ໂຄງການກໍ່ສ້າງເສັ້ນທາງແຕ່ເມືອງຫີນເຫີບ-ເມືອງຊະນະຄາມ ຊຶ່ງເປັນທາງສາຍຍຸດທະສາດສາຍສຳຄັນຂອງແຂວງວຽງຈັນ ມີຄວາມຄືບໜ້າແລ້ວ 30%, ໜ້າວຽກຕົ້ນຕໍ ແມ່ນ ສຳເລັດການບຸກເບີກໜ້າທາງ ເພື່ອເຮັດໃຫ້ການສັນຈອນຕາມຊ່ວງທາງນີ້ບໍ່ຕິດຂັດແຕ່ ທຽບໃສ່ແຜນການຫຼ້າຊ້າເຖິງ 20%.
ທ່ານ ສົມສຸກ ຄຳມຸງຄຸນ ຮອງຂະແໜງຄຸ້ມຄອງທາງບົກ-ທາງນ້ຳທັງເປັນຜູ້ປະສານງານໂຄງການກໍ່ສ້າງທາງຫີນເຫີບ-ຊະນະຄາມໃຫ້ສຳພາດຫວ່າງບໍ່ດົນມານີ້ວ່າ: ໂຄງການກໍ່ສ້າງທາງເມືອງຫີນເຫີບ-ເມືອງເຟືອງ-ເມືອງໝື່ນ- ເມືອງຊະນະຄາມ ມີຄວາມຍາວ 132 ກິໂລແມັດ, ມີຂົວເບຕົງອັດແຮງຕາມມາດຕະຖານທາງຫຼວງແຫ່ງຊາດ 15 ແຫ່ງຍາວ 660 ແມັດ, ມີທໍ່ດາ ໂລ່ 10 ຈຸດ ໂດຍແມ່ນບໍລິສັດເຮືອງສີກໍ່ສ້າງຂົວ-ທາງ ຈຳກັດ ຜູ້ດຽວເປັນຜູ້ລົງທຶນກ່ອນ 100% ໃນມູນຄ່າ 1.336 ຕື້ກວ່າກີບ ຊຶ່ງໄດ້ເລີ່ມລົງມືກໍ່ສ້າງມາແຕ່ວັນທີ 1 ມີນາ 2013 ມີ ໄລຍະກໍ່ສ້າງຕາມສັນຍາ 5 ປີໃຫ້ສຳເລັດ.
ໂຄງສ້າງຂອງທາງເສັ້ນນີ້ເປັນທາງປູຢາງສອງຊັ້ນມີລວງກວ້າງແຕກຕ່າງກັນຄື: ທາງປົກກະຕິກວ້າງ 10 ແມັດ ປູຢາງຊັ້ນໜຶ່ງ 9 ແມັດ, ຊັ້ນສອງ 8 ແມັດ, ທາງເທສະບານຜ່ານເມືອງຫີນເຫີບ, ເມືອງເຟືອງ, ເມືອງໝື່ນກວ້າງ 18 ແມັດ, ຜ່ານເທສະບານເມືອງຊະນະຄາມ 22 ແມັດ, ມີໄຟຟ້າເຢືອງທາງຄົບຊຸດ, ມີທາງຄົນຍ່າງ, ລະບົບລະບາຍນ້ຳຂ້າງທາງສອງເບື້ອງ.
ຜ່ານການຈັດຕັ້ງປະຕິບັດມາຮອດປະຈຸບັນນີ້ວຽກທັງໝົດໄດ້ຄືບໜ້າໄປແລ້ວ 30% ໃນນີ້ ໄດ້ສຳເລັດການບຸກເບີກຂະຫຍາຍໜ້າທາງ ແຕ່ເມືອງເຟືອງ-ບ້ານວັງ-ປາກຊາວສຳເລັດປະມານ 100 ກິໂລແມັດ ຕາມການອອກແບບເຮັດໃຫ້ການສັນຈອນມີຄວາມສະດວກສະບາຍຂຶ້ນ, ທ່ານຜູ້ປະສານງານໂຄງການກ່າວອີກວ່າ ເພື່ອເຮັດໃຫ້ການກໍ່ສ້າງໃນໂຄງການນີ້ໄວຂຶ້ນພະແນກ ຍທຂ ແຂວງວຽງຈັນໄດ້ຊຸກຍູ້ໃຫ້ບໍລິສັດປັບແຜນ ແລະວິທີການຈັດຕັ້ງປະຕິບັດໂຄງ ການຄືນໃໝ່ຄື: ສຳລັບປີ 2016 ນີ້ໃຫ້ບໍລິສັດຖອນກຳລັງກົນຈັກທີ່ຈະແຈກກະຈາຍຢູ່ແຕ່ລະຈຸດນັ້ນໃຫ້ເຂົ້າຕະລຸມບອນປູຢາງຢູ່ເທສະບານ ເມືອງເຟືອງຈຸດດຽວໃຫ້ສຳເລັດພາຍໃນປີ 2016 ນີ້ສາກ່ອນ, ຫຼັງຈາກນັ້ນຈະສືບຕໍ່ປູຢາງເປັນຊ່ວງໄປໃສ່ເຂດຜາສັງ, ເມືອງໝື່ນ, ບ້ານວັງ-ປາກຊາວ ແລະຕໍ່ໆໄປຈົນ.
ສຳລັບປະຈຸບັນໄດ້ມີການນຳທີມງານເຂົ້າໄປວາງທໍ່ຂ້າມທາງແຕ່ເມືອງເຟືອງຈົນຮອດບ້ານວັງໃຫ້ສຳເລັດ ແລະ ໃນວັນທີ 19 ກຸມພານີ້ກໍມີການມ້າງຂົວ ບ້ານດອນທີ່ເມືອງເຟືອງ ເພື່ອປ່ຽນເປັນທໍ່ດາໂລໃຫຍ່ໃສ່ແທນ, ສ່ວນວຽກຂົວຈະເລີ່ມລົງມືໃນປີ 2017 ເປັນຕົ້ນໄປ, ຄຽງຄູ່ກັນນີ້ຜູ້ຮັບເໝົາຍັງໄດ້ກະກຽມວັດສະດຸເພື່ອກຽມປູຢາງໃນເທສະບານເມືອງ ເຟືອງເຊັ່ນ: ໄດ້ມີການຊື້ໂຮງຂົບຫີນຂະໜາດໃຫຍ່ມາຕິດຕັ້ງເປັນທີ່ຮຽບຮ້ອຍແລ້ວ ຊຶ່ງສາມາດຜະລິດໄດ້ 500-600 ແມັດກ້ອນຕໍ່ມື້ ແລະຈະສ້າງທໍ່ດາໂລໃຫ້ສຳເລັດ 6 ຈຸດ ໃນຈຳນວນທໍ່ດາໂລທັງໝົດ 10 ຈຸດຍາວ100 ແມັດ, ກຽມຫີນ- ຊາຍ ແລະວັດສະດຸອື່ນໆໄວ້ອີກຈຳນວນໜຶ່ງ.
ນອກນີ້ຍັງໄດ້ມີການຕິດຕັ້ງໂຮງງານເບຕົງຢູ່ເມືອງໝື່ນສຳເລັດ ຊຶ່ງສາມາດຜະລິດທໍ່ໄດ້ມື້ລະ 90 ໜ່ວຍ ແລະອີກໜຶ່ງແຫ່ງຢູ່ເມືອງເຟືອງຜະລິດໄດ້ມື້ລະ 40 ໜ່ວຍ, ໄດ້ຕິດຕັ້ງແທ່ງປູນຈຳນວນ 3 ຈຸດ ເພື່ອຮັບປະກັນການສະນອງປູນໃຫ້ພຽງພໍກັບຄວາມຕ້ອງການ ຂະນະທີ່ທາງປູຢາງເກົ່າທີ່ມີແລ້ວໃນເມືອງຫີນເຫີບ, ໝື່ນ ແລະເມືອງຊະນະຄາມໃຫ້ຮັກສາໄວກ່ອນ.
ທີ່ມາ: ນສພ ເສດຖະິກດ-ສັງຄົມ
