ບໍລິສັດມືຖືນ້ອງໃໝ່ໃນອິນເດຍເປີດຕົວສະມາດໂຟນລາຄາຖືກທີ່ສຸດເທົ່າທີ່ເຄີຍມີມາໃນໂລກເມື່ອວານນີ້ (17 ກຸມພາ) ໂດຍມຸ່ງສະໜອງຄວາມຕ້ອງການຂອງກຸ່ມລູກຄ້າໃນອິນເດຍທີ່ນິຍົມອຸປະກອນສື່ສານລາຄາປະຢັດ.
ຟຣີດອມ 251 ຊຶ່ງພັດທະນາຂຶ້ນໂດຍບໍລິສັດຣິງກິງ ເບວສ ຖືກຕັ້ງລາຄາຈຳໜ່າຍເອົາໄວ້ພຽງ 251 ຣີປີ ( ຕີເປັນເງິນລາວ 29 ພັນກວ່າກີບ) ຫຼືພຽງແຕ່ 1% ຂອງລາຄາໄອໂຟນຮຸ່ນຫຼ້າສຸດ.
ຣິງກິງ ເບວສ ກໍ່ຕັ້ງຂຶ້ນເມື່ອເດືອນກັນຍາປີ 2015 ໂດຍ ໂມຫິດ ກຸມານ ໂກເອລ ບັນດິດຈາກມະຫາວິທະຍາໄລອາມິຕິ ແລະເລີ່ມເປີດຈຳໜ່າຍໂທລະສັບເຄື່ອນທີ່ທາງເວັບໄຊເມື່ອ 2-3 ອາທິດທີ່ຜ່ານມາ ພາຍໃຕ້ຍີ່ຫໍ້ສິນຄ້າ “ເບວລ”.
ຟຣີດອມ 251 ຄືຜະລິດຕະພັນຕົວເດັ່ນທີ່ສຸດຂອງເຮົາ ແລະຖືວ່າເປັນການປະຕິວັດວົງການໂທລະສັບມືຖືເລີຍກໍວ່າໄດ້ ໂຄສົກຍິງໃຫ້ສຳພາດໃນງານເປີດຕົວຜະລິດຕະພັນທີ່ນະຄອນຫຼວງນິວເດລີ ປະຈຸບັນຣິງກິງ ເບລສ ຍັງຕ້ອງໃຊ້ວິທີນຳເຂົ້າຊິ້ນສ່ວນອຸປະກອນຈາກຕ່າງປະເທດເພື່ອນຳມາປະກອບເອງໃນອິນເດຍ ແຕ່ບໍລິສັດມີນະໂຍບາຍທີ່ຈຳໜ່າຍຜະລິດຕະພັນເມກ ອິນ ອິນເດຍ 100% ໃຫ້ໄດ້ພາຍໃນ 1 ປີ.
ສະມາດໂຟນລາຄາຖືກຊຶ່ງນຳເຂົ້າຈາກຈີນມີຈຳໜ່າຍທົ່ວໄປໃນອິນເດຍ ແຕ່ຜູ້ຜະລິດໃນປະເທດກໍເລີ່ມຕົ້ນເຂົ້າມາຊີສ່ວນແບ່ງຕະຫຼາດ ໂດຍຜະລິດໂທລະສັບຮຸ່ນໃໝ່ໆທີ່ລາຄາຈຳໜ່າຍບໍ່ເຖິງ 20 ໂດລາສະຫະລັດ.
ອິນເດຍເປັນຕະຫຼາດອຸປະກອນສື່ສານທີ່ໃຫຍ່ເປັນອັນດັບສອງຂອງໂລກ ແລະມີຜູ້ລົງທະບຽນໂທລະສັບມືຖືເຖິງຫຼັກ 1.000 ລ້ານຄົນ ເມື່ອເດືອນຕຸລາທີ່ຜ່ານມາ.
ແນວໃດກໍຕາມ ໃນບາງລັດທີ່ປະຊາກອນສ່ວນໃຫຍ່ຖານະທຸກຍາກເຊັ່ນ ລັດພິຫານ ອັດຕາການເຂົ້າເຖິງໂທລະສັບມືຖືຍັງຢູ່ພຽງແຕ່ 54%.