ສຳນັກຂ່າວຕ່າງປະເທດ ລາຍງານໃນວັນທີ 22 ກຸມພານີ້ວ່າ ໃນມື້ວານນີ້ (21 ກຸມພາ) ລັດຖະບານອັງກິດ ແລະ ອົດສະຕຣາລີ ໄດ້ອອກກ່າວເຕືອນພົນລະເມືອງຂອງຕົນ ໃຫ້ລະມັດລະວັງໄພກໍ່ການຮ້າຍຢູ່ເຂດຕ່າງໆ ໃນປະເທດມາເລເຊຍ ຊຶ່ງໃນນັ້ນແມ່ນລວມທັງນະຄອນຫລວງກົວລາລຳເປີ ອີກດ້ວຍ. ໂດຍລັດຖະບານອັງກິດ ແລະ ອົດສະຕຣາລີ ໄດ້ພ້ອມກັນອອກກ່າວເຕືອນປະຊາຊົນ ຄວນຫລີກລ່ຽງການໄປທ່ອງທ່ຽວຢູ່ມາເລເຊຍ, ພິເສດແມ່ນບັນດາເຂດທາງພາກຕາເວັນອອກ ຊຶ່ງໃນວັນດຽວກັນນັ້ນ ທ່ານ ອາມັດ ຊາຮິດ ຮາມິດີ ຮອງນາຍົກລັດຖະມົນຕີ ທັງເປັນລັດຖະມົນຕີກະຊວງພາຍໃນມາເລເຊຍ ກໍໄດ້ອອກມາຖະແຫລງວ່າ ມີພົນລະເມືອງມາເລເຊຍ 130 ກວ່າຄົນ ພວມເຄື່ອນໄຫວຢູ່ຊີຣີ ແລະ ອີຣັກ ເພື່ອເຂົ້າຮ່ວມສູ້ຮົບກັບກຸ່ມລັດອິດສະລາມ ຫລື ໄອເອັສ (IS) ໄດ້ຖືກລັດຖະບານມາເລເຊຍ ອອກຄຳສັ່ງຫ້າມບໍ່ໄດ້ກັບຄືນປະເທດ ເພື່ອແນໃສ່ປົກປັກຮັກສາສັນຕິພາບ ແລະ ສະຖຽນລະພາບຂອງມາເລເຊຍ.