກັນໃຫ້ການຮ່ວມມືບໍ່ວ່າຈະເປັນໜ່ວຍງານສາທານະລະສຸກ, ໜ່ວຍງານແມ່ ແລະເດັກ, ໜ່ວຍງານສິດທິ ແລະບົດບາດຍິງຊາຍ ກໍຄືໜ່ວຍງານອື່ນໆທີ່ເຄື່ອນໄຫວວຽກງານດ້ານໂພຊະນາການເພື່ອຫຼຸດຜ່ອນຕົວເລກອັດຕາການຂາດສານອາຫານ, ເດັກທີ່ເກີດມາແບບບໍ່ສົມບູນ, ເດັກນ້ອຍທີ່ມີນ້ຳໜັກເກີນຂະໜາດລວມເຖິງອັດຕາການຕາຍເດັກນ້ອຍໃນລາວ.
ທີ່ມາ: 