ຂປລ. ວັນທີ 15 ກຸມພາ ນີ້ ທີ່ນະຄອນຫລວງວຽງຈັນ, ເອກອັກຄະລັດຖະທູດຝຣັ່ງ ປະຈໍາ ສປປ ລາວ ເປີດກອງທຶນໃໝ່ເພື່ອຊວ່ຍເຫລືອອົງການຈັດຕັ້ງທາງສັງຄົມ (PISCCA) ມູນຄ່າ 500.000ເອີໂຣ.
ທ່ານນາງ ໂກຣດິນ ເລີດູ (Claudine Ledoux) ເອກອັກຄະລັດຖະທູດຝຣັ່ງ ປະຈໍາສປປ ລາວ ກ່າວວ່າ: ປະເທດຝຣັ່ງຖືເອົາອົງການຈັດຕັ້ງທາງສັງຄົມ ເປັນຄູ່ຮວ່ມພັດທະນາ ເຊິ່ງອົງການດັ່ງກ່າວ ແມ່ນບໍ່ໄດ້ສັງກັດລັດຖະບານ ຫລື NGO ໂດຍມີພາລະບົດບາດສໍາຄັນ ໃນການເສີມຂະຫຍາຍການພັດທະນາ ແລະ ຮັດແໜ້ນຄວາມສາມັກຄີ ດັ່ງນັ້ນ, ປະທານາທິບໍດີແຫ່ງສາທາລະນະລັດຝຣັ່ງ ຈຶ່ງໄດ້ຕົກລົງອານຸມັດການຊວ່ຍເຫລືອເພີ່ມຕື່ມໂດຍຜ່ານ NGO ພາຍໃນປີ 2016.
ທ່ານ ຟຣັງຊົວ ໂຮນລອງ (François Hollande) ປະທານາທິບໍດີ ແຫ່ງ ສາທາລະນະລັດຝຣັ່ງໄດ້ເຫັນດີອະນຸມັດທຶນຈໍານວນດັ່ງກ່າວ ເພື່ອຈັດຕັ້ງປະຕິບັດໃນສປປ ລາວ. ນັບແຕ່ປີ 2010 ເປັນຕົ້ນມາ ສະຖານທູດຝຣັ່ງປະ ຈໍາສປປ ລາວ ໄດ້ອະນຸມັດທຶນຊ່ວຍເຫລືອ 1 ລ້ານກວ່າເອີໂຣໃຫ້ແກ່ສະມາຄົມຕ່າງໆຂອງລາວ ໂດຍນໍາໃຊ້ກອງທຶນທາງສັງຄົມ ເພື່ອການພັດທະນາເຂົ້າໃນຂະແໜງການຕ່າງໆເຊັ່ນ: ຂະແໜງສາທາລະນະສຸກ, ວຽກງານຄວາມສະເໝີພາບຍິງ–ຊາຍ, ຊີວະນາໆພັນ, ວັດທະນະທໍາ, ການທອ່ງທ່ຽວແບບອະນຸລັກ ຫລື ການພັດທະນາທ້ອງຖິ່ນ.
ແຫລ່ງຂ່າວ:
