ບ່າຍ 2 ໂມງຂອງວັນທີ 18 ກຸມພາ 2016 ທີ່ຜ່ານມາ ເຈ້ຍປາຊິຟິກດາລານັກຮ້ອງ ນັກສະແດງຊື່ດັງຂອງລາວ ໄດ້ໂພສຂໍ້ຄວາມໃນໜ້າເຟສບຸກຂອງຕົນເອງ ໃນລັກສະນະທີ່ຕ່ຳຕ້ອຍນ້ອຍໃຈວ່າ “ຂ້ອຍ ພູມຊະນະ ສິລິວົງສາ (phoumsana.sirivongsa) ຫຼື ເຈ້ຍ ປາຊີຟິກ ຈະບໍ່ສ້າງ ຮູບເງົາອີກແລ້ວ. ເຫັນແບບນີ້ແລ້ວມັນກະເຮັດໃຫ້ຄົນຜູ້ສ້າງ ຮູບເງົາ ຄືເຮົາ ( ບໍ່ ຢາກເຮັດຮູບເົງາອີກແລ້ວ ) ກ່ອນເຮົາຈະສ້າງ ຮູບເງົາເລື່ອງໜຶ່ງອອກມາ ເຮົາອຸທິດທັງກາຍ ແລະ ໃຈ ທຸ້ມແຮງ ທຸ້ມເງີນລົງໄປ ໃຊ້ເວລາກັບມັນເປັນປີກວ່າຈະອອກມາໄດ້ໜຶ່ງເລື່ອງ. ວົງການຮູບເງົາລາວເຮົາກໍາລັງຈະກ້າວ ຂໍຮ້ອງຢ່າເຮັດໃຫ້ມັນດັບລົງເລີຍ ຂ້ອຍບໍ່ໄດ້ເວົ້າເພື່ອໂຕຂ້ອຍເອງ ແຕ່ຂ້ອຍຂໍເວົ້າແທນ ທຸກຄົນທີ່ກໍາລັງສ້າງຮູບເງົາ ຖ້າເຮົາຄົນລາວບໍ່ຊ່ວຍກັນ ສະໜັບສະໜູນກັນ ອີກ 2 ປີຕໍ່ໜ້າໄປ ເຮົາຈະບໍ່ມີຮູບເງົາລາວໃຫ້ເບິ່ງ ເພາະຜູ້ສ້າງໄປບໍ່ລອດ ແລະ ຕ້ອງໄປເຮັດວຽກອື່ນ. ຄືກັນກັບຂ້ອຍຕອນນີ້ ຂ້ອຍຍອມພວກເຈົ້າແລ້ວ. ລາກ່ອນ ຮູບເງົາ ທີ່ຂ້ອຍຮັກ.”
ໃນຂະນະດຽວກັນກໍໄດ້ອອກຄລິບຢືນຢັນວ່າຈະຢຸດເຊົາການສ້າງຮູບເງົາຢ່າງແນ່ນອນ ແຕ່ບໍ່ຍອມເປີດເຜີຍເຫດຜົນທີ່ແທ້ຈິງຂອງການຢຸດສ້າງຮູບເຮົາ. ຈາກຄລິບຜູ້ກ່ຽວໄດ້ເວົ້າໃນລັກສະນະທີ່ມີບັນຫາບາງຢ່າງມາກະທົບໃສ່ຢ່າງໜັກໜ່ວງ ຄ້າຍຄືວ່າຜົນງານທີ່ສ້າງຂຶ້ນມານອກຈາກຈະບໍ່ໄດ້ຮັບການສະໜັບສະໜຸນ ຊ້ຳບໍ່ພໍຍັງຖືກຢຽບຍ່ຳ.
ເຈ້ຍປາຊິຟິກໄດ້ເລົ່າເຖິງການສ້າງຮູບເງົາໃນໄລຍະທີ່ຜ່ານມານັ້ນລົງທຶນຫຼາຍແຕ່ບໍ່ມີກຳໄລ ແຕ່ວ່າເຮັດດ້ວຍຈິດໃຈທີ່ມັກຮັກໃນວິຊານີ້. ຕອນໜຶ່ງທີ່ສຳຄັນເຈ້ຍໄດ້ເວົ້າເຖິງຜົນປະໂຫຍດທີ່ໄດ້ຈາກໜັງຕໍ່ສັງຄົມລາວຢ່າງລະອຽດ ວ່າການສ້າງໜັງມັນສ້າງລາຍໄດ້ໃຫ້ຫຼາຍໆຄົນ ນັບຕັ້ງແຕ່ຄົນຂາຍໝາກຝຣັ່ງໜ້າໂຮງໜັງ, ຄົນລ້າງຫ້ອງນ້ຳ, ເຖິງສະຖານທີ່ທ່ອງທ່ອງທ່ຽວທີ່ໄດ້ໄປຖ່າຍທຳ. ໃນຂະນະດຽວກັນກໍໄດ້ປຽບທຽບລາຄາເຂົ້າຊົມຮູບເງົາລະຫວ່າງຮູບເງົາລາວກັບຮູບເງົາຕ່າງປະເທດມາໃຫ້ຢ່າງລະອຽດຈະແຈ້ງ. ແລະຕອນທ້າວ ເຈ້ຍ ຝາກໃຫ້ກຳລັງໃຈຜູ້ທີ່ຈະສ້າງຮູບເງົາຈົ່ງສູ້ຕໍ່ໄປ ພ້ອມທັງຝາກເຖິງແຟນໆ ຂໍໃຫ້ໄປສະໜັບສະໜຸນຜົນງານຂອງຄົນລາວໃຫ້ຫຼາຍຂຶ້ນ.
ໃນໄລຍະທີ່ຜ່ານມາ ເຈ້ຍປາຊິຟິກເປັນດາລາລາວຜູ້ໜຶ່ງທີ່ມີຊື່ສຽງໂດ່ງດັງ ເພງແຕ່ລະເພງທີ່ອອກມາລ້ວນແຕ່ໄດ້ຮັບຄວາມນິຍົມຊົມຊອບ, ໜັງແຕ່ລະເລື່ອງທີ່ອອກມາກໍໄດ້ຮັບຄວາມນິຍົມຊົມຊອບຈາກແຟນໆ ເກີນຄາດໝາຍເຊັ່ນດຽວກັນ ໂດຍສະເພາະແມ່ນໜັງ ຮັກອ່ຳລ່ຳ ແລະຮັກອິຫຼີ (ທັງພາກໜຶ່ງແລະສອງ) ລວມທັງບຸກຄະລິກສ່ວນຕົວຂອງເຈ້ຍກໍເປັນຄົນບໍ່ຖືເນື້ອຖືຕົວ ເຈ້ຍຈຶ່ງເປັນທີ່ຮັກແລະນິຍົມຊົມຊອບຂອງແຟນໆ ດ້ວຍດີຕະຫຼອດມາ.