ສຳນັກຂ່າວຕ່າງປະເທດ ລາຍງານໃນວັນທີ 26 ກຸມພານີ້ວ່າ ເກີດເຫດມືປືນບຸກຍິງຢູ່ໂຮງງານຜະລິດຈັກຕັດຫຍ້າ Excel ໃນເມືອງເຮສຕັນ ລັດແຄນຊັສ ໃນມື້ວານນີ້ (ຕາມເວລາໃນທ້ອງຖິ່ນ) ເຮັດໃຫ້ມີຜູ້ເສຍຊີວິດ 4 ຄົນ ໃນນັ້ນລວມທັງມືປືນຜູ້ກໍ່ເຫດ 1 ຄົນ ຊຶ່ງເປັນພະນັກງານພາຍໃນໂຮງງານດັ່ງກ່າວເອງ ແລະ ມີຜູ້ໄດ້ຮັບບາດເຈັບອີກ 14 ຄົນ ໂດຍຜູ້ກໍ່ເຫດໄດ້ຖືກເຈົ້າໜ້າທີ່ຕຳຫລວດ ຍິງເສຍຊີວິດຄາບ່ອນກໍ່ເຫດ.

ທ່ານ ທີ ວອນຕັນ ເຈົ້າເມືອງເຮສຕັນ ກ່າວວ່າ ເບື້ອງຕົ້ນຍັງບໍ່ຮູ້ຂໍ້ມູນເຫດຈູງໃຈ ທີ່ເຮັດໃຫ້ກຳມະກອນຜູ້ກໍ່ເຫດ ລົງມືຍິງເພື່ອນຮ່ວມງານ ໃນໂຮງງານທີ່ຕົນເອງເຮັດວຽກຢູ່ ແຕ່ເຊື່ອແນ່ວ່າ ບໍ່ກ່ຽວຂ້ອງກັບການກໍ່ການຮ້າຍ.