ວັນທີ 18 ກຸມພາ ນີ້ ທ່ານ ພັນທອງ ພິມທຸມມາ ລັດຖະມົນຕີຊວ່ຍວ່າການກະຊວງອຸດສາຫະກຳ ແລະການຄ້າ ພ້ອມຄະນະລົງຊຸກຍູ້ວຽກງານປັບປຸງ ແລະ ດັດສົມໂຮງງານປຸງແຕ່ງໄມ້ຢູ່ແຂວງເຊກອງ ໂດຍການຕ້ອນຮັບຂອງທ່ານ ເຫຼັກໄຫຼ ສີວິໄລ ຮອງເຈົ້າແຂວງເຊກອງຜູ້ຊີ້ນຳວຽກງານເສດຖະກິດ, ມີສະພາອຸດສາຫະກຳ ແລະການຄ້າແຂວງ, ຮອງເຈົ້າເມືອງ 4 ຕົວເມືອງ, ຄະນະກຳມະການປັບປຸງ ແລະດັດສົມໂຮງງານປຸງແຕ່ງໄມ້ແຂວງ-ເມືອງ ພ້ອມດ້ວຍຄະນະພະແນກອ້ອມຂ້າງແຂວງເຂົ້າຮ່ວມ.
ທ່ານ ສິມມາ ດ້ວງເສລີ ຮອງຫົວໜ້າພະແນກອຸດສາຫະກຳ ແລະການຄ້າ ແຂວງເຊກອງໄດ້ກ່າວວ່າ: ໃນປະຈຸບັນ ທົ່ວແຂວງເຊກອງມີໂຮງງານປຸງແຕ່ງໄມ້ ທັງໝົດ 35 ແຫ່ງ ມີໂຮງງານປຸງແຕ່ງໄມ້ 13 ແຫ່ງ ແລະໂຮງງານເຟີນີເຈີຂະໜາດນອ້ຍແບບຄອບຄົວ 22 ແຫ່ງ, ໂຮງງານເຟີນີເຈີຂະໜາດນ້ອຍແບບຄອບຄົວທີ່ບໍ່ໄດ້ຮັບການອະນຸຍາດ ມີ 61 ຫົວໜ່ວຍ, ສ່ວນເປົ້າໝາຍການຜະລິດແມ່ນຜະລິດຮັບໃຊ້ໃນເຂດກຸ່ມບ້ານ ແລະເມືອງ ໃນນັ້ນຜະລິດຕະພັນຕົ້ນຕໍແມ່ນປະເພດໄມ້ວົງກົບ, ບານປະຕູ, ບານປ່ອງຢ້ຽມ, ຕູ້, ໂຕະ, ຕັ່ງ ໂດຍນຳ ໃຊ້ໄມ້ທີ່ເກັບຊື້ຈາກປະຊາຊົນ ໂດຍຜ່ານການຕິດຕາມ, ກວດກາ ແລະການເກັບກຳຂໍ້ມູນຂອງຄະນະກຳມະການປັບປຸງ ແລະດັດສົມໂຮງງານປຸງແຕ່ງໄມ້ຂັ້ນແຂວງ-ເມືອງໃນໄລຍະຜ່ານມາ ໄດ້ຊີ້ນຳ ແລະເອື້ອອຳນວຍຄວາມສະດວກໃຫ້ບັນດາໂຮງງານອຸດສາຫະກຳປຸງແຕ່ງໄມ້ ແລະເຟີນີເຈີ ຢູ່ແຂວງເຊກອງໄດ້ມີການພັດທະນາຕົນເອງ ແລະມີການເຄື່ອນໄຫວພາຍໃຕ້ລະບຽບກົດໝາຍ, ພັດທະນາສີມືແຮງງານ, ມີຂະບວນການປຸງແຕ່ງ, ລະບົບມາດຕະຖານໂຮງງານຖືກປັບປຸງດີຂື້ນກວ່າເກົ່າ, ໂຮງງານປຸງແຕ່ງໄມ້ສາມາດປະກອບສ່ວນເຂົ້າໃນການສ້າງລາຍຮັບຂອງແຂວງໄປພ້ອມໆກັບການສ້າງສີມືແຮງງານ ແລະສ້າງວຽກເຮັດງານທຳໃຫ້ຜູ້ມາໃຊ້ແຮງງານໄດ້ຫຼາຍກວ່າ 300 ຄົນ, ເຮັດໃຫ້ປະຊາຊົນມີລາຍຮັບທີ່ໝັ້ນຄົງຖາວອນ ແລະລົບລ້າງຄວາມທຸກຍາກໄດ້ໃນລະດັບໜຶ່ງ ນອກຈາກນີ້ ຍັງສາມາດຫຼຸດຜ່ອນການສົ່ງອອກເປັນວັດຖຸດິບໄມ້ຫັນມາສົ່ງອອກຜະລິດຕະພັນໄມ້ສຳເລັດຮູບ ແລະ ເຄິ່ງສຳເລັດຮູບໄປຕ່າງປະເທດເພື່ອສ້າງມູນຄ່າເພີ່ມຫຼາຍຂຶ້ນ.
ໃນໂອກາດດຽວກັນ ທ່ານ ພັນທອງ ພິມທຸມມາ ຍັງໄດ້ກ່າວເນັ້ນໃຫ້ຄະນະກຳມະການປັບປຸງ ແລະດັດສົມໂຮງງານປຸງແຕ່ງໄມ້ຂັ້ນແຂວງ-ເມືອງ ແລະຂະແໜງການທີ່ກ່ຽວຂ້ອງຈົ່ງພ້ອມກັນນຳ ເອົານິຕິກຳຕ່າງໆທີ່ກະຊວງອຸດສາຫະ ກຳການຄ້າວາງອອກໄປເຜີຍແຜ່ ພ້ອມທັງເອົາໃຈໃສ່ຕິດຕາມກວດກາບັນດາໂຮງງານປຸງແຕ່ງໄມ້, ເຟີນີເຈີ ເຄື່ອນໄຫວທີ່ບໍ່ຖືກຕ້ອງໃຫ້ເຂົ້າສູ່ລະບຽບກົດໝາຍຢ່າງເຂັ້ມງວດ ເພື່ອການຄຸ້ມຄອງ ແລະການປົກປັກຮັກສາລວມທັງການນຳໃຊ້ຊັບພະຍາກອນທຳມະຊາດໃຫ້ຍືນຍົງ.
ທີ່ມາ: ນສພ ເສດຖະກິດ-ສັງຄົມ
