ສຳນັກຂ່າວຕ່າງປະເທດ ລາຍງານໃນວັນທີ 19 ກຸມພານີ້ວ່າ ອົງການອະນາໄມໂລກ ຫລື WHO ໄດ້ອອກມາເປີດເຜີຍວ່າ ຈົນຮອດປັດຈຸບັນນີ້ ອົງການອະນາໄມໂລກ ຕ້ອງໄດ້ນຳໃຊ້ເງິນ ປະມານ 457.7 ຕື້ກີບ ໃນການຕໍ່ສູ້ກັບໄວຣັສຊີກ້າ ໂດຍຈຳນວນີ້ຈະຕ້ອງໄດ້ນຳໃຊ້ ຮອດເດືອນມິຖຸນາ ເພື່ອຮີບຮ້ອນຜະລິດຢາວັກແຊັງ ແລະ ເພື່ອກວດວິເຄາະວ່າ ເຊື້ອໄວຣັສດັ່ງກ່າວທີ່ມີຍຸງລາຍເປັນພາຫະນະນັ້ນ ແຜ່ລະບາດໄດ້ຄືແນວໃດ ເພື່ອຊອກຫາວິທີການຄວບຄຸມການແຜ່ລະບາດ.

ອົງການອະນາໄມໂລກລະບຸວ່າ ງົບປະມານຈຳນວນດັ່ງກ່າວ ຈະຈັດສັນໃຫ້ແກ່ສຳນັກງານໃຫຍ່ ແລະ ສຳນັກງານປະຈຳພາກພື້ນ ຂອງອົງການອະນາໄມໂລກ ຕະຫລອດຮອດໜ່ວຍງານທີ່ເຮັດວຽກຮ່ວມກັນເຊັ່ນ ອົງການກອງທຶນເພື່ອເດັກແຫ່ງສະຫະປະຊາຊາດ ຫລື ອຸຍນີເຊບ ຊຶ່ງຫວັງວ່າຈະໄດ້ຮັບການສະໜັບສະໜູນ ຈາກບັນດາປະເທດ ແລະ ໜ່ວຍງານຜູ້ບໍລິຈາກຕ່າງໆ.