ສຳນັກຂ່າວຕ່າງປະເທດ ລາຍງານໃນວັນທີ 18 ກຸມພາຜ່ານມານີ້ວ່າ ທ້າວ ອາມິດ ຣັສໂຕກີ ເຈົ້າບ່າວຊາວອິນເດຍ ອາຍຸ 28 ປີ ເສຍຊີວິດລະຫວ່າງພິທີງານດອງ ເນື່ອງຈາກຖືກລູກປືນ ທີ່ຖືກຜູ້ຮ່ວມງານຍິງຂຶ້ນ ເພື່ອສະຫລອງງານແຕ່ງດອງ ຢູ່ລັດອຸດຕະຣະປະເທດ ໂດຍການຍິງປືນໃນພິທີງານແຕ່ງດອງນີ້ ແມ່ນເປັນສິ່ງທີ່ນິຍົມເຮັດຢູ່ປະເທດອິນເດຍ ອັນເປັນສາເຫດເຮັດໃຫ້ ມີການເສຍຊີວິດເກີດຂຶ້ນ ເປັນແຕ່ລະໄລຍະ ຍ້ອນຖືກລູກຫລົງ.
ແຫລ່ງຂ່າວໄດ້ລະບຸວ່າ ເຈົ້າບ່າວຕົກລົງຈາກຫລັງມ້າທັນທີ ເມື່ອຖືກລູກກະສຸນປືນເຂົ້າບໍລິເວນຫົວ ຈາກນັ້ນຈຶ່ງຖືກນຳຕົວສົ່ງໂຮງໝໍ ແຕ່ກໍບໍ່ສາມາດຊ່ວຍຊີວິດໄວ້ທັນ ເຮັດໃຫ້ເຂົາເສຍຊີວິດ ໃນຂະນະທີ່ຢູ່ໂຮງໝໍ.