ສຳນັກຂ່າວຕ່າງປະເທດ ລາຍງານໃນວັນທີ 25 ກຸມພານີ້ວ່າ ກອງທັບລັດຖະບານຊີຣີ ສາມາດປົດປ່ອຍພື້ນທີ່ ເມືອງຄັນນາເຊີ ຊຶ່ງເປັນເມືອງຍຸດທະສາດສຳຄັນ ຄືນຈາກການຍຶດຄອງຂອງກຸ່ມລັດອິດສະລາມ ຫລື ໄອເອັສ ໄດ້ຢ່າງສົມບູນ ໃນວັນທີ 25 ກຸມພາຜ່ານມາ ໂດຍເມືອງແຫ່ງນີ້ ໄດ້ເປັນເສັ້ນທາງຫລັກ ທີ່ຈະເຊື່ອມຕໍ່ເຂດປົດປ່ອຍ ຂອງລັດຖະບານຊີຣີ ແຫ່ງຕ່າງໆເຂົ້າກັນ.

ການໂຈມຕີປົດປ່ອຍເມືອງດັ່ງກ່າວນີ້ ແມ່ນໄດ້ຮັບການສະໜັບສະໜູນ ຈາກການໂຈມຕີທາງອາກາດ ຂອງກອງທັບອາກາດຣັດເຊຍ ຊຶ່ງໄດ້ສັງຫານກຸ່ມນັກຮົບໄອເອັສ ປະມານ 20 ຄົນ ແລະ ຄາດວ່າການໂຈມຕີ ຈະຢຸດຕິລົງ ໃນວັນເສົາທີ 27 ກຸມພານີ້ ພາຍຫລັງຂໍ້ຕົກລົງຢຸດຍິງໃນຊີຣີ ຊຶ່ງມີຣັດເຊຍ ແລະ ສະຫະລັດອາເມຣິກາ ເປັນຄົນກາງ ໄດ້ຮັບການຈັດຕັ້ງປະຕິບັດ.

ແນວໃດກໍຕາມ ເຖິງແມ່ນຂໍ້ຕົກລົງດັ່ງກ່າວມີຜົນບັງຄັບໃຊ້ແລ້ວ ແຕ່ການປາບປາມກຸ່ມໄອເອັສ ຈະຍັງຄົງດຳເນີນຕໍ່ໄປ ໃນຖານະກຸ່ມທີ່ຖືກຍົກເວັ້ນ ຈາກແຜນການຢຸດຍິງ ເຊັ່ນດຽວກັນກັບກຸ່ມ ອັນ-ນຸສະຣາ ຟຣອນ ທີ່ເປັນເຄືອຂ່າຍຂອງກຸ່ມອັນກໍອຶດະ ອີກດ້ວຍ.