ສຳນັກຂ່າວຕ່າງປະເທດ ລາຍງານໃນວັນທີ 17 ກຸມພານີ້ວ່າ ສະຫະລັດອາເມຣິກາ ແລະ ສາທາລະນະລັດກູບາ ໄດ້ລົງນາມຂໍ້ຕົກລົງ ເລີ່ມເປີດໃຫ້ບໍລິການຖ້ຽວບິນການຄ້າລະຫວ່າງກັນ ຊຶ່ງເປັນຄັ້ງທຳອິດໃນຮອບ 50 ປີ ເລີ່ມຕັ້ງແຕ່ໄລຍະລະດູໃບໄມ້ປົ່ງຂອງປີນີ້ເປັນຕົ້ນໄປ ໂດຍຂໍ້ຕົກລົງສະບັບດັ່ງກ່າວ ຈະເຮັດໃຫ້ຖ້ຽວບິນການຄ້າ ທີ່ເດີນທາງໄປມາລະຫວ່າງສອງປະເທດ ເພີ່ມຂຶ້ນຢ່າງໜ້ອຍ 110 ຖ້ຽວຕໍ່ມື ຊຶ່ງຫລາຍກ່ວາປັດຈຸບັນເຖິງ 5 ເທົ່າ.
ທ່ານ ແອນໂທນີ ຟ໊ອກ ລັດຖະມົນຕີວ່າການກະຊວງຄົມມະນາຄົມ ສະຫະລັດອາເມຣິກາ ໄດ້ລະບຸວ່າ ຂໍ້ຕົກລົງຖ້ຽວບິນການຄ້າດັ່ງກ່າວ ເປັນເລື່ອງທີ່ສຳຄັນຫລາຍ ໃນຄວາມພະຍາຍາມຂອງສະຫະລັດຯ ທີ່ຈະຮ່ວມມືກັບກູບາ.
ທັງນີ້ ເນື່ອງຈາກທ້າຍປີ 2014 ເປັນຕົ້ນມາ ປະທານາທິບໍດີ ບາຣັກ ໂອບາມາ ແຫ່ງ ສະຫະລັດອາເມຣິກາ ແລະ ທ່ານ ຣາອູນ ກາສໂຕຣ ປະທານປະເທດ ແຫ່ງ ສາທາລະນະລັດກູບາ ໄດ້ປະກາດວ່າ ທັງສອງຝ່າຍຈະເລີ່ມສ້າງຄວາມສຳພັນ ຊຶ່ງເປັນສັດຕູກັນມາກວ່າເຄິ່ງສະຕະວັດນັ້ນ ກັບຄືນມາສູ່ລະດັບປົກກະຕິ ໂດຍທີ່ ທ່ານ ໂອບາມາ ແລະ ກາສໂຕຣ ໄດ້ຈັດປະຊຸມຮ່ວມກັນເປັນຄັ້ງທຳອິດ ໃນເດືອນເມສາ 2015 ຜ່ານມາ ທີ່ປານາມາ ແລະ ຈັບມືກັນໃນກອງປະຊຸມ ນອກຮອບກອງປະຊຸມສະມັດຊາໃຫຍ່ ອົງການສະຫະປະຊາຊາດ ເມື່ອເດືອນກັນຍາປີດຽວກັນອີກດ້ວຍ.
