ສຳນັກຂ່າວຕ່າງປະເທດ ລາຍງານໃນວັນທີ 26 ກຸມພານີ້ວ່າ ລັດຖະບານມຽນມາ ໄດ້ດຳເນີນໂຄງການ ຂຸດຮ່ອງນ້ຳຂະໜາດໃຫຍ່ ຜ່ານທົ່ງນາເຂດທົ່ງພຽງປາກແມ່ນ້ຳອິຣະວະດີ ເພື່ອເປັນຮ່ອງລະບາຍນ້ຳ ປ້ອງກັນນ້ຳຖ້ວມພື້ນທີ່ກະສິກຳ, ຟາມລ້ຽງສັດ ແລະ ຊັບສິນຂອງປະຊາຊົນ ທີ່ອາໄສຢູ່ບໍລິເວນດັ່ງກ່າວ ຊຶ່ງເປັນເຂດທີ່ມັກເກີດໄພນ້ຳຖ້ວມໃນທຸກໆປີ ເມື່ອລະດູຝົນຫາກມາເຖິງ.
ແຫລ່ງຂ່າວບໍ່ໄດ້ລະບຸລາຍລະອຽດ ກ່ຽວກັບຂະໜາດ, ຄວາມຍາວ ແລະ ມູນຄ່າໂຄງການ ໂດຍລະບຸພຽງແຕ່ວ່າ ໂຄງການດັ່ງກ່າວ ຈະສາມາດປ້ອງກັນນ້ຳຖ້ວມນາ ພາຍໃນພື້ນທີ່ຊຶ່ງຖືເປັນອູ່ເຂົ້າອູ່ປາຂອງປະເທດ.
ທັງນີ້ ເນື່ອງຈາກປັດຈຸບັນ ຫລາຍພື້ນທີ່ຂອງປະເທດມຽນມາ ກຳລັງປະສົບບັນຫາໄພແຫ້ງແລ້ງ ໂດຍລັດຖະບານມຽນມາ ໄດ້ອີງອາໄສໄລຍະດັ່ງກ່າວນີ້ ເລັ່ງລົງມືຂຸດຮ່ອງລະບາຍນ້ຳດັ່ງກ່າວ ໃຫ້ສຳເລັດໂດຍໄວ ແລະ ມີກຳນົດໃຫ້ສຳເລັດ ກ່ອນລະດູຝົນຈະມາເຖິງໃນອີກບໍ່ເທົ່າໃດເດືອນຂ້າງໜ້ານີ້.