ເຈົ້າໜ້າທີ່ໜ່ວຍງານຕ້ານ ແລະສະ ກັດກັ້ນຢາເສບຕິດ ປກສ ເມືອງຄຳເກີດ ແຂວງບໍລິຄຳໄຊ ໄດ້ນຳກຳລັງ ພ້ອມດ້ວຍພາກສ່ວນທີ່ກຽ່ວຂ້ອງເຂົ້າກວດຄົ້ນເຮືອນຂອງນາງ ຢີ່ ລໍ່ ອາຍຸ 28 ປີ ຢູ່ບ້ານໜອງ ປອງ ເມືອງຄຳເກີດ ແຂວງບໍລິຄຳໄຊ ໃນຂໍ້ຫາຄ້າຂາຍຢາເສບຕິດປະເພດຢາບ້າ.
ໃນຄັ້ງວັນທີ 18 ມັງ ກອນ 2016 ເຈົ້າໜ້າທີ່ໜ່ວຍງານຕ້ານ ແລະສະກັດກັ້ນຢາເສບຕິດ ປກສ ເມືອງຄຳເກີດ ແຂວງບໍລິຄຳໄຊຮັບແຈ້ງຄວາມຈາກພົນລະເມືອງດີວ່າ ມີການມົ້ວສຸມແລະຄ້າ-ຂາຍຢາເສບຕິດຈິ່ງໄດ້ວາງ ກຳລັງຕິດຕາມການເຄື່ອນໄຫວຂອງເປົ້າໝາຍສົງໄສຢູ່ເຂດບ້ານໜອງປອງເມືອງຄຳເກີດ ແຂວງບໍລິຄຳໄຊ ຜ່ານການຕິດຕາມເຫັນວ່າແຫຼ່ງຂ່າວທີ່ໄດ້ມາແມ່ນມີມູນຄວາມຈິງແທ້ ແລະທາງເຈົ້າໜ້າທີ່ຕຳຫຼວດພ້ອມພາກສ່ວນທີ່ກ່ຽວຂ້ອງຈິ່ງໄດ້ເຂົ້າກວດຄົ້ນເຄຫາສະຖານເຊິ່ງເປັນ (ເຮືອນ) ຂອງນາງ ຢີ່ ລໍ່ ອາຍຸ 28 ປີຢູ່ບ້ານໜອງປອງ ເມືອງ ຄຳເກີດແຂວງບໍລິຄຳໄຊ ຜ່ານການກວດຄົ້ນເຄຫະສະຖານຕົວຈິງໄດ້ພົບເຫັນຢາເສບຕິດປະເພດຢາບ້າຈຳນວນ 1 ມັດລວມມີ 1.984 ເມັດ ສະນັ້ນທາງເຈົ້າໜ້າທີ່ຈິ່ງໄດ້ກັກຕົວຜູ້ຖືກຫາ ນາງ ຢີ່ລໍ່ໄປ ປກສ ເມືອງເພື່ອທຳການສືບສວນ-ສອບສວນ.
ຕາມການສືບສວນ-ສອບສວນຂອງ ເຈົ້າໜ້າທີ່ ນາງ ຢີ່ລໍ່ ໄດ້ຮັບສາລະພາບ ຕໍ່ເຈົ້າໜ້າທີ່ວ່າໃນເບື້ອງຕົ້ນມີຊາຍຄົນໜຶ່ງມາສົ່ງໃຫ້ຢູ່ແຄມທາງເລກ 8 A ໃກ້ກັບປ້ຳນ້ຳມັນແຫ່ງໜຶ່ງ ແລະໄດ້ຊື້ເອົາມາຈຳນວນ 1 ມັດລວມມີ 1.984 ເມັດ ໃນລາຄາ 34 ພັນບາດ ແລ້ວນຳເອົາຢາບ້າທີ່ຊື້ມາໄປຊຸກເຊື່ອງໄວ້ໃນຕູ້ເຄື່ອງນຸ່ງພາຍໃນຫ້ອງນອນຂອງຕົນ ແຕ່ພໍຕົກຮອດເວລາ 15 ໂມງຂອງວັນດຽວກັນກໍຖືກເຈົ້າໜ້າທີ່ຕຳຫຼວດນຳກຳລັງເຂົ້າກວດຄົ້ນພົບເຫັນຢາບ້າທີ່ຕົນໄດ້ຊຸກເຊື່ອງໄວ້ຈຳນວນ 1 ມັດ ຕໍ່ກັບການຮັບສາລະພາບ ແລະຂອງກາງທີ່ມີເຈົ້າໜ້າທີ່ຕຳຫຼວດຈິ່ງໄດ້ກັກຕົວນາງ ຢີ່ ລໍ່ ມາດຳເນີນຄະດີຕາມລະບຽບກົດໝາຍ ແລະຂະຫຍາຍຜົນຫາຜູ້ທີ່ຮ່ວມຂະບວນການຕື່ມອີກ.