ພິທີສະຫຼຸບລາຍງານຜົນສຳເລັດ ໂຄງການບູລະນະປະຕິສັງຂອນ ພິພິທະພັນຫໍພະແກ້ວ ຄັ້ງທີ III ໄລຍະທີ 1 ໄດ້ຈັດຂຶ້ນຕອນບ່າຍວັນທີ 21 ກຸມພາ 2016 ມີພະເຖລານຸເຖລະ ທ່ານ ຈູມມາລີ ໄຊຍະສອນ ປະທານປະເທດ ທ່ານ ພັນຄຳ ວິພາວັນ ກຳມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ ຮອງນາຍົກລັດຖະມົນຕີ ຫົວໜ້າຄະນະຊີ້ນຳລະດັບຊາດໂຄງການດັ່ງກ່າວ ທ່ານ ດຣ. ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ເລຂາຄະນະພັກ ເຈົ້າຄອງນະຄອນຫຼວງວຽງຈັນ ພ້ອມດ້ວຍພັນລະຍາບັນດາການນຳ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ສາຍທອງ ແກ້ວດວງດີ ຮອງເຈົ້າຄອງນະຄອນຫຼວງວຽງຈັນ ຫົວໜ້າຄະນະຮັບຜິດຊອບໂຄງການບູລະນະປະຕິສັງຂອນ ພິພິທະພັນຫໍພະແກ້ວ ໄດ້ກ່າວວ່າ: ໂຄງການບູລະນະປະຕິສັງຂອນພິພິທະພັນຫໍພະແກ້ວ ຄັ້ງທີ III ໄລຍະທີ 1 ໄດ້ເລີ່ມດຳເນີນແຕ່ວັນທີ 5 ມັງກອນ 2015 ໂດຍແມ່ນບໍລິສັດ ມີພູນຊັບກໍ່ສ້າງ ຈຳກັດຜູ້ດຽວ ເປັນຜູ້ຮັບເໝົາ ປັດຈຸບັນ ບັນດາໜ້າວຽກສຳເລັດແລ້ວ 73,8% ຄິດເປັນມູນຄ່າ 3,95 ຕື້ກວ່າກີບ ໃນນີ້ວຽກຮື້ຖອນ ແລະ ສ້ອມແປງຄືນໂຄງຫຼັງຄາ ສຳເລັດ 98,91% ຮື້ຖອນເພດານດ້ານໃນສ້ອມແປງຄືນ ແລະ ຕີເພດານດ້ານນອກ ສຳເລັດ 100% ສ້ອມແປງຊຸ້ມປະຕູປ່ອງຢ້ຽມ ແລະ ບານ ສຳເລັດ 57,32% ວຽກພື້ນສຳເລັດ 25,24% ຮື້ຝາລະບຽງ ສຳເລັດ 100% ຂັ້ນໄດ ທາງຂຶ້ນ ສຳເລັດ 15% ວຽກສີ ສຳເລັດ 33,94% ສະຫຼຸບລາຍຮັບ-ລາຍຈ່າຍເງິນບໍລິຈາກສົມທົບທຶນໂຄງການດັ່ງກ່າວ (ສັງລວມຄັ້ງທີ 6 ແຕ່ວັນທີ 1 ຕຸລາ-30 ທັນວາ 2015) ມີເງິນຍົກຍອດມາຂອງບົດສະຫຼຸບ ຄັ້ງທີ 5 ຈຳນວນ 1,49 ຕື້ກວ່າກີບ 209.410 ບາດ ແລະ 15.793 ໂດລາສະຫະລັດ ລາຍຮັບຈາກການບໍລິຈາກສົມທົບທຶນ 4,5 ລ້ານກີບ ລວມລາຍຮັບທັງໝົດ 1,5 ຕື້ກວ່າກີບ ລາຍຈ່າຍ 1,2 ຕື້ກວ່າກີບ ຈຳນວນເງິນທີ່ຍັງເຫຼືອ 299,48 ລ້ານກວ່າກີບ 209.410 ບາດ ແລະ 15.793 ໂດລາ ແລະ ວັດສະດຸມູນຄ່າ 1,5 ລ້ານກວ່າກີບ ໂດຍເງິນຈຳນວນດັ່ງກ່າວ ໄດ້ຝາກໄວ້ທະນາຄານພັດທະນາລາວ.
ປັດຈຸບັນໜ້າວຽກທີ່ຍັງຄ້າງ ໄລຍະທີ 1 ທີ 2 ແລະ ທີ 3 ແມ່ນ 26,2% ຄິດເປັນມູນຄ່າ 1,4 ຕື້ ກວ່າກີບ.
ແຫລ່ງຂ່າວ:
