ກອງປະຊຸມສ້າງຄວາມເຂັ້ມແຂງ ໃຫ້ແກ່ແມ່ຍິງ ແລະ ຄວາມສະເໝີພາບ ລະຫວ່າງຍິງ-ຊາຍ ໃນຊຸມຊົນເສດຖະກິດອາຊຽນ, ໂດຍການສະໜັບສະໜູນຂອງ ລັດຖະບານສະຫະລັດອາເມລິກາ, ໄດ້ຈັດຂຶ້ນໃນວັນທີ 25 ກຸມພານີ, ທີ່ນະຄອນຫລວງວຽງຈັນ, ເພື່ອແນໃສ່ການສົ່ງເສີມຄວາມສາມັກຄີ ເປັນໜຶ່ງດຽວພາຍໃນອາຊຽນ, ໂດຍການສ້າງຄວາມເຂັ້ມແຂງ ໃຫ້ແກ່ບົດບາດຂອງແມ່ຍິງ, ຄວາມສະເໝີພາບລະຫວ່າງຍິງ-ຊາຍ ແລະ ເພື່ອບັນລຸເປົ້າໝາຍ ວິໄສທັດປະຊາຄົມອາຊຽນໃນປີ 2025.
ທ່ານນາງ ມິກິ ໄຊເດວ ຜູ້ຕາງໜ້າສະຖານທູດສະຫະລັດອາເມລິກາປະຈໍາລາວ ໄດ້ກ່າວຕໍ່ທີປະຊຸມວ່າ: ພວກເຮົາຮັບຮູ້ດີວ່າ ຈະມີຫລາຍວຽກງານທີ່ຕ້ອງເຮັດ ແລະ ປະເຊີນກັບບັນຫາຕ່າງໆທີ່ອາດເກີດຂຶ້ນ, ຊຶ່ງຖ້າພວກເຮົາຮ່ວມມືກັນໜັກແໜ້ນກວ່າເກົ່າ ກໍຈະສາມາດບັນລຸເປົ້າໝາຍຂອງປະຊາຄົມອາຊຽນໄດ້ເປັນຢ່າງດີ.
ມີແມ່ຍິງຫລາຍຮ້ອຍລ້ານຄົນໃນອາຊຽນ ແລະ ພວກເຂົາລ້ວນແຕ່ມີບົດບາດສໍາຄັນ ໃນຫລາຍໆໜ້າທີ່ວຽກງານ, ນັບທັງດ້ານສັງຄົມ, ວັດທະນະທໍາ, ການເມືອງ ແລະ ການພັດທະນາເສດຖະກິດ ຢູ່ໃນຂົງເຂດພາກພື້ນນີ້, ສະນັ້ນ ການສ້າງຄວາມເຂັ້ມແຂງໃຫ້ແກ່ແມ່ຍິງ ແມ່ນປັດໃຈຂັບເຄື່ອນສໍາຄັນ ໃນການຫລຸດຜ່ອນຄວາມທຸກຍາກ ແລະ ກ້າວສູ່ຄວາມຈະເລີນກ້າວໜ້າ ຂອງບັນດາປະເທດໃນພາກພື້ນນີ້.
ອົງການພັດທະນາສາກົນຂອງສະຫະລັດອາເມລິກາ (USAID) ໄດ້ໃຫ້ທຶນສະໜັບສະໜູນຫລາຍກວ່າ 120 ພັນໂດລາສະຫະລັດ ເພື່ອສົ່ງເສີມຫລາຍກິດຈະກໍາເພື່ອຄວາມກ້າວໜ້າຂອງແມ່ຍິງ ເຊັ່ນ: ກອງປະຊຸມປຶກສາຫາລື, ການສຶກສາຄົ້ນຄວ້າ, ການຢ້ຽມຢາມຕ່າງໆ, ເຊິ່ງເປັນສ່ວນໜຶ່ງຂອງຂະບວນການລວມສູນອາຊຽນ ແລະ ວຽກງານດັ່ງກ່າວນອນໃນໂຄງການອາຊຽນ-ຢູເອສ ໂປຣເກຣດ (ASEAN-US PROGRESS).
ແຫລ່ງຂ່າວ:
