ເມື່ອອາທິດຜ່ານມາທີ່ຊານຟຣານຊິດໂກ, ລັດແຄລິຟໍເນຍຜູ້ແທນການຄ້າປະເທດສະຫະລັດອາເມລິກາ ທ່ານ ໄມໂຄ ໂຟຣແມນ ແລະ ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າຂອງ ສປປ ລາວ ໄດ້ເຊັນສັນຍາການຄ້າ ແລະ ການລົງທຶນສອງຝ່າຍຊຶ່ງທັງສອງໄດ້ເປັນປະທານຮ່ວມກອງປະຊຸມລັດຖະມົນຕີເສດຖະກິດອາຊຽນ-ອາເມລິກາ.
ສັນຍາການຄ້າ ແລະ ການລົງທຶນແມ່ນເວທີໃຫ້ປະເທດສະຫະລັດອາເມລິກາ ແລະ ສປປ ລາວ ສາມາດປຶກສາຫາລືກ່ຽວກັບບັນຫາການຄ້າ ແລະ ການລົງທຶນເພື່ອເສີມຂະຫຍາຍສາຍສຳພັນເສດຖະກິດສອງຝ່າຍໂດຍຜ່ານການອຳນວຍຄວາມສະດວກທາງດ້ານການຄ້າ, ສິ່ງກີດຂວາງທີ່ບໍ່ ແມ່ນພາສີ, ຊັບສິນທາງປັນຍາ, ການປົກປ້ອງສິ່ງແວດລ້ອມ ແລະການສ້າງຄວາມສາມາດ, ສັນຍານີ້ຍັງແມ່ນເວທີເພື່ອປະສານງານກ່ຽວກັບ ບັນຫາຫຼາຍຝ່າຍ ແລະ ພາກພື້ນເປັນຕົ້ນການເຊື່ອມໂຍງ AEC.
ທ່ານ ໄມໂຄ ໂຟຣແມນ ກ່າວວ່າ: ການເຊັນສັນຍາຄັ້ງນີ້ຈະແມ່ນພາຫະນະໜຶ່ງເພື່ອເສີມຂະຫຍາຍສາຍພົວພັນການຄ້າ ແລະ ການລົງທຶນ ສະຫະລັດອາເມລິກາ-ສປປ ລາວ ຊຶ່ງຈະສະທ້ອນໃຫ້ເຫັນເຖິງຄວາມຕັ້ງໃຈຂອງປະທານາທິບໍດີ ບາຣັກ ໂອບາມາ ທີ່ມີຕໍ່ອາຊຽນ ແລະ ການເພີ່ມ ໂອກາດທາງເສດຖະກິດລະຫວ່າງພວກເຮົາ.
ພິທີເຊັນສັນຍາຄັ້ງນີ້ແມ່ນຕົວບົງຊີ້ຫຼ້າສຸດທີ່ສະແດງໃຫ້ເຫັນການຮ່ວມມືທີ່ເພີ່ມຂຶ້ນລະຫວ່າງ ສປປ ລາວ ແລະປະເທດສະຫະລັດອາເມລິກາ ແລະຈັດຂຶ້ນພາຍຫຼັງກອງປະຊຸມສຸດຍອດ ອາຊຽນ-ອາເມລິກາ ສະໄໝພິເສດທີ່ຊັນນີແລນ, ລັດແຄລິຟໍເນຍຊຶ່ງເປັນປະທານຮ່ວມໂດຍ ທ່ານບາຣັກ ໂອບາມາ ປະທານາທິບໍດີ ສະຫະລັດອາເມລິກາ ແລະ ທ່ານ ຈູມມາລີ ໄຊຍະສອນ ປະທານປະເທດແຫ່ງ ສປປ ລາວ ໃນໄລຍະກອງປະຊຸມ ຄັ້ງນີ້, ບັນດາລັດຖະມົນຕີເສດຖະກິດອາຊຽນໄດ້ຟັງການບັນຍາຍຈາກບັນດາບໍລິສັດເຕັກໂນໂລຊີຊັ້ນນຳຈາກຊີລີຄອນວາລີ, ລັດແຄລິຟໍເນຍແລະປຶກສາຫາລືຊ່ອງທາງເພື່ອເສີມຂະຫຍາຍສາຍພົວພັນການຄ້າ ແລະການລົງທຶນລະຫວ່າງປະເທດສະມາຊິກອາຊຽນ ແລະປະເທດສະຫະລັດອາເມລິກາ.
ທີ່ມາ: