ຂປລ. ເມື່ອບໍ່ດົນມານີ້, ທີ່ທຳນຽບປະທານປະເທດ ທ່ານ ຈູມມາລີ ໄຊຍະສອນ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ມອບສານຕາຕັ້ງໃຫ້ ທ່ານ ນາງ ວັນດີ ບຸດທະສະວົງ ເພື່ອດຳລົງຕຳແໜ່ງ ເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຄົນໃໝ່ ປະຈຳ ສາທາລະນະລັດ ປະຊາຊົນ ຈີນ, ເຊິ່ງມີສຳນັກງານສະຖານເອກອັກຄະລັດຖະທູດ ຕັ້ງຢູ່ນະຄອນຫລວງປັກກິ່ງ ແລະ ມອບສານຕາຕັ້ງໃຫ້ ທ່ານ ຄອນເພັງ ທຳມະວົງ ເພື່ອດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຄົນໃໝ່ ປະຈຳ ສາທາລະນະລັດ ສິງກະໂປ ເຊິ່ງມີສຳນັກງານສະຖານເອກອັກຄະລັດຖະທູດ ຕັ້ງຢູ່ສິງກະໂປ. 
ໃນໂອກາດດັ່ງກ່າວ, ທ່ານປະທານປະເທດໄດ້ສະແດງຄວາມຍິນດີ ແລະ ຊົມເຊີຍຕໍ່ບັນດາທ່ານ ເອກອັກຄະລັດຖະທູດຄົນໃໝ່ ທີ່ຈະໄປປະຈຳຢູ່ສອງປະເທດດັ່ງກ່າວ, ພ້ອມທັງ ໃຫ້ທິດຊີ້ນຳຢ່າງເລິກເຊິ່ງ ແລະ ໜັກແໜ້ນ ກ່ຽວກັບການປະຕິບັດໜ້າທີ່ການທູດ ໃຫ້ເກີດຜົນປະໂຫຍດສູງສຸດ ແກ່ພາລະກິດ ແຫ່ງການ ປົກປັກຮັກສາ ແລະ ສ້າງສາປະເທດຊາດ, ທັງເປັນ ການເສີມຂະຫຍາຍການພົວພັນຮ່ວມມື ລະຫວ່າງ ປະເທດໃຫ້ນັບມື້ນັບຂະຫຍາຍຕົວຂຶ້ນເປັນກ້າວໆ.
ບັນດາທ່ານເອກອັກຄະລັດຖະທູດ ກໍໄດ້ໃຫ້ຄຳໝັ້ນສັນຍາວ່າ: ຈະສຸມທຸກຄວາມພະຍາຍາມ ເພື່ອປະຕິບັດໜ້າທີ່ ທີ່ຖືກມອບໝາຍໃນຄັ້ງນີ້ ໃຫ້ສຳເລັດຜົນ ແລະ ສືບຕໍ່ເສີມ ຂະຫຍາຍການພົວພັນຮ່ວມມືທີ່ດີ ລະຫວ່າງ ສປປ ລາວ-ສປ ຈີນ ແລະ ສປປ ລາວ-ສ ສິງກະໂປ ເພື່ອນຳເອົາຜົນປະໂຫຍດສູງສຸດ ມາສູ່ປະເທດຊາດ ແລະ ປະຊາຊົນລາວ.
ສປປ ລາວ ແລະ ສປ ຈີນ ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 25 ເມສາ 1961 ແລະ ສປປ ລາວ ໄດ້ສ້າງຕັ້ງສາຍພົວພັນການທູດກັບ ສ ສິງກະໂປ ໃນວັນທີ 2 ທັນວາ 1974.
ແຫລ່ງຂ່າວ:
